Ua fa’ailoa fa’alauaitele e le Hawaiian Airlines, “Ona o le sipili faa-Ohana, o le alofa lava lea, ua faia ai e le pulega a le Hawaiian Air se masani ua loa ona i agaga fo’i o tagatanuu o Samoa, le agaalofa ma le agalelei, alofa tula’i ma le lima foa’i, ma sa fa’atino lea i le vaiaso fa’aiuga o le vaiaso ua te’a, e ala i le foa’i atu mo nisi o le latou aufaigaluega o lo’o i ai le mana’omia i le vaitau o le Eseta.”

Ua fa’ailoa fo’i e se tasi o le Pulega, “O le aotelega o pusa ua mae’a fa’atutumu i mea eseese ua taua’aoina e sui o le pulega, e atoa lelei le 13 na mafai ona taua’aoina ma ua talia fo’i ma le fa’afetai e le aufaigaluega, ae maise ai i latou ua fa’aititia itula e faigaluega ai ona ole fa’asa ia fa’amamaluina nei ma ua le toe atoatoa ai le tausiga o latou aiga.”

Ua aofia i nei foa’i ua taua’aoina o pusa moa sii atoatoa, taga araisa, pusa saimin, mea’ai tuuapa, cookies ma pusa vai sii atoatoa ma isi lava mea e gaosia ai mea tausami e aoga mo aiga uma. Ua fa’ailoa mai e Marianna Timu-Faiai o le Pulega a le Hawaiian Air, “E le fou foi i le mamalu o le tatou atunuu o Samoa lenei agaga foa’i ma le agaga alofa fa’apea le lima mafola i taimi e va’aia ai le mana’omia i nisi o tatou aiga, poo nisi lava ua laveia o latou lotoifale i fa’aletonu fa’aletamaoaiga, ona o mea e tutupu fa’afuase’i i le aluga o le tatou soifua nonofo fa’atasi ai i le tatou atunuu, ma o le agaga lava lea ua ala ai lenei taumafaiga ia fa’asoa atu pe afai o lava lau fa’asoa, ia e alofa atu ia aluga tutusa i tatou uma.”

“Ua masani le Hawaiian Air i le agaga alofa fa’apea ma ua tatou iloa foi ua fa’apea lava ona faia foa’i alofa i taimi e pagatia ai nisi o le atunuu ae maise le aufaigaluega i ni omiga fa’apea i le olaga faigaluega.”

“Ua tatou iloa fo’i le alagaupu masani a le atunuu, a lavea lou vaematua e lagona e lou tino atoa, o le ala lea e faia ai galuega alofa fa’apea e fa’ailoa manino ai le agaalofa o le isi i le tasi. Ua mautinoa ua fa’afuase’ia le olaga sologa lelei o aiga ma le taofia fa’afuase’i o galuega ona o le fa’asa i taimi o le fa’ama’i, ma e tatau ai ona sailia ala e fa’ailoa patino atu ai lou agalelei ma fetufa’i i taimi fa’apenei.”

O mea ua taua’aoina i le aufaigaluega ua a’afia galuega a le Kamupani Va’alele na foa’ia mai lea e le vasega o le Aufaigaluega i le Pulega ma isi fo’i na mafai ona foa’i mai luga o le ala o feso’ota’iga i le Facebook a le Hawaiian Air.