Ads by Google Ads by Google

Loka e Leoleo i le ave ta’avale ‘ona ae maua ai fualaau fa’asaina

ausage@samoanews.com

O le ave ta’avale o le pikiapu lanu moana lea na taofia e Leoleo i le vaiaso na te’a nei, ona o tu’uaiga i le ave ta’avale ‘ona i luga o le alatele, ua molia nei o ia e le malo i le moliaga mamafa o lona umia fa’asoltulafono lea o vaega o le pauta fa’asaina o le aisa.

 

O le vaiaso na te’a nei na tula’i ai Iopu Livisitone i luma o le Fa’amasinoga Fa’aitumalo mo lana ulua’i iloiloga.

 

O moliaga e 2 ua tu’uaia ai e le malo ia Livisitone e aofia ai le umia fa’asolitulafono o vaega o le pauta fa’asaina o le aisa, o se solitulafono mamafa e mafai ona fa’asala ai se tasi i le toese mai le 5 e oo atu i le 10 tausaga, pe fa’asala foi i le salatupe e mai le $5,000 e oo atu i le $20,000; faapea ai ma le moliaga mama o le ave ta’avale ‘ona, o le vaega A lea o solitulafono mama, lea e mafai ona fa’asala ai se tasi i le toese mo le umi e le silia i le tasi le tausaga, pe fa’asala i le salatupee le silia i le $1,000, poo le fa’asala fo’i i fa’asalaga uma ia e lua.

 

E $5,000 lea vaega tupe lea ua fa’atulaga e le Fa’amasinoga e tatala ai i tua le ua molia. O le aso Lua o le vaiaso fou e faia ai le ulua’i iloiloga o lenei mataupu, i luma o le afioga i le ali’i Fa’amasino ia Elvis P. Patea.

 

TAGI A LE MALO

 

Pe tusa o le itula e 12:10 i le vaveao o le aso 21 o Setema 2019, na maitauina ai e Leoleo sa tiute i luga o le alatele i Tafuna se ta’avale pikiapu lanumoana o alu saoasaoa i luga o le alatele. Sa maitauina fo’i e Leoleo le tifa solo o le ta’avale i luga o le alatele, toeitiiti lava fetoai ma se tasi o ta’avale.

 

O le maitauina ai e Leoleo o lea tulaga faaletonu, na aga’i atu ai loa ma tuli le ta’avalea le ua molia, seia oo ina maua ma taofia loa. Na faailoa e Leoleo ia Livisitone le mafua’aga ua ala ai ona latou taofia lana ta’avale, ona ua masalomia lona tagofia o le ‘ava malosi ao ia faafoeina se ta’avale.

 

Na faia se suega faapitoa a Livisitone e ala i lona savali i luga o le laina ma atagia mai ai, e le pasi le suega na faia e le ua molia, ma faamaonia ai loa le ova o le ‘ava malosi sa ia tagofia.

 

O le mae’a ai ona fa’amaonia o le tagofia e le ua molia o le ‘ava malosi ao ia faafoeina le ta’avale, na taofia ai loa o ia i lalo o le vaavaaiga a Leoleo, ma auina atu i le Ofisa o Leoleo i Tafuna mo isi suesuega faaopoopo.

 

Ina ua taunu’u Livisitone i le Ofisa o Leoleo i Tafuna, na faatonuina loa o ia e Leoleo ina ia sailia lona tino mo ni a’upega poo nis fualaau fa’asaina fo’i. Ma sa maua i ai i le taga o lona ofuvae sa fai se paipa tioata o lo o i ai vaega o le pauta faasaina o le aisa.

 

Ina ua fesiligia e Leoleo le ua molia e tusa ai o le paipa sa maua ia te ia, sa ia taua ai e fa’apea, sa faia le la inugapia ma lana uo i Pava’ia’i, ma tuu atu ai loa e lana uo le paipa tioata o lo o i ai vaega o le pauta fa’asaina o le aisa na te ulaina.

 

Ina ua mae’a ona ia ulaina le paipa, sa ia tago loa ma teu i totonu o le taga o lona ofu o lo o faia, ma le fa’amoemoe e alu ma ia i le fale.

 

Na faia e Leoleo se suega faapitoa i vaega o le pauta sa i totonu o le paipa tioata ma faamaonia ai, o vaega ia o le pauta fa’asaina o le aisa.

 

Na ta’utino atili Livisitone i Leoleo, o lo o i ai fo’i se isi tagi a le malo fa’asaga ia te ia i le umia o fualaau faasaina i luma o le Fa’amasinoga Maualuga. O lea tagi e pei ona taua e Livisitone, na tula’i mai i le masina o Me o le tausaga e 2017.

