Pago Pago - AMERIKA SAMOA

E tusa ai ma faamaumauga a le Ofisa o Leoleo i Tafuna, o lo o ta’ua ai le o’o atu o ni valaau mai i ni tuaoi a se tamaitai e nofo totogi i Ottoville, ona o le pa’o leotele o lana musika i le leva o le po, faapea ma le faaumu leotele o se tagata.

Na agai atu loa iai leoleo mo sa latou suesuega, ma feiloai ai ma le ua molia.  Sa fa’ailoa atu iai e leoleo i lenei tamaitai ia fa’asea a ona tuaoi, e fai o le leotele o le musika ae o le fa’aumu so’o o se tagata.  A’o talatalanoa leoleo ma lenei tamaitai, sa lagonaina e leoleo le malosi o lona manogi pia.

Sa fa’ailoa atu e lenei tamaitai i leoleo, o la e pisa o ia i lona lava fanua ma e pule lava ia i ana mea e fai.  E le gata i lea, na ta’ua e lenei tamaitai, e fa’ato’a fai le sa a le latou nu’u, i le 10 i le po.

O lo o ta’ua foi i faamaumauga a leoleo, a’o talatalanoa lenei tamaitai ma leoleo, sa faapea ona alu se asiasiga a se tasi o leoelo, e faataamilo i le fale o lenei tamaitai, ma na vaaia ai ni apa pia ua um ana taumafaina, ma ni apa pia e le i tatalaina.   A’o fa’aauau pea ona taumafai leoleo e talosagaina le tamaitai ina ia ki i lalo le leo o lana leitio ona o lo o fa’asea tuaoi i le leotele tele, sa va’aia e seisi leoleo ia se alii talavou e 13 tausaga o lo o fa’asuati ma e foliga mai o lo o fa’asuaava, ona o le manogi pia.

(Sa aofia i totonu o faamaumauga a leoleo ia le aso fanau a lenei alii talavou, ae le o ta’ua ai pe na faapefea ona silafia e le leoleo e 13 tausaga o lenei alii).

(Ua le lomia e le Samoa News ia suafa o i latou o lo o a’afia i lenei mataupu, ona o le puipuiga o le alii talavou.)

Sa lokaina loa e leoleo ia lenei tamaitai, ina ua fesiligia e leoleo ia le tamaititi po o ai na tu’uina atu ia te ia le pia, ae tali le tamaititi o le tamaitai lea ua molia nei.

Ina ua taunu’u leoleo ma le tamaititi i le ofisa a leoleo, sa faapea loa ona logoina le vaega a le EMS mo le suesueina ma le togafitia o le tamaititi, ona sa foe faasuati i fafo o le ofisa a leoleo, ma sa ta’ua foi e le tamaiti le niniva o lona ulu.

Sa faia foi e leoleo ia a latou suesuega masani mo i latou o lo o masalomia na tagofia ava malosi, i le tamaititi 13 tausaga, ma sa mafai ona faamaonia ai le taumafaina e lenei alii talavou ia se ava malosi.

Na faamatala e le ua molia, o lo o pepelo le tamaititi i leoleo, ma e na te le i tu’uina i le tamaititi se pia ma e na te le iloa foi po o le a le mea na tupu.

Sa faamatala foi e le ua molia, sa ia tu’uina se $20 i le tamaititi e fai ai ni nai galuega i le fale o lona Aunty.  Ae ina ua toe faatalanoaina e leoleo ia le tamaititi i luma o lona tina, sa faamatala e le tamaititi, na fesoasoani i le ua molia i le tapenaina o lona fale.  Ina ua mae’a le la galuega, sa faapea loa ona la o i se faleoloa i Ottoville, ma sa faatauina ai e le ua molia ia se apa inu, ma se pepa twisties mo ia, ae faatau e le ua molia ia ana pia.

Ina ua o la fo’i mai i le fale a le ‘Aunty’ a le ua molia, sa ta’ua e le tamaititi, le faamalosia o ia e le ua molia, ina ia tofo i lana (tamaitai) pia.  Sa ta’ua foi e le tamaititi, na tu’uina atu e le ua molia, ia te ia, se apa pia e le i tatalaina, ma faatonu o ia e inu.  Sa tago lenei alii ma inu fa’aafa le apa pia, ma o le mea lea na amata ai ona faasuati i totonu o le fale, ma ia faalogoina le niniva o lona ulu.  

Sa faamatala foi e le tamaititi, e le i totogia atu e le ua molia le $20 mo lana galuega, ae na o le faatauina o lana apa inu ma lana pepa chips. Ae le gata i lea, o le ua molia lea sa faaumuumu solo ma ki i luga lana musika.

Ua molia nei lenei tamaitai i moliaga e tolu;

1. Faatupu Vevesi i nofoaga faitele – o se vaeag ‘C’ o soligatulafono mama, ma e mafai ona loka ai se tasi i le ono (6) masina, po o se sala tupe e $500; po o faasalaga uma e lua.
2. U’unaia se tamaititi/teineititi e umia pe taumafaina ia se ava malosi – o se vaega ‘A’ o soligatulafono mama, e mafai ona loka ai se tasi, i le o’o atu i le tasi (1) tausaga, po o se sala tupe e $1,000; po o fa’asalaga uma e lua.
3. Faia se gaioiga e ono lamatia ai le soifua o se tamaititi/teineititi – o se vaega ‘A’ o soligatulafono mama, e mafai ona loka ai se tasi, i le o’o atu i le tasi (1) tausaga, po o se sala tupe e $1,000; po o fa’asalaga uma e lua.

E $1,000 le tinoitupe faatulagaina e mafai ona tatalaina ai le ua molia, mai i le falepuipui,  e fa’atali ai ona faamasinoga.