Pago Pago - AMERIKA SAMOA

I le taimi na pu’e faapagota ai e leoleo se alii i lona faaoo o ni manu’a tuga i se alii o lo’o taofia nei i le falemai i Faga’aalu, sa alia’e ai i su’esu’ega a Leoleo, le iai o se Tusi Saisai mai i le faamasinoga i le tausaga ua te’a, mo le ali’i o Tafa Vaega, ona o tu’uaiga i lona faia o uiga mataga i se tamaitai e 16 tausaga le matua.

O le faalavelave lea ua toe molia ai nei Vaega i le Tulafono, sa tula’i mai I Nu’uuli i le masina na se’i mavae atu nei.

Ao le i auina atu Vaega i le Ofisa o Leoleo i Tafuna mo suesuega, na maua ai e Leoleo i le taga o lona ofu se pepa iila laititi o loo i ai lau mamago o le laau faasaina o le mariuana. 

Ina ua fesiligia e Leoleo le ua molia e uiga i lenei pepa iila, na tali le ua molia, o le pepa iila na avatu e lana uo ia te ia, ona tago lea ua tuu i totonu o lana taga ina ua aga’i atu Leoleo i lona fale.

O lenei mataupu na tofu atu i le Ofisa o Leoleo i Tafuna, ina ua talosagaina e se Tina se fesoasoani a Leoleo, faasaga i le faalavelave lea na manu’a ai lona to’alua ua faaoolima i ai se isi ali’i o le latou lava aiga.

Ina o aga’i atu leoleo i le nofoaga na sau ai le valaau mo se fesoasoani, na fa’afetaui mai i latou e se ali’i, ma fa’ailoa atu i leoleo, o ia tonu lava lea na faatinoina le fa’alavelave e pei ona manu’a ai le to’alua o lona tausoga, ina ua ia faaaoga se tama’i naifi e tui ai lona papatua ma lona tau’au.

O le taimi lea na taofia ai loa le ua molia i lalo o le vaavaaiga a Leoleo, a o faagasolo malie le latou suesuega e uiga i le faalavelave sa tupu. 

O se Leoleo Sinia sa i ai i le vaega o Leoleo na tali atu i le fa’alavelave, na faigofie ona ia manatuaina foliga o le alii o Vaega ma ia iloa ai, o le tagata tonu lava lea o lo o tau sailia i le fa’alavelave lea na tula’i mai i le tausaga na te’a nei, ina ua ia taumafai e faamalosi se tama’ita’i e 16 tausaga le matua.

Na taua e se molimau i Leoleo e fa’apea, sa latou auai faatasi ma i laua e to’alua na aafia i lenei mataupu i se ta’aloga fa’aafu o le afiafi. Ina ua mae’a le ta’aloga fa’aafu, na latou toe savavali faatasi uma fo’i i le fale, peita’i, sa i ai ni tala faaulaula na latou faia aga’i i le alii ua molia, na mafua ai ona ita o ia.

O nisi o ia tala faaulaula e aofia ai le latou tuuaia o le alii ua molia i lona tolotolo i le fale o le latou Faifeau i le 2 vaiaso talu ai. 

Sa i ai le taimi na leai ai se isi e toe faia se tala faaulaula aga’i i le alii ua molia, peita’i o le alii ua manu’a, sa le’i malolo o ia, ae sa fai fai pea lana amio o le fai o tala ula aga’i i le alii ua molia, ma avea ai loa ma itu na ita ai loa le ua molia ma ia folafola lona fasiotia o le tagata e toe lafo atu se tala ia te ia.

Na taua atili e le molimau i Leoleo e fa’apea, e leai se isi na manatu e tula’i mai se faalavelave i lea afiafi, aua na latou taape faatasi uma lava ina ua oo mai le taimi o faiga lotu o le afiafi, na latou vaaia fo’i le aga’i atu o Vaega i lona fale, aga’i atu fo’i le alii na aafia i lona fale. Pe tusa o le afa itula talu ona latou taape ae faafuase’i ona salalau le tala o le latou uncle (le ua manu’a) lea ua faanatinati atu i le falema’i ina ua ta tui e le ua molia i se tama’i naifi.

Na maua le avanoa e fesiligia ai e Leoleo lea ua molia e uiga i lenei mataupu, ma ia ta’utino ai lona fa’aaoga o se tama’i naifi fai mea’ai e ta tui ai le papatua ma le tau’au o le alii na aafia (le to’alua o lona tausoga tama’ita’i).

