Ads by Google Ads by Google

Fuafua sua ele’ele falemai itumalo fou mo Ofu i Manu’a


[ata: foa'i]

Pago Pago - AMERIKA SAMOA

 

O le falema’i fou a le Matagaluega o le Soifua Maloloina i le motu o Ofu, o lo o tautua ai tagata o lo o nonofo i motu o Ofu ma Olosega, ua sauni e sua le eleele i totonu o le isi 4 i le ono masina, o le saunoaga lea a le Fa’atonusili o le Soifua Maloloina, Motusa Tuileama Nua, i le taimi o le iloiloga lata mai nei a le Komiti a le Senate o le Soifua Maloloina. 

 

Na tuuina mai e Motusa lea fa’amatalaga, e tali atu ai i le fesili na laga e le afioga i le ali’i senetoa ia Malaepule Saite Moliga, o lo o tula’i mo Manu’a Itumalo #2- Ofu ma Olosega.

 

I le molimau a le Senatoa o Manu'a, o le fale o le EOB i Ofu sa faaaoga e fatino ai le auaunaga faasoifua maloloina mo Ofu ma Olosega, ae o loo fesiligia poo afea e amata ai ona faaaoga le falemai fou i Ofu,  ona ua tele tupe ua alu i le fauga o lea poloketi. 

 

Na faailoa e Motusa  ole fale lea o le EOB i Ofu ua silia i le lua tausaga o faaaoga mo le falema'i. I lana faamatalaga sa iai fuafuaga a le DoH ma le Malo e fau se falemai fou mo Ofu ma Olosega, i tupe sa faamaonia i lalo o le American Rescue Plan Act (ARPA). 

 

Na ia ta'u atu foi i Senatoa, o le falemai lea o le a faatu i luga ose mati'e, ona sa iai le mea na tupu ile taimi na pu'e ai galu maualuluga ma lolovaia ai le malaevaalele ma aafia ai le falemai i Ofu ma fai ai le tonu e sii i luga ose mati'e le falemai e fau ai, ma se fale e faamalumalu ai tagata mai ni faalavelave tutupu faafuasei. 

 

Ua uma foi ona faamaonia tupe mo le poloketi lea i le folasaga a Motusa, ae faato'a foi ane foi le vaega a le DoH mai Manu'a, sa fai ai faatalanoaga faalauaitele ole poloketi, ma aumai ai foi finagalo o taitai ma e o alala ai i Ofu ma Olosega.

 

I le faamatalaga ale Faatonu o le DoH,  e fa i le ono masina ona amata loa lea ole galuega mo le falema'i fou i Ofu, peitai e tasi lava le faafitauli o iai nei o le faamautuina lea o le fanua mo le poloketi. Ua iai le fanua ua taga'i iai le DoH mo le poloketi, ae o loo vaavaai i isi fanua, e mana'omia ona fua. 

 

Saunoa foi Motusa i Senatoa, ua mae'a le faatalanoaga faasolo i le motu o Ta'u mo le falemai fou i le motu, ma faatupe foi e le ARPA. 

 

Pei ona lipotia talu ai e le Samoa News, o faatalanoaga faalauaitele i luga o poloketi o loo faatupe e le ARPA, o laassaga ina ia faamalie ai manaoga poo aiaiga ale malo feterale faatatau i le faaaogaina o tupe. 

 

O le lipoti tuufaatasi a le Kovana mo le Teritori, na tufa atu kopi i le maota i le vaiaso talu ai, na atagia ai, o le $20 miliona mai le ARPA ua faamaonia mo le DoH, o loo aofia ai ma le $2.37 miliona mo le falemai mo Ofu ma Olosega, $2.41 miliona mo le falemai i Ta'u ma le toe faalauteleina o le auaunaga faalesoifua maloloina i Fitiuta.