Pago Pago - AMERIKA SAMOA

O le aso Lua, Fepuari 6, 2024, na fa’auluina ai e le afioga i le sui peresetene o le Senate, ia Magalei Logovii, se iugafono e su’esu’e ai le fa’aaogaina sese o tupe maua e le i paketiina mai i le tausaga faaletupe o le 2023, i le aofaiga e $36 miliona, ma valaauina ai le Loia Sili ina ia saili mai se Loia Tuto’atasi e na te faataunuuina se su’esu’ega le faaituau, i le fa’aaogaina sese o nei tupe, lea o lo o solia ai tulafono lautele 37-12.

Sa saunoa le afioga Magalei, “O le iugafono lenei a le tatou maota, e tutusa lelei ma le iugafono tu’ufa’atasi lea na tatou pasia, na ave i le Maota o Sui, e o’o mai i le aso e leai se mea o faia e le Maota o Sui, o le mafua’aga lea ua toe faaulu mai ai le iugafono lenei a le tatou lava Maota, ina ia mafai ona gaioi lenei mataupu, ua leva ona ta’atia.” 

I totonu o lenei iugafono fou o lo o ta’ua ai e faapea, o le Fono Faitulafono, e latou te pasiaina paketi ma e sainia loa e le kovana, ona avea loa lea o lenei paketi ma tulafono e ao ona faamalosia e taitai o le malo.

E le gata i lea, o lo o faapea foi ona ta’ua i lenei i’ugafono, le leai o se taitai po o se tagata faigaluega a le malo, ona faatagaina le fa’aaogaina mai, fausia pe faatagaina le fa’aaogaina o so’o se tupe fa’asoasoa po o tupe e sili atu nai lo le aofaiga o lo o iai; ma e le mafai foi e se taitai po o tagata faigaluega a le malo, ona faia ni konakalate po o maliliega, mo le totogia o tupe mo so’o se fuafuaga, i luma mai o tupe faasoasoa ua mae’a ona faama’oti galuega e fa’aaoga ai, seia vagana ua pasia mai e le tulafono.

O tupe faasoasoa lea o lo o ta’ua i le tulafono, e faatatau i paketi ua pasia e le fono faitulafono, e pei ona faamanino mai i totonu o lenei iugafono.

Ua iai foi ma se fa’asalaga faatulafonoina, mo so’o se taitai po o tagata faigaluega a le malo, e latou te solia lenei tulafono, e aofia ai le fa’ateaina o lea tagata mai i lana galuega, ma molia i le vasega D o soligatulafono mamafa.

O lo o faamamafaina mai foi i totonu o le iugafono sa faauluina e faapea, o so’o se tupe maua mai i le tausaga faaletupe o le 2023, e le i paketiina, e le mafai ona fa’aaogaina mo seisi lava fuafuaga, seia vagana ua mua’i pasia ma faasoasoa mai e le Fono Faitulafono.  E tatau foi ona logoina vave e le kovana ia le fono faitulafono, so’o se taimi e mauaina ai ni tupe maua, e le i paketiina.

Ua ta’ua foi i totonu o lenei iugafono, le faailoaina atu e le afioga i le Peresetene o le Senate, Tuaolo Manaia Fruean, ia se fonotaga sa faia i le va o ia ma le afioga i le Fofoga Fetalai, ia Savali Talavou Ale faatasi ma le kovana, le afioga Lemanu P. S. Mauga ma le sui kovana, le afioga Talauega E. V. Ale, ia Setema 22, 2023, lea na fa’ailoa atu ai e le kovana le fa’aaogaina e lana faigamalo o se tinoitupe e $36 miliona, o tupe faaopoopo mai i le tausaga faaletupe o le 2023, e ui ina o lo o latou nofo malamalama, e tusa ai ma ala o le tulafono, sa tatau ona lipoti mai so’o se tupe maua fou, i le fono faitulafono, mo le faasoasoaina.

 Na faauluina e le faigamalo i le Fono, i se taimi mulimuli ane, ia se pili mo le fa’asoasoaina o lenei tupe ua mae’a ona fa’aaogaina.

O lo o ua ta’ua foi i totonu o le iugafono a le Senate e faapea, o le pili sa faauluina e le faigamalo, e le gata ina taufa’asese, ae fa’amaonia ai se faigamalo e le o tausia le tulafono, po o tuaoi i le va o lala eseese a le malo.  O se tulaga le fa’aaloalo i se faavae o iai nei, e puipuia ai le tutupu mai o tulaga faapenei, e pei ona faia e le faigamalo.

Ua talitonu foi le iugafono, o le pili mo tupe faaopoopo e pei ona faaulu e le faigamalo, o se luma lea i tulaga faatemokalasi faapea tu ma aganu’u a Samoa.  Ma ua o latou ave fa’amalosi ia tiute faaletulafono a le maota fono, e faasoasoa ai tupe o lo o manaomia e faagaioi ai le malo atoa.

E le gata i lea, o lo o ua taofi lenei iugafono, o se faamaualuga i le Faigamalo, le manatu o le a ‘faamagaloina’ la latou solitulafono e le fono faitulafono, ae leai se malosiaga a le faigamalo e ‘faamagalo’ ai soligatulafono.   Ua na o le Atua e mafai ona faamagalo a tatou agasala.

Ua valaauina ai e le iugafono ia le susuga i le Loia Sili, ia Fainu’ulelei Falefatu Alailima-Utu, ina ia talosagaina le filifilia o se Loia Tutoatasi e na te su’esu’eina ma faamaumauina lenei soligatulafono, ua faia e le Faigamalo.

Sa fesiligia e le afioga Tuaolo ia Magalei po o le a se fuafuaga ale Senate, pe afai e le gaioi mai foi le Loia Sili i lenei iugafono.  Sa ia ta’ua, afai ua fa’ao’oina atu e le Loia Sili le mataupu lea na a’afia ai le Faatonusili o le Human Resources, i le Faamasino, e tatau foi ona ia faia le mea e tasi i lenei mataupu.

Sa tali Magalei, afai e le gaioi mai le Loia Sili i lenei iugafono, o le a faao’o loa lenei mataupu i le faamasinoga.

E 30 aso lea ua tu’uina atu e tali mai ai le Loia Sili i le fono faitulafono, ae afai e uma lena 30 aso, e le i filifilia se Loia Tutoatasi, e tatau i le Loia Sili ona fa’ao’o mai se lipoti i le Komiti o Tulafono a le Senate, e faamalamalama mai ai le mafuaaga.