 

TAGI MUAMUA FA’ASAGA IA LIVISITONE

 

E pei ona taua e le malo i le latou ulua’i tagi fa’asaga i le ua molia e fa’apea, i le masina o Me o le tausaga e 2017, na aga’i atu ai se vaega o Leoleo Suesue e fa’ataunu’u le poloaiga a le Fa’amasinoga, e saili ai le fale ma le ta’avale a le ua molia, ina ua masalomia lona a’afia i le tulei atoa ai ma le fa’atauina atu o fualaau fa’asaina i tagata lautele.

 

O le mae’a ai ona faatinoina e Leoleo o le poloaiga e saili ai le fale a le ua molia, na faila ai loa e le malo moliaga mamafa e 4 fa’asaga ia te ia. O ia moliaga e aofia ai le moliaga o le umia faasolitulafono o le pauga o le aisa; umia faasolitulafono o le aisa ma le fa’amoemoe e faatau atu i isi tagata; umia faasolitulafono o le laau faasaina o le mariuana; faapea ai ma le umia faasolitulafono o mariuana ma le fa’amoemoe e fa’atau atu i isi tagata.

 

I  le taimi o le osofaiga e pei ona taua e le malo i le latou tagi, o lo o tu’uaia ai le maua e Leoleo o fualaau fa’asaina faapea ai ma mea e fa’aaoga mo le faatauina atu o fualaau fa’asaina, i se tama’i fale tu’ufua o lo o pito i tua o le fale e nofo ai Livisitone ma lona aiga.

 

Na taua e le malo e fa’apea, i se taimi o le masina o Oketopa o le tausaga e 2016, na faailoa atu ai e se molimau fa’atuatuaina (CI) i Leoleo ni fa’amatalaga e lagolagoina ai le a’afia o Livisitone i le pisinisi o le fa’atauina atu lea o fualaau fa’asaina o le aisa ma mariuana i tagata lautele.

 

Na taua e le molimau fa’atuatuaina lea i Leoleo e fa’apea, o le isi tagata e suafa ia Lami Amosa, o ia lea o lo o fesoasoani ia Livisitone i le tulei atoa ai ma le fa’atauina o fualaau fa’asaina o le aisa ma le mariuana mai le fale o Livisitone. O isi taimi e fa’aaoga ai le ta’avale a Livisitone e kiliva ai fualaau fa’asaina i tagata e le mafai ona oo atu i le fale a le ua molia e piki mai ai a latou oka.

 

Na taua atili e le molimau i Leoleo e fa’apea, o ia le isi tagata e masani ona alu ma fa’atau mai ana fualaau fa’asaina mai le fale o Livisitone i Tafuna. O isi taimi e pei ona taua e le molimau, e fa’aaoga ai e Livisitone lona tama’i fale i le pito i tua o lona fale tele e tulei ma fa’atau mai ai fualaau fa’asaina, ina ia aua ai ne’i iloa e lana fanau gaioiga o lo o ia faia.

 

O le to’atele o tagata fa’atau, fa’atoa o lava i le fale a Livisitone i le po mo le pikiina mai o a latou oka, o le mafua’aga lena e ala ai ona to’atele tagata ma ta’avale e aga’i atu i lea fale i aso uma o le vaiaso.

 

O le mae’a ai ona tauaao e Leoleo o fa’amatalaga mai le molimau fa’atuatuaina, na faatulaga ai loa se gaioiga e ala i le tuli e Leoleo o le molimau fa’atuatuaina e fa’atau mai ni fualaau faasaina mai ia Livisitone i le tau e $50.

 

Sa maitauina uma e Leoleo le taimi na aga’i atu ai le molimau fa’atuatuaina i le fale a le ua molia mo le pikiina mai o le oka, atoa ai ma le tuuina atu o le tupe i le lima o Livisitone.

 

O fualaau fa’asaina na fa’atau mai e le molimau fa’atuatuaina mai le fale a Livisitone, na tuuina atu uma i Leoleo. Na talosagaina e Leoleo se faatanaga mai le Fa’amasinoga e su’e ai le fale a le ua molia ma lana ta’avale.

 

O le masina o Me o le tausaga e 2017, na osofaia ai loa e Leoleo le fale a le ua molia ma lana ta’avale, ma latou maua ai se vaega tele o fualaau fa’asaina, o tupe, faapea ai ma mea e fa’aaoga e i latou o lo o tulei ma fa’atau atu fualaau fa’asaina.

 

E $25,000 le tupe na totogi e Livisitone e tatala ai o ia i tua i le mataupu lea. O le aso 21 o Me o le tausaga e 2021 lea ua faatulaga e faia ai le fa’amasinoga autu o lenei mataupu.