Na taua e le ua molia i Leoleo le tiga o lona loto, i le tele o tala faaulaula na fai atu e le alii ua manu’a ia te ia, o le mafua’aga lea na ia manatu ai o le a ia fasiotia o ia e taui ai le tiga o lona loto. 

A o ia nofonofo na o ia i totonu o lona tama’i fale, sa ia faalogoina le alii na aafia o loo aga’i atu i lona fale. Na te le i toe faatali i le taimi lea, ae na ia tula’i loa i luga ma savali i tua i le umukuka ma vaai mai ai se tama’I naifi fai mea’ai maai lava sa i ai.

O le taimi lava na latalata mai ai le ua aafia i lona fale, na ia tula’i atu ai loa i luga ma tui o ia i le naifi. Na vave le faatafa a le ua manu’a ma aafia ai lona tau’au i le naifi. Sa ia toe sasau le isi tui peita’i o le taimi lea na ia vaaia ai le tamo’e i le atoa a le na aafia, ma manu’a ai loa lona papatua.

I le mataupu o le faia o uiga mataga i se tamaitai e 16 tausaga le matua, sa ioeina e le ua molia lona faia o ia uiga mataga I le na a’afia I lenei mataupu, e ala i lona ulufale i le potu moe o lea tamaitai ma nai ona tei laiti e to’alua, ma ia taumafai e faamalosi lenei tamaitai.  

Sa ta’ua fo’i e le tamaitai na a’afia i lenei mataupu, e faalua ona taumafai Vaega e faia ni uiga mataga ia te ia.

O le lua vaiaso talu ai, na tula’i ai le ua molia i luma o le Fa’amasinoga.  E lua (2) tagi ua faila e le malo fa’asaga ia te ia. 

I le Tagi Muamua, o lo o tu’uaia ai Vaega i le moliga o le umia faasolitulafono o vaega o le laau faasaina o le mariuana, o se solitulafono mamafa e mafai ona faasala ai se tasi ile Toese mai le 5 tausaga e oo atu i le 10 tausaga, pe faasala i le faasalaga tupe e oo atu i le $20,000, pe faasala fo’i i faasalaga uma ia e 2.

Ua molia foi lenei alii i le moliaga o le Faao’olima i le tulaga e 2 ma le Faaleaga Meatotino, i le tulaga muamua; o se vaega o solitulafono mamafa, lea e mafai ona faasala ai se tasi i le Toese mo le umi e oo atu i le 5 tausaga, pe fa’asala foi i le salatupe e oo atu i le $5,000, poo le fa’asala fo’i i fa’asalaga uma ia e 2.

Atoa ai ma moliaga o le Faaoolima i le tulaga 3, o le vaega lea o solitulafono mamafa, e mafai ona faasala ai se tasi i le Toese mo le umi e oo atu i le tasi le tausaga, pe faasala i le salatupe e mafai ona oo atu i le $1,000, pe faasala fo’i i faasalaga uma ia e 2.

I le Tagi lona Lua a le malo, o lo o tu’uaia ai le ua molia i le faia o amioga faasotoma; tasi le moliaga o le faia o uiga mataga faafeusuaiga; tasi le moliaga o le tagofia o itutinosa o se tama’ita’i e talavou i lalo o le tulafono, o vaega ia o solitulafono mamafa, e mafai ona faasala ai se tasi i le Toese mo le umi e oo atu i le 7 tausaga, pe faasala i le salatupe e oo atu i le $5,000, pe faasala foi i faasalaga uma ia e 2.

Atoa ai ma le moliaga e tasi o lona faia o Amioga e Lamatia ai le Saogalemu o Fanau Laiti, o le vaega o solitulafono mamafa, lea e faasala ai se tasi i le Toese mo le umi e oo atu i le tasi le tausaga, faasala i le salatupe e oo atu i le $1,000, pe faasala fo’i i faasalaga uma ia e 2.

Talu ai tulaga matuia o tu’uaiga faasaga i le alii ua molia, ua mafua ai ona taofia o ia i le Toese e aunoa ma se tupe e totogi.

O le vaiaso fou lea ua faatulaga e faia ai le ulula’i iloiloga o lenei mataupu i luma o le Fa’amasinoga.