Pago Pago - AMERIKA SAMOA

O le po o Ianuari 7, 2025, sa lokaina ai e leoleo ia le susuga ia Matalo Tualevao, ina ua fa’afeso’ota’i e se tasi o lona aiga ia le ofisa a leoleo i Tafuna, ma ripotia ai lona faatupu vevesi i totonu o le aiga, faapea ma le sauaina o lona tina.

Sa agai atu leoleo i le nofoaga na tupu ai le faalavelave ma fa’atalanoaina le tina lea na valaau mai i le ofisa a leoleo ma sa faamatalaina e lenei tina, le tu’ua e Tualevao o le latou fale i le 7:00 i lea afiafi, e o ma ana uo e fai se latou inuga.

Ae i se taimi mulimuli ane, ina ua toe fo’i atu Tualevao, i le fale, sa amata ona ia ‘e’e ma palauvale i tagata o lona aiga.

Sa ta’ua e le tina ia lona fa’atonuina o Tualevao e fa’aeteete i ana upu ona o lo’o iai tamaiti i le fale.  Ae alu Tualevao i fafo o le fale, ma amata ona tau’ai mai le fale i ma’a, lea na fa’ate’ia ai o latou tuaoi ma gasolo mai fafo o latou fale.

Na ta’ua foi e le tina na valaau i le ofisa a leoleo, le tamo’e mai o lona to’alua e taumafai e fa’afilemu Tualevao ae peitai, na liliu atu Tualevao ma palauvale i lona to’alua.

Ina ua fa’atalanoaina e leoleo ia le tina a Tualevao, sa ia ta’ua lona lagonaina o se tasi o ‘e’e i fafo o le latou fale, ae o lo’o ia tapenapena mo malologa o le po.  Sa faamatala e le tina lona tamo’e mai i fafo ma ia va’aia le tina lea na valaau i leoleo, ma lona to’alua, o lo’o taumafai e faafilemu ia Tualevao.

Sa ta’ua e le tina lona oso atu ma fa’atonu Tualevao e soia le pisa ua leva le po, ae lilium ai le alii ma u’una’i o ia i lalo ma faapea mai i le tina matua, e leai sana feau.

O iina na fa’atonu ai e le tina a Tualevao ia le tina sa valaau i leoleo, ina ia fa’afeso’ota’i loa leoleo, ona o lona fefe ina ne’i faia e Tualevao se tulaga ia te ia.

Sa faamatalaina foi e le tina a Tualevao e faapea, e le o se taimi muamua lea ua fa’apisa ai lona alo le latou aiga ma o lo’o iai sona popolega, ua ia tagofia foi fualaau faasaina.  Sa ta’ua e le tina, o aso uma e o ai le tina na valau i leoleo, ma lona to’alua e faigaluega, e fa’aali lava le faigata o Tualevao, e pei o le palauvale atu ia te ia, pe a le faia e le tina ia le mea o mana’o ai.

E le gata i lea sa ta’ua foi e le tina a Tualevao, le lokaina muamua o ia ona o le tulaga lava lea e tasi.

O moliaga na molia ai Tualevao, na aofia ai le Faatupu Vevesi i totonu o le aiga (sauaga i le aiga), o se vaega ‘C’ i solitulafono mama, e mafai ona nofosala ai i le falepuipui i le o’o atu i aso e 15, po o se sala tupe i le va o le $150 ma le $300; po o faasalaga uma e lua.

Faapea ma le moliaga o le Fa’ao’olima i lona tulaga e tolu, o se vaega ‘C’ i solitulafono mama, e mafai ona nofosala ai i le falepuipui i aso e sefululima, po o se sala tupe i le va o le $150 ma le $300; po o faasalaga uma e lua. 

E $300 se vaegatupe na faatulagaina, e mafai ona tatalaina ai le na molia, e faatalitali ai lona faamasinoga.