Pago Pago - AMERIKA SAMOA

Ua fa’alauiloa mai e le pulega a le falemai autu a Amerika Samoa (ASMCA), le faamavae o le tamaitai sa faauluulu iai le Ofisa o Tupe a le falemai (Comptroller), le faletua ia Tuli Tone Maugaotega, mai lana galuega, ona o lona le ausia o tulaga fa’ata’atia mo le faatinoga o le galuega.  

O le tali mai lea a le faatonusili o le LBJ, le susuga i le alii fomai ia Dr. Akapusi Ledua, i le Samoa News, ina ua ripotia mai e Maugaotega e faapea, na mafua ona ia faamavae mai i lana galuega, ona o fa’afitauli tulai mai i totonu o le galuega.

Na fa’alauiloa e le ASMCA i sa latou fa’asalalauga, i le aso 27 o Ianuari, 2024, ina ua fesiligia e Maugaotega le mafuaaga o le fa’ate’a o ia, sa le i faigofie le fa’atula’i ese o Maugaotega ma na tele ni avanoa sa tu’uina atu ia te ia, e fa’aleleia ai le faatinoga o ona tiute.

Sa fa’aalia e le ASMCA, e le o so latou masani le fa’alauiloa fa’alauaitele o tulaga e faatatau i a latou tagata faigaluega ae peitai, ua manino mai i le filifiliga a Maugoatega e fa’asoa atu fa’alauaitele lana faamavaega.  Sa ta’ua foi e le ASMCA, sa tu’uina atu ia Maugaotega le avanoa e fa’amavae ai, ae le o le fa’ate’aina mai lana galuega.

I se ripoti mai i le vaega fa’asalalau a le KHJ i lenei mataupu, na faalauiloa ai e Maugaotega i luga o le ea ia lana tusi faamavae lea na fa’ao’oina atu i le tausitupe (CFO) a le LBJ, o Sefania Kaumaitotoya ma na ia ta’ua ai le tu’uina atu e le ASMCA o se filifiliga ia te ia, ma i sona talitonuga, e leai lava seisi faaiuga, seia vagana ai le faamavae mai i lana galuega.

O lenei tusi, e pei ona ta’ua i le lipoti a le KHJ, o lo o ta’ua ai e Maugaotega le tu’uaia o ia i faafitauli tulai mai ona o le CFO, ma ua avea uiga faaalia a le CFO ma tulaga ua fa’aletonu ai le galulue fa’atasi i totonu o le Ofisa o Tupe.

Sa ta’ua e Maugaotega i lana tusi faamavae, lona fa’anoanoa i lana faaiuga ua faia, ae ua mafua ona o faafitauli o lo o tulai mai pea i totonu o le galuega, e ui i le tele o ana fa’asea tusitusia po o le faaleoina o ona mafatiaga sa fa’ao’oina atu i le pulega o le falemai.  Sa fa’aalia foi e Maugaotega, o lona faamavae mai lana galuega, ina ia le toe iai ni fe’ese’eseaiga i le faatinoina o le galuega.

Ae peitai, i se tali mai a le ASMCA, sa fa’aalia ai le leai o ni fa’asea ua o’o atu ia i latou.  E le gata i lea, na fa’alauiloa mai e le pulega a le falemai, le leai o ni uiga faailoga tagata sa faia e faasaga ia Maugaotega, sei vagana le tu’uina ia te ia o se tulaga e ao ona ia ausia, i le faatinoga o ona tiute.  Ae peitai, ua taofi le ASMCA, sa le i mafai e Maugaotega ona ausia ia tulaga, ae ua ia filifili e faamavae mai lana galuega.

Sa fa’alauiloa mai foi e le ASMCA le faatele ona malaga o Maugaotega i fafo mo a’oa’oga, ae peitai, sa le i fa’aalualuina ai i luma le faatinoga o ona tiute, e pei ona molimauina i sasi ma tulaga faaletonu i lana galuega.

Sa lipotia mai e le KHJ i le faaiuga o le tusi faamavae a Maugaotega, lona agaga faafetai i le lagolago a i latou sa o latou galulue faatasi ma mea e tele sa mafai ona ia aoaoina mai i le galuega aemaise ai lana fesoasoani malosi na mafai ai ona fa’ataunuuina o se ‘unqualified opinion audit’ i le 2022.

Sa ta’ua e Maugaotega, o lana galuega ma ana suiga i le paketi o le tausaga tupe o le 2024, a le LBJ, lea o lo o fa’aaogaina nei.  Ae o le paketi sa tu’ufa’atasia e le pulega a le ASMCA, na teena faatolu e le Maota Fono.

Sa faai’uina le fa’aaliga mai i le ASMCA e faapea, e latou te fa’aauau pea ona faamasino a latou tagata faigaluega e tusa ai ma le faatinoga o a latou tiute.  Ma o le a fa’aauau pea ona faamautuina tulaga maualuga e ao ona ausia e le aufaigaluega a le falemai, aua le auaunaina o tagata o Amerika Samoa.

O le 30 aso mai ia Ianuari 23, 2024, sa tatau ona avea ma aso mulimuli a Maugaotega i le galuega, ae peitai, ua lipotia mai e faapea, o lona aso mulimuli i le galuega, o le aso 23 o Ianuari, 2024.