Pago Pago - AMERIKA SAMOA

O lo ua fa’ailoa mai e le susuga le tamaitai Sui Faatonu o le Matagaluega o Uafu ma Malaeva’alele, o le a tapunia aloa’ia le Uafu Tele i Fagatogo i le aso Lulu nei, ona o lo ua fa’atulaga le toe sauniga o le susuga le Fa’atonu ua maliu, Christopher King.

O le ulua’i Fa’atonu lenei a le nofoaiga a Kovana Lemanu Mauga ma Sui Kovana Talauega Ale ua maliu, ma ua fa’apea fo’i ona ootia fa’atasi le faigamalo, aiga ma pelega a lenei fa’atonu, ona ua to’esea foi se tasi o lupe mai le fuifui, a’o se tasi fo’i o totino o le Kapeneta a le afioga le Kovana Sili o Amerika Samoa, Lemanu Peleti S. Mauga.

O Tesema 14 lea ua tapena i ai le fa’amoemoe o aiga, fa’apea fo’i le matagaluega atoa ma le Malo, aua ua tu’ua le malo e lana susuga le fa’atonu, ae o lo’o faia lava ona tiute e pei ona tofia i ai o ia e fa’atino.

Ua fa’amalulu mai fo’i le matagaluega pe afai o le a to’atele nisi e le tautuaina i lea aso, ae o se taimi fo’i o le a taualoa ai le auaunaga matavela a lenei ta’ita’i o le atunuu, ma fa’afetaia ai le Atua ona o se ta’ita’i lelei sa galulue ma le aufaigaluega e fa’ataunuuina le tele o ona tiute mo le tautuaina o le atunuu atoa mai lana matagaluega i tausaga e tele.

Pe afai e i ai nisi fa’afesili e mafai ona vala’au ane i le Matagaluega o le Pulega o le Uafu i Fagatogo 633-4251 e fa’ailoa atu ai nei suiga, poo le Ofisa fo’i o le Malaeva’alele 699-9101.