Pago Pago - AMERIKA SAMOA

E tusa ai ma fa’amaumauga a leoleo, ua lokaina se alii e 23 tausaga le matua, ina ua ripotia mai o ia e lona tina, i lona fa’ao’olima i lona ‘nephew’ e ono tausaga.

O fa (4) ni moliaga ua fa’asaga i lea alii talavou, e aofia ai;

Faitauga 1:  Faatupu Vevesi i totonu o le aiga (Sauaga i totonu o aiga) – o se vaega ‘C’ o solitulafono mama, e mafai ona faafalepuipui ai i le o’o atu i aso e sefululima (15), po o se sala tupe e $300; po o faasalaga uma e lua.

Faitauga 2:  Fa’ao’olima i lona tulaga e tolu (Sauaga i totonu o aiga) – o se vaega ‘A’ o solitulafono mama, e mafai ona fa’afalepuipui ai i le o’o atu i le tausaga (1), po o se sala tupe e $1,000; po o faasalaga uma e lua.

Faitauga e 3:  Fa’atupu Faalavelave i totonu o Aiga (Sauaga i totonu o aiga) – o se vaega ‘C’ o solitulafono mama, e mafai ona faafalepuipui ai i le o’o atu i aso e sefululima (15) po o se sala tupe e $300; po o faasalaga uma e lua.

Faitauga e 4:  Faaleagaina o mea totino i lona tulaga e tolu (Sauaga i totonu o aiga) – o se vaega ‘B’ o solitulafono mama, e mafai ona fa’afalepuipui ai i le o’o atu i masina e ono, po o se sala tupe e $500; po o faasalaga uma e lua.

E $500 se vaegatupe sa faatulagaina e tatalaina ai le ua molia, mai i le falepuipui e faatalitali ai lona faamasinoga.

(O le a le lomia e le Samoa News ia suafa o i latou o lo’o a’afia i lenei mataupu, ona o le puipuiga o fanau iti.)

E tusa ai ma fa’amaumauga a le malo, o le aoauli o le aso 30 o Iulai, na fa’afeso’ota’i ai e se tina ia le Ofisa Leoleo i Tafuna, e ripotia ai sona alo lea ua molia, i le fa’ao’olima i sona ‘grandson’ ma fa’aleagaina le latou televise, e ala i le tipiina o le uaea.

Ina ua taunu’u leoleo i le nofoaga na tupu ai le faalavelave, sa o latou feiloai ai ma le tina o le ua molia.  Sa fa’asino ifo iai e le tina ia le potu o le ua molia, ma e ulufale atu leoleo i lona potu, o lo’o taoto mai ai le alii ua molia.

Sa lokaina e leoleo ia lima o le ua molia.  Ae o latou talatalanoa ma le tina sa valaau atu i le ofisa a leoleo.

Na faamatala e le tina e faapea, sa nofonofo o ia i totonu o le potu moe, ae ona lagona mai le palauvale a lana tama i sana ‘granddaughter’ e 12 tausaga ma fa’afefe i le po.   Sa ta’ua e le tina le faatonuina e lana tama o lana ‘granddaughter’ e fai le mea o lo’o faatonu ai o ia.  Ma sa lagona foi e le tina ia le lauina e lana tama o si ana ‘granddaughter’ i ni igoa ese.

Na ta’ua e le tina lona oso mai loa ma taumafai e taofiofi le gaioiga a lana tama ma fai atu iai, e alu e fufulu ipu ma tapena le umukuka.  Ae peitai, sa fa’aauau pea ona ‘e’e ma palauvale le ua molia, ma i’u ai lava ina ona po ina ia tua o le ulu a lana ‘grandson’  e ono (6) tausaga.

Sa faamatalaina e le tina le tupu so’o o fa’afitauli i totonu o le latou aiga, ona o le ua molia.  Ina ua pu’eina e leoleo ata o le televise, sa ta’ua e le tina, e na te le iloa le tau o le televise.

Na fa’atalanoaina foi e leoleo ia le atalii laititi lea na a’afia i lenei fa’alavelave ma sa ia faamatalaina le po ina o lona ulu e lona ‘uncle’ (lea ua molia).  Ma sa faamatalaina foi e le teineititi 12 tausaga le faatonuina o lona ‘uncle’ (le ua molia), e lona tina matua, e alu e fufulu ipu ma fa’amama le umukuka, ae liliu mai lona ‘uncle’, i le faatonu o ia (teineititi) e alu e fufulu ipu.

Ae ina ua musu le teineititi 12 tausaga, sa faapea loa ona palauvale iai le ua molia ma taumafai e fasi o ia, ae peitai, sa taofi e lona tina matua.

Na faamatala foi e le teineititi, ina ua savali ese le ua molia, sa tamo’e atu iai lona tuagane laititi e fa’afeiloai, ae tago le ua molia, i le po.

Ina ua mae’a ona fa’atalanoaina e leoleo ia le aiga, sa faapea loa ona malaga ese ma ave le ua molia.  Ma ina ua faatalanoaina o ia i le Ofisa a Leoleo i Tafuna, sa fa’amaonia e le ua molia lona fa’ao’olima i lona ‘nephew’ e ono tausaga, ona o lona ita i lona tina.

Sa fa’apea foi ona fa’amaonia e le ua molia lona ‘e’e ma lona palauvale, ona o lona le fiafia i lona tina.