I se lipoti mai Apia, ua faailoa e le  Samoa Airways le kamupani va’alele a le malo o Samoa, o lo ua fuafua e fa’atulaga ana faigamalaga e tulaueleele ai i Honolulu Hawaii i le fa’aiuga o lenei tausaga 2020.

O le fa’amoemoe maualuga lea sa fa’ailoa mai e le alii Minisita o Pisinisi mo le Lautele a le Malo o Samoa [Public Enterprises], Lautafi Selafi Purcell i se fa’atalanoaga ma le Facebook Page a le Malo o Samoa.

I le taimi nei ua taofia e le malo o Samoa faigamalaga a le FIji Air lea sa tulaueleele i le latou Malae Va’alelei Faleolo, ma ua fa’afaigata ona malilie mai le Malo o Fiti ina ia fefa’asoa’i ma sui iloga o le Komiti o feoaiga i le ea a le Palemene o Samoa, fa’atasi ai ma le Pulega a le Samoa Airways, ina ia soalaupule nisi o maliliega ina ia fetufa’i Kamupani Vaalele e lua i ala e tofusia ai ona maua nai manuia e itu na lua.

Ona o lea ua taofia ai nei le vae o feoaiga i le ea, lea tu laueleele mai ai ni va’alele mai Fiti i Samoa a le Fiji Air. “O le aia tatau a Samoa le latou vaega o le vateatea lea e i luga ane o le latou sone i le gataifale ma le ea, e le so’ona tafale ai fo’i so’o se Kamupani Va’alele ae leai se tupe e totogia mo Samoa, ua tatau la ona taofia feoa’iga i le ea a le Fiji Air ae se’i faia ni suiga i maliliega, ia maua se vaega tupe a Samoa mai le latou fo’i sone i le vateatea.”

Na fa’ailoa mai i le fonotaga a le Kapeneta i a latou fonotaga, “Na amata ona ta’alo leaga mai le Kamupani Va’alele a Fiti, ae o loo galulue pea Samoa ina ia fa’aleleia atili le latou malae sese’e ai va’alele i Faleolo, ina ia talafeagai ma aiaiga o lo’o fa’ata’oto mai e le Kamupani Va’alele a Fiti, e mafai ai ona sesee a latou va’alele i Faleolo. Lea la ua mae’a fa’aleleia mea uma na aiaia, ae ua le fia talanoa mai i latou e faia suiga nei i le maliliega mo le taulaueleele o latou va’alele i le matou malaeva’alele. O ia maliliega e mafai ai ona tofu si kamupani va’alele ma se vaega tupe e maua.”

“O talanoaga nei e mana’omia ona faia, ma aga i ai le tautuaina o le mamalu femalaga’i i le amataga o Aperila 2020.” O se tala lea a Lautafi.

Ua fa’ailoa mai fo’i o le a aofia i lenei suiga i le Samoa Airways le i ai ma va’alele ituaiga ATR, lea e talafeagai lelei ma faigamalaga i le va o Samoa ma Fiti.

I le va o Samoa ma Hawaii, “O le alava’a lea e pule ai Samoa, peita’i ua leva ona fa’aaoga mai e le Fiji Airways ae le totogia mai se vaega tupe mo le Malo o Samoa, o le taimi loa ua tatau ona fa’asa’o lea tulaga, aua o lea ua mae’a faia suiga lelei ma e agava’a ai Samoa i le tulaueleele o latou va’alele ma pasese i le Malae va’alele i Honolulu e fa’aaoga ai lea vainuu fa’avaomalo.”

“O le a matou toe ave’esea maia le vainuu fa’avaomalo lea, ma e amatalia faigamalaga a le Samoa Airways i le fa’aiuga o le tausaga nei, peita’i e aoina muamua mai pasese i le va o Aukilani ma Tonga ma alu atu sa’o loa le faigamalaga i Honolulu, Hawaii e le tatou Kamupani va’alele o le Samoa Airways,” o se isi lea fa’aiuga ua fa’ailoa e Lautafi.