Pago Pago - AMERIKA SAMOA

E ui I se ripoti mai I le Taitai Leoleo, le susuga Pouu’amea Tuaolo Supapo, e faasaga I ni tagata faigaluega a le ASCO lea na aveina e leoleo I le vaiaso ua mavae ona o tulaga I Fualaau faasaina – e leai ma se tasi o le to’afa lenei na molia I se solitulafono.

E tusa ai ma faamatalaga mai I nisi o aiga o nei alii e to’afa sa aveina e leoleo, ma toe tatalaina I tua I le po o le Aso Tofi, ina ua maea le suesueina o I latou I le aso atoa, e le mautonu I latou pe aisea ua faia ai nei saunoaga faalauaitele a leoleo, ae e leai ni moliaga ua faia.

Na ta’ua e le to’alua o se tasi o nei alii faigaluega a le ASCO, pe silia ma le 10 itula o taofiofi e leoleo lona to’alua ae na toe tu’uina o ia e toe fo’I mai I lona aiga, e aunoa ma se moliaga.

I le aso Lulu o le vaiaso ua tuanai, sa ta’ua ai e Supapo, le mauaina o ni Fualaau faasaina I totonu o se taavale leoleo sa I le ASCO Motors, lea na mafua ai ona ave faapagotaina e leoleo ia alii nei e to’afa.

“Ioe ua ave faapagotaina I latou ma molia i solitulafono.  Ma e iai se avanoa e ono molia ai ma nisi tagata,” o le saunoaga lea a le susuga I le Taitai leoleo.  Na ia ta’ua ai, o fualaau faasaina sa mauaina I o latou tagata (e faatatau lea I le aufaigaluega a le ASCO).

Ma e pei ona sa ia faapea mai I le sui a le Samoa News, e le mafai ona ia toe faia seisi faamatalaga e uiga I lenei mataupu, ona o lo’o fa’aauau pea a latou suesuega.

Ae sa faamaonia mai e Supapo I le sui o le Samoa News, na mafua ona osofaia e leoleo ia le ASCO motors, ona o ata ia sa pueina ma faasalalau I luga o upega tafailagi, I fualaau faasaina I totonu o se taavale a leoleo, a’o iai lea taavale i le fale faigaluega a le ASCO.

O lea ata sa salalau i luga o le initeneti I le po o le Aso Lua, ae ua foliga mai ua toe ave’esea. 

Na fesiligia foi e le Samoa News ia le pulega a le ASCO e tusa ai ma sa latou faamatalaga e tusa ai ma le mea ua tupu, ae peitai, na faailoa mai e le pulega a le ASCO, e le o mafai ona fai mai sa latou faamatalaga I lena taimi, ona o lo’o latou feutaga’I ma a latou loia.

Sa toe taumafai le Samoa News mo se faamatalaga atili mai I le Taitai Leoleo e tusa ai ma le le sa’o o faamatalaga mai I lo latou ofisa, ae peitai, sa le’I manuia taumafaiga a le Samoa News.