Pago Pago, AMERIKA SAMOA

O le masina na te’a nei na tula’i ai le susuga ia Faasoo Mapu i luma o le Fa’amasinoga Faaitumalo mo lana ulua’i iloiloga, I tagi e lua a le malo ua faila faasaga ia te ia.

I le tagi muamua, ua molia ai Mapu i le moliaga o le umia faasolitulafono o vaega o le pauta faasaina o le aisa, faapea ai ma le moliaga o le umia faasolitulafono o le laau faasaina o le mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, po o le faasala i le salatupe e mafai ona oo atu i le $20,000, po o le faasala i faasalaga uma e 2.

I le tagi lona lua faasaga ia Mapu, ua tu’uaia ai o ia i le faaoolima i le tulaga lua, lea e mafai ona faasala ai se tasi i le Toese mo le umi e oo atu i le 5 tausaga, pe faasala i le salatupe e oo atui le $5,000, po o le faasala i faasalaga uma ia e 2.

E $15,000 lea ua fa’atulaga e tatala ai i tua Mapu. Afai ae tatala o ia i tua, ua faasaina o ia ona toe faafesootai I molimau a le malo, e aofia ma le alii na ia sauaina I le amataga o le tausaga, ma ua faatonuina o ia e le faamasinoga, ina ia auai I taimi uma e valaau ai lana mataupu I luma o le Faamasinoga, ma aua ne’I toe solia se Tulafono a le malo.

TAGI A LE MALO 

E pei ona taua e le malo i le latou tagi e fa’apea, o le masina na te’a nei na taofia ai e ni leoleoi sa tiute i luga o le alatele i Tafuna se ta’avale na vaaia le saoasaoa mai maila faatulagaina i luga o le alatele.

sa maitauina e leoleo sa faatuina le taavale, e toatolu isi tagata sa I totonu o le taavale, na aofia ai ma Faasoo Mapu, ma seisi alii na mulimuli ane, molia I le tagofia o le ‘ava malosi ae le’I atoa le 21 o tausaga.

A o talanoa Leoleo i le ave ta’avale ma faailoa i ai le mafua’aga ua ala ai ona taofia lana ta’avale, na maitauina e Leoleo le feminoia’I solo o Mapu ma taumafai e tago I le taga o lona ofu.  Na fesiligia e leoleo Mapu pe o iai se mea o tupu, ae tali le ali’I, e leai.

A’o faagosolo pea ona talanoa leoleo ma le avetaavale, sa maitauina pea le le manofo lelei o Mapu ma avea ai ma tulaga na faapopolegia ai leoleo po o umia e Mapu se a’upega e ono lamatia ai lo la saogalemu.

Na faatonu e Leoleo ia Mapu e sau i fafo ma le ta’avale peita’i na musu Mapu. Na toe faatonu faalua e Leoleo Mapu ae na tumau pea lava le musu o le ua molia, o le mafua’aga lea na fetagofi atu ai loa Leoleo ma tatala le faitotoa ae toso mai i fafo Mapu mai le ta’avale, loka ona lima ae tu’u i totonu o le ta’avale a Leoleo, ona toe faaauau lea o le talanoaga ma le ave ta’avale. 

A o le i tuuina atu Mapu i totonu o le ta’avale Leoleo, na siaki muamua lona tino po o ia umia ni a’upega. I totonu o le taga o lona ofu sa laei, na maua ai e Leoleo ni tamai taga pepa iila o lo o i ai vaega o lau mamago o le maliuana. Sa maua ai fo’i e Leoleo se paipa tioata o lo o i ai vaega o le pauta faasaina o le aisa.

Na faatonu fo’i e Leoleo i latou e to’atolu sa i totonu o le ta’avale ina ia agai mai i fafo, ma maua ai le avanoa e siaki uma ai e Leoleo tino o i latou nei mo ni aupega. E leai ni a’upega po o ni fualaau faasaina na maua i le isi vaega e to’atolu na aofia ai ma le ave ta’avale. 

