Ads by Google Ads by Google

Loka i le faaoolima ae maua ai e Leoleo fualaau fa’asaina


[ata: SN]
ausage@samoanews.com

Pago Pago, AMERIKA SAMOA -  E 37 tausaga o se ali’i mai Tafuna na pu’e faapagota e Leoleo i le 2 vaiaso talu ai ona o tu’uaiga i lona faaoolima lea i se isi tagata ae maua ai e Leoleo fualaau faasaina i totonu o se tama’i ato sa i totonu o le taga o lona ofu. Ina ua fesiligia e Leoleo le ali’i o Faalanu Reupena e faatatau i fualaau faasaina na maua ia te ia, sa ia ta’utino ai, o fualaau fa’asaina na faatau mai i se tasi o alii o loo ia tulei ma faatau atu fualaau faasaina i Vaitogi.

 

O le aso 24 o Me i le itula e 6:30 i le afiafi na talosagaina ai e se Tina matua le Ofisa o Leoleo i Tafuna mo se fesoasoani, ona o lana tama e 34 tausaga le matua ua manu’a tigaina lona tino ina ua fasi e se alii sa la inupia fa’atasi i le fale o se tasi o laua uo.

 

O manu’a na aafia ai le alii na lavea e aofia ai se foa i lona ulu e tusa ma le 9 senitimite le umi, lea na mana’omia ai filo e 7 se su’i ai le foa ina ia mafai ai ona toe tapuni e pei o le tulaga sa i ai.

 

E toatele Leoleo na tali atu i le valaau ma maua ai le avanoa e talanoa ai i le Tina na valaau atu i le Ofisa o Leoleo. Sa vaaia fo’i e Leoleo se ali’i o loo saofa’i i luga o le nofoa i luma o le fale o le Tina, ma se solo o loo ufi ai lona ulu. Na iloa mulimuli ane, o le ali’i lea na aafia i lenei mataupu. 

 

Na taua e le Tina i Leoleo, o ia sa alu i le talanoaga a le latou aiga, ae na faateia o ia ina ua tamo’e atu lana tama teine (granddaughter) ma ta’u atu ia te ia ua foa le ulu o Matthew (o lana tama) na ta e Lanu i le u’amea i le taimi o le latou inugapia. 

 

O Lanu e pei ona taua e le Tina i lana faamatalaga, o le isi lea igoa o le Faalanu Reupena, le alii ua molia i lenei mataupu. A o talanoa Leoleo ma le Tina, o le taimi fo’i lea na taunu’u atu ai le ta’avale a le EMS ma momoli atu ai loa le alii na aafia i le Falema’i i Faga’alu mo togafitiga, ona o le tulaga matuia o le manu’a o loo aafia ai lona ulu, atoa ai ma lona mata agavale o loo fula.

 

Na taua atili e le Tina i Leoleo e faapea, sa faigaluega lana tama, na te le i iloaina foi le taimi na manava mai ai o ia. Ae na faateia o ia ina ua alu atu le feau e sau o Matthew ua foa na ta e Lanu i le u’amea.

 

Na aga’i atu Leoleo i le fale o Reupena mo se avanoa e faatalanoa ai o ia e uiga i lenei mataupu, peita’i na fiu Leoleo e saili le ua molia ua le maua, o lea na toe fo’i ai loa i le Ofisa. I le tuana’i ai o itula e 3 talu ona tuana’i le fa’alavelave, ae ulufale atu loa le alii na aafia ma lona Tina i le Ofisa o Leoleo i Tafuna mo le faatalatalanoaina atili o le mataupu. 

 

Na taua e le alii na aafia e faapea, o laua ma lana uo sa fai le la inuga i le Fale Inisinia a lana uo i Tafuna talu mai le itula e 4:00 i le afiafi. Pe tusa o le itula e 5:30 i le afiafi lava lea ae la vaaia loa Reupena ua momoli atu e le ta’avale a le latou Kamupani, na alu atu ma katuni apa pia o le Busch Ice ma latou inu faatasi ai lava. 

 

Pe tusa o le itula ma nai minute talu ona latou inu ma Reupena, ae faateia loa o ia i le fesili atu o Reupena ia te i laua, poo ai o laua lea na faasalalauina le tala i le latou pitonu’u o ia (Reupena) lea e tuleia ma faatauina atu aisa ma mariuana i tupulaga o le latou pitonu’u.

