Pago Pago - AMERIKA SAMOA

O le aso Lulu na se’i mavae atu nei, sa faia ai se iloiloga a le Komiti o Paketi ma Tupe Faasoasoa a le Senate e fa’atatau i se i’ugafono sa faaulufaleina i le vaiaso ua tuanai, e talosagaina ai le Kovana ina ia faatonuina le Tausitupe e totogi uma lafoga toe faafo’i (tax refunds) a le mamalu o le atunu’u faapea ma le totogiina o aitalafu a le malo i kamupani, ae e le’i tapunia le tausaga tupe o le 2024, lea e fa’amutaina i le aso Gafua a sau nei, Setema 30.

O lenei I’ugafono sa faaulufaleina e le afioga i le Senatoa ia Malaepule Saite Moliga, ma o lo’o ta’ua ai le iva masina i totonu o le 2024, ae e na’o lafoga sa failaina i le va o Ianuari 1 ma Fepuari 29, ua mae’a ona tufatufaina.

“O le umi na’ua o le faatali o lafoga, ua avea ma atugaluga tele i le Maota Maualuga ma tagata o Amerika Samoa,” o fa’aupuga ia o lenei i’ugafono.  “O le taofia pea o tupe a le ‘autogilafoga o se mea e ofo ai ma le tatau lava ona tupu lea mea.  Ua avea le faatuai ona maua lafoga ma mea ua mafatia ai le toatele o tagata ma aiga o e faamoemoe i lafoga nei mo mea faitupe.”

O lo’o ua ta’ua foi i toton o le i’ugafono le tele o fa’asea ua o’o atu i le Senate mai i tua, i a latou pili e le’i totogia.  “E taua tele le totogia vave o pili faapenei ina ia faatumauina ai le faatuatuaina o le malo ma tulaga lelei o auaunaga a le malo.”

“O le vave ona totogi o pili e mautinoa ai foi le fa’aauau pea ona maua o oloa ma auaunaga e moomia, e aunoa ma le fa’alavelavea, ona e taua tele lea mo sologa lelei o galuega a le malo,” e pei ona ta’ua i faaupuga o le i’ugafono.  “E maua ai foi le tulaga moemoeina o le malo e kamupani tua, ma una’ia ai ma nisi pisinisi e fai konekarate ma le malo.”

Ua faapea foi ona ta’ua i totonu o le i’ugafono le aoga o le vave totogia o pili a le malo, ma tulaga e “fesoasoani ai i le tamaoaiga o le atunu’u, e ala i le mautinoa o lo’o fa’agasolo lelei le tulaga tau tupe e tatau ai a kamupani e totogi ai a latou tagata faigaluega, ma fesoasoani ai i le atunu’u.”

“O le fa’atauaina o le totogiina o pili a pisinisi, e atagia ai foi le faataunuuina lelei o se malo ona tiute tau tupe ma le fa’amalamalama lelei o ana galuega, ma fa’amlosia atili ai le fa’atuatuaina e le toatele o galuega a le malo.”

O molimau na auai i le iloiloga, na aofia ai le Tausitupe a le malo, le susuga ia Malemo Tausaga ma le afioga ia Loa Tuimavave Laupola mai i le ofisa a le kovana.

Sa faamanino e le afioga i le Taitaifono o le Komiti a le Senate, le afioga i le Senatoa ia Utu Sila Poasa, le agaga o lenei iloiloga, ina ia fa’amautu ai pe mata e mafai ona totogia lafoga a le mamalu o le atunu’u ma pili o lo’o nofo aitalafu ai le malo, i kamupani tua, ae e le’i tapunia le tausaga tupe o le 2024, i le aso Gafua o le vaiaso fou.

Na tali Malemo e ala i le fa’amalamalamaina mai o se Teugatupe Faaleoleo mo Lafoga (Tax Reserve Account) lea e teu ai le 25% o lafoga e totogi e kamupani, ma fa’aagaga mo lenei faamoemoe.  Ae peitai, ina ua nofoia le faigamalo o iai nei, e leai se tupe i totonu o lea teugatupe.

Sa ta’ua e Malemo, sa fa’aaogaina e le malo ia tupe aoina e totogi ai lafoga a le atunu’u, e aofia ai pili o lo’o totogi mai mo auaunaga, konakarate ma le fa’aagaioiga o le malo.

Na molimau foi Malemo, i le taimi nei, e 13,166 lafoga ua mae’a ona faila ma ua mae’a ona totogia le 10,808 ma o lafoga ia o lo’o totoe, o le a totogia i ni vaega se fa.

E le gata i lea, sa ia fa’aalia mai foi, o le totogiina o lafoga, e mulimuli i le tausaga faakalena ae le o le tausaga tupe.  Mo se fa’ataitaiga, o latou sa faila a latou lafoga i le tausaga e 2022 e o’o atu lava ia Tesema 2023 o mafai ona totogi pe faatali ai a latou lafoga.

Sa fautuaina e le afioga i le Senatoa ia Malaepule Saite Moliga ia le malo ina ia ave le fa’amuamua i le totogia o lafoga a le atunu’u, ae e le’i tapunia le tausaga tupe 2024.  Ma sa ia faamamafaina le manaomia ona saili o se vaegatupe e mafai ai ona totogia lafoga a le atunu’u, faapea pili a kamupani tua.

Sa faamamafaina foi e Malaepule le taua o le toe fa’amautuina o le fa’atuatuaga a le atunu’u, i le faigamalo.