Na auina uma i latou nei e to’afa i le Ofisa o Leoleo i Tafuna mo suesuega. Na maua e leoleo ni apa pia ua mae’a ona tatalaina I totonu o le taavale, faapea se papa tioata sa I ai ni vaega o le pauta faasaina o le aisa, lea sa nanaina i le faitoto’a na nofo ai le ali’I talavou. 

Ina ua fesiligia le ave ta’avale e uiga I apa pia, sa ia ta’u atu I leoleo, o pia a le alii talavou lea e 20 tausaga le matua.  Sa faamaonia lea faamatalaga e le alii talavou.  Ae ina fesiligia le ali’I talavou e uiga I paipa tioata, sa ia faamatalaina I leoleo, ina ua faatu e leoleo le latou taavale, sa te’I I le tu’u atu e Mapu o le paipa tioata ia te ia ma faatonu o ia e nana I le faitoto’a.

Ina ua fesiligia e Leoleo ia le ave ta’avale ma le isi pasese o le ta’avale, na faamaonia ai e i laua ia e to’alua, o Mapu e ana fualaau faasaina sa maua i totonu o le ta’avale. 

A o faagasolo suesuega a Leoleo na latou maua ai se tusi saisai na sainia e le Faamasinoga i le masina o Ianuari o le tausaga nei, e pu’e faapagota ai Mapu, ona o se fa’alavelave sa ia faaaoga ai se u’amea e faaoo ai manu’a i se isi ali’i.

Ina ua fesiligia e Leoleo ia Mapu e uiga i fualaau faasaina na maua i le taga o lona ofu sa ia ioeina, o ia e ana  fualaau faasaina sa maua i le ta’avale.

Sa ia taua e faapea, ina ua taofi e Leoleo le latou ta’avale, sa popole lona mafaufau, e le gata o lo o ia te ia fualaau faasaina, ae o lo o i ai fo’i se faalavelave na aafia ai o ia i le amataga o le tausaga, ina ua ia faaaoga se u’amea e faaoo ai manu’a i se isi ali’i.

TAGI O LE FAAOOLIMA FAASAGA IA MAPU

O le po o le aso 23 o Ianuari 2020 na valaauina ai le Ofisa o Leoleo i Tafuna mo se fesoasoani, ona o se ali’i na manu’a tigaina lona ulu ina ua ta e se isi alii i se u’amea. Na taunuu Leoleo i le nofoaga na tula’i mai ai le faalavelave ma faamaonia mai ai e tagata sa i ai i le fiafia o le Aso Fanau, o le ali’i o Faasoo Mapu na ia fa’aaoga se uamea e faaoo ai manu’a i le ulu o le ali’i na aafia.

Na fiu Leoleo e tau saili Mapu, ua le toe maua lava. 

Ina ua fesiligia e Leoleo ia Mapu e faatatau i le faalavelave lea na ia faaoolima ai i le ali’i na manu’a, na ioeina ai e Mapu tu’uaiga faasaga ia te ia. 

Na taua e Mapu e faapea, o le alii na manu’a na mafua ai le vevesi ina ua faatonu e le alii lea o ia e alu ese ma le vaega o loo paka ai ta’avale. O lona ita i le ali’i lea na mafua ai loa ona savali i tua o le fale ma uu mai ai le fasi u’amea sa pipi’i i le pa, ma savali atu loa ma sasa ai le ulu o le ali’i na aafia ma manu’a ai.

Na taua e le ali’i na aafia i Leoleo, na mafua ona ia fai ia Mapu e alu ese ma le vaega sa paka ai ta’avale, ona sa ia vaaia le taumafai o Mapu e talepe se tasi o ta’avale sa paka ai. O ta’avale ia a tagata na valaaulia i le aiga o le Aso Fanau.