Ads by Google Ads by Google

Loka se ali’I ua leva na su’e e leoleo I le talepe fale, ae maua ona o le fa’ao’olima


[ata: foa'i]
ausage@samoanews.com

Pago Pago, AMERIKA SAMOA

Ua taofia nei I le toese I Tafuna se ali’I ua leva na saili e leoleo ona o tuua’iga o le talepe fale, I se faalavelave na tula’I mai I Leone I le amataga o le tausaga.  O le masina na te’a nei na fa’ato’a mafai ona pu’eina ma ave faapagota e leoleo le alii o Anesi Tifaga, ona o seisi fo’I solitulafono na a’afia ai.

Sa teenaina e Tifaga ia lona auai I le faalavelave na tupu I Leone, lea na osofa’ia ai se fale o se aiga, ma ave fa’agaoi le tele o mea aoga sa iai.  Sa ia taua i Leoleo e fa’apea, e le o ia o se tagata solitulafono i totonu o lona nu’u.

E pei ona taua e le malo i le latou tagi e fa’apea, i le aso 12 o Iuni 2020, a’o paka le ta’avale a se ali’i Leoleo ofu savili i le Falema’i i Faga’alu, sa ia molimauina ai se tauga upu I le va o se ni ali’I se to’alua.  Ma o se tasi o nei ali’I, ina ua mae’a ona Iloilo le mataupu, o le susuga Tifaga.

Na ta’ua e le alii leoleo sa molimauina le tauga upu, e le i umi ona tau upu alii nei e to’alua, ae ona vaaia loa le tu’i e Tifaga o le Tama na aafia ma palasi ai le Tama lea i lalo. Ao le i faaoolima Tifaga i le Tama na aafia, na muamua po e Tifaga le ali’i laitiiti e 14 tausaga le matua.

Na vaaia le toe tu i luga o le Tama na aafia ma toe savali atu i le vaega o loo tu mai ai Tifaga ma toe faaauau le la talanoaga.  Ona vaaia lea o le savali atu o Tifaga ma oso i lana ta’avale ma alu ese loa.

 Na faigofie ona iloa e le Leoleo ofu savili mai totonu o lana ta’avale le susuga o Tifaga, lea o loo masalomia i le faalavelave lea na osofa’i ai e nisi se fale i Leone.

Na logo e le Leoleo ofu savili le Ofisa o Leoleo i Fagatogo e tusa ai o le fa’alavelave na tula’i mai i le paka  ta’avale i le Falema’i o le LBJ, ma aga’i mai ai loa Leoleo ma taofi le ta’avale a Tifaga i luga o le alatele ae auina atu i le Ofisa mo suesuega.

Na auina atu fo’i e Leoleo le Tama ma lona atali’i na aafia i le Ofisa o Leoleo i Fagatogo mo le faatalatalanoaina o le faalavelave na tula’i mai.

A o le i auina atu Tifaga i le Ofisa o Leoleo i Fagatogo, na siaki e Leoleo lona tino mo ni aupega poo ni fualaau faasaina ma maua ai se tama’i ato uliuli i le taga o lona ofu, na maua ai ni pepa iila e 4. O le 3 o nei pepa iila na maua i ai lau mamago o le laau faasaina o le mariuana, ae o le isi pepa iila e tasi na maua i ai vaega o le pauta pa’epa’e o le aisa.

Na ta’ua e le Tama na aafia, i Leoleo e faapea, na la o ma lona atali’i e piki mai fualaau a lona to’alua o lo o gasegase i le fale. Ina ua la taunuu i le Falema’i, sa ia faatonu lona atalii e faatali atu i totonu o le ta’avale ae sei alu e piki mai fualaau i le Fale Talavai.

Na taua e le Tama e faapea, e o’o mai loa i le vaega e paka ai ta’avale, ae ona vaaia loa le tau o le po a Tifaga i le ulu a lona atalii, sosoo ai ma le una’i e Tifaga o lona atalii, aga’i i le keli o le ta’avale.

Na sosoo lava le vaega na paka ai le ta’avale a le Tama ma lona atalii ma le vaega na paka ai le ta’avale a Tifaga. Na fesiligia e Leoleo le atali’i o le Tama na aafia i le mafua’aga na faaoolima ai Tifaga ia te ia. 

