Ads by Google Ads by Google

Fuafua Komiti COVID-19 fa’amuta ana galuega ogatotonu o Ianuari


[ata: foa'i]

Pago Pago - AMERIKA SAMOA

 

Se'i vagana ua i ai ni suiga e le'i mafaufauina, ua malilie le Komiti Fa’afoe o le COVID-19 e fa’amuta aloaia a latou galuega i le vaiaso lona tolu ia Ianuari 2023, aua ua fa’amuta poloaiga fa’afuase’i o le COVID ma ua leva ona aveese fa'atapula'a fa'alotoifale o lenei fa’ama’i oti, ae maise ua tumau pea i lalo le numera o i latou pesia i le fa’ama’i.

 

O le fa’aiuga o le aso e tapunia ai, o se tasi lea o mataupu sa talanoaina i le fonotaga a le komiti fa’afoe i le vaiaso ua te’a, lea na saunoa ai le taitaifono ia Talauega Eleasalo Ale, o ia foi o le lutena kovana. 

 

O le mataupu mulimuli i le lisi o mataupu o le fono o le tapunia lea o galuega a le vaega galue. "O lea la ua maeʻa poloaiga faʻafuaseʻi ma ua tatou tatalaina aloaʻia tuaoi mai ia Ianuari 01, 2023, e i ai se isi mafuaaga e faʻaauau ai le galuega a le komiti fa’afoe?”. O le fesili lea a Talauega sa tuuina atu i sui o le komiti fa’afoe, lea na aofia ai le sui mai le malo feterale, le vaega o le FEMA.

 

Saunoa le Fa’atonu o le Matagaluega o le Soifua Maloloina, Motusa Tuileama Nua e fa’apea, “e matua leai lava se manaoga e faaauau ai pea” galuega a le komiti fa’afoe ae o le a i ai pea lipoti o loo manaomia pea mai le Soifua Malolo, falema’i o le LBJ Medical Center ma ofisa lagolago uma, e pei o le numera o tagata maua i le COVID-19.

 

Fa’ailoa e Motusa, o loʻo i ai le talitonuga o le Soifua Maloloina e faʻatupulaʻia le numera o faʻamaʻi COVID ona o faʻatasiga i aso malolo ae o se mea e tatau ona galulue vavalalata ai le Soifua Maloloina ma le LBJ e pulea. 

 

E le gata i lea, o le a fa'aauau pea ona galulue le Soifua Maloloina ma le Matagaluega o Uafu ma Malae Va’alele e fa'atatau ia i latou e ulufale mai i totonu o le teritori. 

 

I le leai o se isi finagalo faaalia o i latou sa auai, na taua ai e Talauega e faapea, ua ia maua ni tusitusiga mai sui o le komiti a e uiga i lenei mataupu ma o nei manatu ua vaaia foi e sui o le komiti fa’afoe.

 

"Ma ou te manatu o loʻo ioe tagata uma, e mafai ona fa’amuta galuega a le komiti,”o lana tala lea ma fautuaina le aso e tapunia ai Ianuari 17, 2023 - o le Aso Lua - ona o Ianuari 16 o le aso malolo a Martin Luther King.

 

Faatasi ai ma lenei aso fautuaina, o lona uiga e tatau i ofisa talafeagai uma ona faʻamaeʻa a latou lipoti a le aufaigaluega i lena taimi, pe a mafai. “Afai e leai, ta’u mai ia te a’u, e mafai ona tatou talanoaina se taimi e sili atu ona talafeagai e faamaea ai le lipoti o loo tatou manaomia faapea foi ma a tatou lava lipoti faaiu,” o lana tala lea, e faasino i le lipoti mulimuli a le komiti fa’afoe lea e aofia ai le lua i le tolu tausaga talu ona amata lea komiti fa’afoe. 

 

Afai foi e malilie i ai le aso 17 Ianuari 2023, na taua ai e Talauega o le a ia fautuaina le afioga i le Kovana Sili mo se fa’aaliga fa’alauaitele e fa’ailoa ai le mae’a aloaia o galuega a le komiti fa’afoe i lea aso. 

 

"Ma e mafai ona tatou agai uma i luma e fai isi mea e tatau ona tatou faia, ma e le’i mafai ona faia ona o tatou tiute i le komiti fa’afoe,” o le saunoaga lea a Talauega. 

 

E leai se tetee i le fautuaga a Talauega. “O le a ou tulitatao tagata uma, ne’i iai se suiga. Ae mo le taimi nei, se’i taula’i le aso 17 o Ianuari e fai ma fono mulimuli a le komiti fa’afoe ma o le a ou talanoaina lenei mataupu ma le kovana sili,”o lana tala lea ma faailoa atu le toatele o tagata sa galulue malosi i le taimi o le COVID.

 

"Ma ou te le fiafia e na o le faamutaina o galuega a le Komiti Faafoe e aunoa ma le fai atu o se tala i se mea talafeagai. Se’i faaauau lena talanoaga ma talosia ia oo atu i le aso 17 o Ianuari o le a iai se tatou fuafuaga mo se mea e tupu,” o lana faaopoopo lea.

 

I le fa’aiuga o le saunoaga a Talauega na fai ai ma sui o le ali’i kovana, na ia fa’aleo ai le agaga fa’afetai i sui uma o le komiti fa’afoe mo a latou galuega ma le fa’amaoni. Sa ia fa’afetaia fo’i le FEMA ma pa’aga feterale mo le fa’aauauina pea o le latou sao i galuega a le komiti fa’afoe atoa ai ma le lagolagosua a le feterale. 

 

ISI MATAUPU

 

Na fa’aaoga fo’i e Motusa lea avanoa e fa’amamafa ai le taua o le pepa fa’ailoa o le soifua maloloina o femalagaaiga fa’atekelonosi (health electronic form) mo tagata malaga e ulufale mai i Amerika Samoa, ona o se faiga e mata’ituina ai le soifua maloloina e mafai ona fa’aaoga e su’esu’e ai se mataupu fou e tula’i i se fa’ama’i i le lumana’i.

 

O lo'o iai le pepa e avanoa mo i latou e le'i resitalaina i luga ole laiga o feso’otaiga fa’atekenolosi a'o le'i felelei ae o lo'o va'ai le Soifua Maloloinia e fa'aumatia le faaogaina o pepa ia Ianuari aso 01, 2023.

 

O isi matagaluega/ lala sooupu e iai pepa malaga e pei o le Ofisa o Femalagaaiga ma Faatoaga o loo fautuaina foi ina ia iai foi masini faaeletonika ina ia mafai ai ona maua e tagata malaga a o lei malaga atu i Amerika Samoa.

 

O le aso 15 o Novema o le tausaga lenei sa fa’alauiloa ai e le malo ana fuafuaga fou, mo i latou e ulufale mai i le teritori, e tatau ona lesitala i le upega tafa’ilagi ma fa’atumu ai tulaga o le soifua maloloina. 

 

E mafai ona maua i le: (https://travelerdeclaration.as.gov) - ma o lo’o i ai fo’i le vaega o lo’o fa’aSamoaina ina ia malamalama atili tagata malaga mai i Amerika Samoa.