Pago Pago - AMERIKA SAMOA

E tusa ai ma se ripoti toe suia, a le sui Loia Sili o General Lanny A. Breuer o Faamasinoga a le Iunaite Setete, lea na toe suia ia Fepuari 5, 2025, mai i se ripoti ia Ianuari 2011, ua ta’ua ai le ioeina e se tasi na avea ma Faatonusili o le ofisa o pasi aoga a le Ofisa o Aoga a Amerika Samoa, ia ona moliaga o le taupulepule e solia se tulafono feterale.

O Gustav Nauer, o se tagatanu’u a Amerika Samoa, ma ua ia ioeina le faitauga e tasi, i le taupulepule e solia se tulafono feterale, i luma o le vaega a le ‘Public Integrity Section’.

Ma o se vaega o aiaiga o lana ioega, ua faapea ona ia fa’amaonia ai lona auai i se taupulepulega, na amata mai i le faaiuga o le tausaga e 2022, faatasi ma nisi o tagata faigaluega a le Ofisa o Aoga a Amerika Samoa, faapea ma le pule o le kamupani sa fa’atauina vaega o taavale i le malo o Amerika Samoa.

Ma o se vaega o lea taupulepulega, o le faia lea e Nauer ma isi tagata faigaluega o le Ofisa o Aoga a Amerika Samoa, ia ni oka pepelo (phantom), o ni vaega o pasi, e le maua e le malo, faapea ai ma le si’itia o tau o vaega o pasi, mai i lea kamupani.

Ae maua e Nauer ma isi tagata faigaluega o le malo ia se vaegatupe totogi e $300,000, i le va o Ianuari 2003 ma Oketopa 2006.

E lima tausaga le maualuga o le faasalaga e mafai ona faasala ai Nauer faapea ma se sala tupe e $250,000, i moliaga o le taupulepulega. 

E le’i fa’amautuina se aso e lauina ai lona faasalaga.

O le mataupu faasaga ia Nauer sa su’esu’eina e le vaega a le FBI, le ofisa o Su’esu’ega Lautele mo le Ofisa o le Initeria, ma le ofisa o Su’esu’ega Lautele mo le Ofisa o Aoga.

TALA’AGA

Ia Ianuari 2011, na ioeina ai e Gustav Nauer ia moliaga o le taupulepule e talia se vaegatupe i ala solitulafono, mai i se polokalama Feterale.

Na fa’alauiloa mai e le ofisa o Su’esu’ega Lautele a le Ofisa o Aoga ma le Ofisa o le Initeria faapea le vaega a le FBI, e faapea, i le va o le 2002 ma le 2006, na fa’atagaina ai e Nauer ia le malo o Amerika Samoa, ona fa’atauina mai ni vaega ‘pepelo’ (phantom parts) o se pasi, i se tau maualuga mai i seisi sa o la taupulepule faatasi.

Ae e le’i taunu’u nei oka, pe sa okaina foi i se tau sili ona maualuga ia nei vaega o pasi a le Ofisa o Aoga a Amerika Samoa.

O le tupe sa totogiina ai Nauer ma i latou sa auai i lenei taupulepulega faasolitulafono, e $300,000.

E tusa ai ma se ripoti a le Samoa News, o i latou na aofia i lenei taupulepulega, o Paul Solofa ma Oscar Mayer.

E tusa ai ma le malo, e fa’a 50 ona mauaina e Nauer ia se vaegatupe i lenei taupulepulega, i le va o Ianuari 2003 ma Oketopa 2006.

Na molimau foi Nauer, mo le malo, i isi fa’amasinoga, i le mataupu lava lenei e tasi.