Ads by Google Ads by Google

Lata i le to’a 90 ali’i Mautofi na faatauto mo le faatinoina o tiute tauave


Le taimi na faatauto ai susuga i ali’i mautofi e le afioga i le ali’i Faamasino ia Suapaia J. Pereira i le aso Gafua na te’a nei, e aloaia ai le avea o i latou ma Faalupga, Pulenu’u faapea ai ma Leoleo nu’u i afioaga ma itumalo ta’itasi o le atunu’u. [ata AF]

Le afioga i le Failautusi o le Ofisa o Mataupu Tau Samoa, Mauga Tasi Asuega, ma Kovana o Falelima e toatolu, faapea ai ma le afioga i le ali’i Faamasino ia Suapaia J. Pereira i le sauniga e faatauto aloaia ai ali’i mautofi i totonu o afioaga ma itumalo o le atunu’u i le aso Gafua o le vaiaso nei. [ata AF]
ausage@samoanews.com

Pago Pago, AMERIKA SAMOA

 

E lata i le to’a 90 le aofa’i o ali’i Mautofi mai afioaga ma itumalo eseese i le motu o Tutuila, Manu’a ma Aunu’u na faatauto i le taeao o le aso Gafua na te’a nei, mo le faatinoina o a latou tiute faa Faalupega, Pulenu’u ma Leoleo nu’u mo lenei tausaga.

 

O le afioga i le ali’i Faamasino ia Suapaia J. Pereira na gafa ma le faatautaia o le faatautoga o ali’i Mautofi, lea fo’i na molimauina e le Ofisa o le Faigamalo Faalotoifale, e pei ona i ai le Failautusi o le Ofisa o Mataupu Tau Samoa, le afioga i le Maoputasi ia Mauga Tasi Asuega, o afioga i Kovana o Falelima e 3 i le atunu’u, faapea ai ma le Sui Failautusi o le Ofisa o Matapu Tau Samoa, le tofa i le Tootoo ia Tauese Vaa Sunia ma le mamalu o le Ofisa. 

 

E le i mafai ona auai atu le afioga i le al’i Kovana Sili ia Lemanu P. S. Mauga ma le Lutena Kovana ia Talauega Eleasalo Ale ona o nisi o tuatuano’a faalemalo. 

 

O le mae’a ai o le sauniga lotu puupuu e faafetaia ai le agalelei o le Atua, na sosoo ai loa ma le saunoaga a le afioga i le Maouputasi i Mauga, ma ia faamalosia ai ali’i Mautofi uma ina ia faatino o latou tiute ma le fa’amaoni. 

 

O le afioga i le ali’i Faamasino ia Suapaia na faatinoina le sauniga o le faatautoina o alii Mautofi.

 

E to’a 5 i latou e le i mafai ona faatautoina i lenei sauniga taua, e pei ona tolaulauina e le tofa Tauese o latou suafa. O le to’atolu o i latou nei o lo o poloka pea lava i Hawaii ae o le isi to’alua sa i ai i le taimi o le sauniga ae le i mafai ona faatautoina, ona e i ai pepa e le i mae’a ona tuuina atu i le Ofisa e aloaia ai lo la tauaveina o tofi mai afioaga taitasi.

 

Na faamanino e Tauese e faapea, o le suiga e pei ona i ai lenei nofoaiga, ua uia lava ala o le tulafono mo soo se tasi e filifilia i le tofiga Faalupega, Pulenu’u poo le Leoleo nu’u fo’i, e aofia ai le faia o le suega e faamaonia ai e le o tagofia fualaau faasaina.

 

E oo atu i le aso na faataoto ai ali’i Mautofi, e le i tauaao atu e sui ia e to’alua faaiuga o suega e iloa ai la te le o tagofia fualaau faasaina. O lea suega lea e faia e le Matagaluega o le Puipuiga o le Saogalemu Lotoifale, lea fo’i e faamalosia ai tagata faigaluega uma lava a le malo ina ia uia le auala lea mo kilia faigaluega.

 

I lana saunoaga faamalosi i ali’i Mautofi, na faailoa ai e Mauga le taua tele o le tiute o le ali’i Mautofi i totonu o nu’u ma itumalo. O i latou ia e gafa ma le faatinoina o tiute mo le malu puipuia o le ola ma le saogalemu o tagata uma.

 

“O outou o fofoga o le malo i totonu o nu’u ma itumalo ta’itasi. E taua tele la outou galuega, e tatau fo’i ona faatino la outou galuega ma le faamaoni,” o le saunoaga lea a Mauga.

 

Na taua e Mauga i lana saunoaga nisi o faafitauli ua maitauina i totonu o afioaga i le taimi nei, e le gata i tupulaga talavou ua le mafai ona faatonutonu amioga le tau pulega i le ‘ava malosi ma isi amioga, ae oo lava foi i fualaau faasaina ua maitauina le faatupulaia. 