 

Na taua e le alii na aafia le faateia o ia ina ua tu’i e Reupena lona mata agavale ma palasi ai i lalo. A o taatia i lalo ua tau pogisa lana vaai, na ia faalogoina le tau o kiki a Reupena i lona papatua ma lona manava. Na ia taumafai e tu i luga e sola ese peita’i na faateia o ia ina ua tau se ta malosi i lona ulu ma palasi ai loa i lalo ua matapogia. 

 

E te’i ane o lo o taumafai le to’alua o lana uo lea sa latou inu i lona fale e fui o ia i le fagu vaiaso ma tau too too le foa i lona ulu. 

 

Na fesiligia e Leoleo isi molimau e to’alua sa i ai i le taimi o le fa’alavelave, ma la faamaonia ai le faamatalaga a le alii na aafia. Na taua e le isi molimau e faapea, a o taumafai le na aafia e tu i luga, na ia vaaia le savali atu o Reupena ma aumai le u’amea sa i tua o le keli o le pikiapu sa paka i totonu o le Fale Inisinia ma sasa ai le ulu o le alii na aafia.

 

Ae na taua e le isi molimau i Leoleo lona faalogoina o Reupena o faapea lana faamatalaga, “O le iuga lea o le tagata faitala pepelo o le malepe o le ulu i le uamea.”

 

O le po o le aso lava lea na tula’i mai ai le faalavelave pe tusa o le itula e 11:31, na pu’e faapagota ai loa e Leoleo ia Reupena mai le fale o se tasi o ana uo, lea na maua atu o loo inupia mai ai. 

 

A o le i auina atu Reupena i le Ofisa o Leoleo mo le faatalatalanoaina o lenei mataupu, na muamua su’e e Leoleo lona tino mo ni fualaau faasaina poo ni aupega mata’utia. Na saili e Leoleo le taga o le ofu a Reupena sa faia ma maua i ai se paipa tioata o lo o i ai vaega o le pauta paepae. 

 

Na faia se suega i vaega o le pauta paepae na maua i totonu o le paipa tioata sa ia Reupena ma faamaonia ai, o vaega ia o le pauta faasaina o le aisa. 

 

Na maua ai fo’i e Leoleo se pepa iila laititi o loo i ai ni sikaleti se 2 ua uma ona taai. O ia sikaleti na faia i ai se suega ma faamaonia ai, o sikaleti mariuana. 

 

Ina ua fesiligia e Leoleo ia Reupena e uiga i le mataupu e pei ona manu’a ai Matthew, sa ia faamaonia ai lona faaaoga o se uamea e faaoo ai manua i le alii na aafia, ona o lona ita tele i le alu ma faasalalau tala pepelo fai mai o ia lea e faatauina atu aisa i le nu’u. 

 

Ae ina ua fesiligia i fualaau faasaina sa maua ia te ia, na tali ai Reupena e faapea, o fualaau faasaina na faatau mai i le tagata tonu lava lea na te faatauina ma tulei fualaua faasaina i le nu’u, o le tagata e igoa ia “MAC”.

 

O le vaiaso na te’a nei na tulai ai le na aafia i luma o le Fa’amasinoga Faaitumalo. 

 

Ua molia Reupena e le malo i le moliaga e tasi o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o le laau faasaina o le mariuana, o solitulafono mamafa e mafai ona faasala ai se tasi i le Toese mai le 5 e oo atu i le10 tausaga, pe faasala foi i le salatupe e oo atu i le $20,000 le mamafa, poo le faasala fo’i i faasalaga uma ia e lua. O lo o molia foi Reupena i le moliaga e tasi o le faaoolima i le tulaga e 2, o le vaega D lea o solitulafono mamafa, lea e mafai ona faasala ai se tasi i le toese mo le umi e oo atu i le 5 tausaga, pe faasala foi i le salatupe e oo atu i le $5,000, faapea ai ma moliaga mama e 2 o le faatupu vevesi i nofoaga faitele atoa ai ma le faaleaga meatotino i le tulaga tolu.

 

E $20,000 le vaega tupe lea ua fa’atulaga e tatala ai i tua le ua molia. Afai ae tatala o ia i tua, e le mafai ona ia toe faafesootaia molimau a le malo e aofia ai le na aafia, e le mafai fo’i ona ia toe umia ni aupega mata’utia, a ia avea o ia ma tagatanu’u lelei e tausisi i tulafono a le malo.

 

O le aso Faraile o le vaiaso nei lea ua faatulaga e faia ai le ulua’i iloiloga o lenei mataupu.