Ads by Google Ads by Google

Laisene ave ta’avale lalo tulafono feterale “REAL ID” amata vaiaso fou


[ata: foa'i]

Pago Pago - AMERIKA SAMOA

 

Ua fa’ailoa e le ofisa o lo’o faia laisene ave ta’avale, le OMV (Office of Motor Vehicle), e fa’apea o le Aso Gafua i le vaiaso fou, Tesema aso 5, e amata ai ona saunia laisene i lalo o le “REAL ID” - o se tulafono a le malo fetarale ua leva ona fa’amalosia, ae sa tuuina mai ia Amerika Samoa se taimi fa’atapula’a ina ia tausisia i ai. 

 

I se vaitaimi e le’i mamao atu, i nai tausaga ua te’a, sa pasia ai e le Fono Faitulafono ma sainia e le Kovana Sili, se pili e fa’atulafonoina ai le faia o laisene ave ta’avale i Amerika Samoa ina ia usitaia tulafono feterale a le “REAL ID”.

 

Ina ua fesiligia e le Samoa News, sa fa’ailoa mai ai e le ta’ita’i o le OMV ia Mary Putuga e fa’apea o Tesema aso 5 e amata ai ona faia laisene ave ta’avale, e talafeagai ma aiaiga o le tulafono “REDL ID”. 

 

Peita'i, e na'o Nasionale ma Sitiseni o Amerika e agava'a mo le REAL ID. Fa’ailoa e Putuga, o le tuai ona amata ona faia o laisene mo le “REAL ID” ona sa fa’atali fa’amatalaga mai le Matagaluega fetarale o le Homeland Security, pe mafai ona malaga tagata Amerika Samoa i Amerika, e fa’aaoga ai le pepa malaga o le Certificate of Identity, po’o le CI. 

 

E le’i faamaonia e Ms Putuga le tulaga o le CI o loo faaaoga mo femalagaaiga i fafo. E le’i mafai fo’i ona maua se fa’amatalaga pe o le tali mai le Sui Komesina ia Terry Letuli i lenei mataupu i le CI, ona e le’i tali maia lana telefoni feave’ai i le taimi sa telefoni atu i ai le Samoa News. 

 

O lo’o galulue le OMV ma le Ofisa o le Loia Sili i lenei mataupu ma o se taimi o i luma e tuuina mai ai nisi fa’amatalaga auiliili mo le mamalu lautele o le atunu’u. 

 

Ina ia maua le laisene i lalo o le tulafono REAL ID, e tatau ona e tuʻuina atu faʻamaoniga o le faʻamatalaga ma le nofomau. O ia faʻamaoniga e aofia ai mea nei: Social Security card (pepa o le saogalemu), se tusifolau, poʻo se pepa fanau o loʻo i ai se ata, poʻo se Photo ID e pei o se ID palota, poʻo se laisene avetaʻavale tuai.

 

O isi fa'amaoniga e aofia ai le ulu-siaki o lou totogi o lo’o i fa’ailoa ai lau numera Saogalemu po'o lau pepa lafoga o lo’o i ai lau numera Saogalemu. 

 

O fa'amaoniga o le nofomau e mafai ona aofia ai se pili e le eletise mai le ASPA, po’o le pili o le telefoni mai le ASTCA. 

 

O Amerika Samoa e na'o le pau lea o le setete po’o le teritori o Amerika, e le'i usitaia le tulafono a le REAL ID ma ua tu'uina atu ia Me 2023 ina ia tausisia.

 

A mae’a lea aso fa’atapula’a, e le toe talia laisene ave ta’avale a Amerika Samoa o lo’o i ai nei mo le malaga atu i totonu o Amerika po’o le isi setete ma ulufale atu i totonu o fale feterale.

 

O lo’o galulue i le taimi nei le Matagaluega o le Puipuiga o le Saogalemu Lautele (DPS) ma le Ofisa o le Loia Sili e uiga i laisene ave ta’avale mo tagata e le o ni nasionale ma sitiseni Amerika o lo’o aumau i Amerika Samoa.