 

Na taua e le afioga i le Maoputasi le toatele o tupulaga ua aafia o latou olaga i le ‘ava malosi ma fualaau fa’asaina, ae o le tele lava o nei aafiaga e afua mai lava i totonu o afioaga. Na fautuaina e Mauga ali’i Mautofi ina ia mataalia i le faatinoina o latou tiute ma ia mautinoa e le seetia i latou i le malu o le tai taeao i aafiaga o nei faafitauli.

 

“Afai tou te silafia o loo tutupu faafitauli nei i o outou afioaga ma itumalo, faatino la outou galuega na mafua ai ona faatauto outou i lenei taeao (taeao o le aso Gafua na te’a nei), faailoa i le Pulega a ali’i ma faipule o afioaga faafitauli faapea, ma faailoa fo’i i malu o le malo mo le faatinoina o a latou tiute faaletulafono,” o le fautuaga lea a le Maoputasi.

 

O le isi mataupu na oo i ai le saunoaga a le afioga i le Failautusi o le Ofisa o Mataupu Tau Samoa, o taimi e oo mai ai faalavelave tutupu faalenatura e pei o galulolo. Sa ia taua e faapea, sa faigofie tausaga e le i mamao atu ona sa ola ma lelei Sailini e logo ai faailoilo i le atunu’u.

 

“O le taimi nei ua faaletonu Sailini, lona uiga o outou lea ua faalagolago i ai le malo mo le saogalemu o tagata uma. Ia outou mata’ala ma manatua o outou o fofoga o le malo i soo se taimi e tutupu mai ai nei faalavelave,” o le saunoaga lea a Mauga.

 

E to’atele ni isi o ali’i Mautofi na fa’aalia o latou lagona fiafia i le Samoa News ona o le avanoa ua filifilia ai i latou e o latou afioaga ma itumalo e fai ma auauna. 

 

Na taua e se tasi o ali’i Pulenu’u e le i finagalo e fa’aalia lona suafa lona lagolagoina o le auala o loo faatino e le malo e faamaonia ai le avea o se tasi ma Faalupega, Pulenu’u poo se Leoleo  nu’u e ala i le faia o suega e faamaonia ai le leai o se aafiaga i fualaau faasaina.

 

Na taua e le ali’i Pulenu’u lea i le Samoa News e faapea, e i ai ni isi o faamatalaga mai isi afioaga ma itumalo i le aafia ai o ali’i mautofi i gaioiga faasolitulafono faapenei, ma faigata ai i le ali’i Mautofi ona fai ona tiute e ala i le momoli lea o le tagata poo aiga o loo aafia i gaioiga nei i luma o le pulega a ali’i ma faipule poo le faafesootai fo’i o le Matagaluega o Leoleo.

 

“O le suega lea e faia e siaki ai le Faalupega, Pulenu’u poo le Leoleo nuu poo ona tagofia fualaau faasaina, o se suega ua talafeagai ma fetaui mo soo se tasi e umia tofi taua nei, ou te matua lagolagoina fo’i lea faiga,” o le saunoaga lea a le Pulenu’u.

 

Sa ia taua atili lona lagolagoina o le i ai o se sootaga vava lalata ma malosi i le va o le Pulenu’u ma le Ofisa o Leoleo, ina ia faigofie ona faafesootai atu i ai mataupu e tutupu mai i totonu o afioaga e aafia ai ma le soliga o le tulafono.

 

E to’alua isi Pulenu’u tuai ua toe filifilia i le tofi na maa le avanoa la te talanoa mai ai i le Samoa News i le mataupu e faatatau i Sailini ma le lapataiga mo galulolo pe a toe tula’i mai i se taimi o i luma.

 

Na taua e se tasi o i laua e Pulenu’u mai le Falelima i Sasa’e e faapea, na te le lagolagoina le auala lea ua faia e le malo e faalagolago tasi ai i le Pulenu’u mo le logoina o le nu’u atoa pe a tula’i mai se faalavelave. 

 

Mo se faataitaiga e pei ona saunoa lea Pulenu’u, afai ae tula’i mai se mafui’e i le leva o le po ma sau ai loa ma le lapataiga mo le galulolo, e le mafai e le Pulenu’u ona ia logoina le nu’u atoa i le taimi lea. E oo foi i le faaaogaina o le logo, e le mafai ona lagona e aiga i le nu’u atoa le logo. I lona lava talitonuga, e tatau lava ona i ai se fuafuaga a le malo mo le toe faaolaina o Sailini, ona fesoasoani atu ai loa lea ma le Pulenu’u e faatino lana galuega o le logo o le nu’u, ina ia mautinoa le saogalemu o tagata uma.