Na taua e le alii talavou e faapea, o ia sa taalo i lana telefoni i le va o le latou ta’avale ma le ta’avale a Tifaga.  Na te le i iloa o lo’o i ai Tifaga i totonu o lana ta’avale. Sa i ai le taimi na ia faalagolago ai i le faitoto’a o le ta’avale a Tifaga, atoa ai ma lona taumafai e solo i ona lima vaega o le tioata o le ta’avale a Tifaga na pipi’i ai palapala.

Na taua e le tamaitiiti le faateia o ia ina ua tatala e Tifaga lana ta’avale ma savali mai i fafo ma e’e leotele atu ia te ia, ma faatonu o ia e alu ese ma lana ta’avale. 

A o taumafai le tamaitiiti na aafia e tatala le faitoto’a o le la ta’avale ma lona Tama ma le faamoemoe e ulufale i totonu, ae faateia o ia ina ua kola atu e Tifaga le ua o lona ofu sa fai sosoo ai loa ma le tau o lana po i lona ulu, faatoa tago ai loa Tifaga ma una’i o ia aga’i i le keli o le pikiapu.

Na faailoa e Tifaga i Leoleo Suesue lona malamalama lelei i ona aia tatau i lalo o le Tulafono, ma ua ia sauni fo’i e talanoa e tusa ai o le faalavelave na tula’i mai.

Na taua e Tifaga lona le fiafia ina ua ia vaaia le taumafai o le tamaitiiti na ia faaoolima ai e tatala le faitoto’a o lana ta’avale. E le i iloa e le tamaitiiti na aafia  o lo’o i ai o ia i totonu o le ta’avale. Na oso a’e ona masalosaloga, o lo o taumafai le tamaitiiti talavou lenei e osofa’i lana ta’avlae, o lea na oso ai loa i fafo ma lana ta’avale ma valaau atu i le tamaitiiti e alu ese ma lana taavale.

E tusa ai ma le faamatalaga a Tifaga i Leoleo, sa palauvale atu le tamaitiiti na aafia ia te ia, o lea na ia po ina ai lona ulu ma toe una’i aga’i i le keli o le pikiapu.

E fetaui le mae’a ona ia faaoolima i le tamaitiiti na aafia ae ona vaaia loa le fotua’i atu o se Tama ia te ia, ma fesiligia o ia i le mafua’aga na ia faaoolima ai i lona atali’i. A o talanoa Tifaga ma le Tama o le tamaitiiti na aafia, na ta’utino Tifaga, sa ia faaoolima i le Tama o le tamaitiiti na aafia e ala i lona tu’i ina o lona gutu.

Ina ua fesiligia e Leoleo Suesue ia Tifaga e tusa ai o fualaau faasaina na maua i le taga o lona ofu, na taua e le ua molia, o fualaau faasaina na aumai i se tasi o ana uo e fa’aaoga e maua ai lona malosi i le taimi e fa’atino ai galuega i lana ma’umaga.

TALEPE FALE I LEONE

Na teena e Tifaga lona aafia i le faalavelave lea na osofa’i ai e tagata se fale i Leone. Na taua e le ua molia e faapea, o ia e nofo i Aua, pe faapefea ona aafia i le gaoiina o se fale i Leone.

O le masina na te’a nei na tula’i ai Tifaga i luma o le Fa’amasinoga Faaitumalo. 

E 2 tagi ua faaulu e le malo ma faasaga ia te ia.

I le tagi muamua, ua molia ai e le malo ia Tifaga i le moliaga e tasi o le gaoi atoa ai ma le moliaga e tasi o talepe fale i le tulaga 2, o le vaega C lea o solitulafono mamafa.

I le tagi lona 2, o loo tu’uaia ai e le malo ia Tifaga i le moliaga e tasi o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o vaega o le pauta faasaina o le mariuana, o ni solitulafono mamafa e mafai ona faasala ai se tasi mai le 10 e oo atu i le 10 tausaga, pe faasala i le salatupe e oo atu i le $20,000; o lo o tu’uaia fo’i le ua molia i le moliaga o le faaoolima i le tulaga tolu, faapea ai ma le moliaga e tasi o le faia o gaioiga e ono lamatia ai soifua o nau laiti, o le vaega A lea o solitulafono mama.