Pago Pago - AMERIKA SAMOA

O le aso 26 o Iulai, 2024, na fa’afeso’ota’i ai e leoleo o le malaevaalele ia le Ofisa o Leoleo i Tafuna, e uiga i se alii na maua e se tasi o aufaigaluega a se ofisa vaalele,  o taumafai e lafo ni vaega o fualaau fa’asaina (Aisa) i Samoa.

Ua molia nei ia Failauga Malu i moliaga e lua;

Faitauga 1:  Umia faasolitulafono ia se Fualaau Faasaina ma se Faamoemoe e Kiliva (Aisa) – o se solitulafono mamafa, e mafai ona nofosala ai i le va o le lima ma le 20 tausaga, po o se sala tupe e le sili atu ma le $20,000; po o faasalaga uma e lua.

Faitauga 2:  Umia o Vaega o Fualaau Faasaina (Aisa) – o se solitulafono mamafa, e mafai ona nofosala ai i le falepuipui i le va o le lima ma le sefulu tausaga, po o se sala tupe, i le va o le $5,000 ma le $20,000; po o faasalaga uma e lua.

E $2,000 se vaegatupe na fa’atulagaina e mafai ona tatalaina ai le ua molia, e faatalitali lona faamasinoga.

E tusa ai ma fa’amaumauga a le malo, o le aoauli o le aso 26 o Iulai, na ripotia ai e le ofisa leoleo o le malaevaalele ia se alii, i le Ofisa a Leoleo, ina ua o’o atu se ripoti mai i le ofisa vaalele a le Talofa Airways, i se taumafaiga a se tasi e lafo ni fualaau faasaina i Samoa.

Ina ua fa’atalanoaina e leoleo ia le tamaitai faigaluega mai i le Talofa Airways, sa ia faamatalaina e faapea, na o’o atu ia Malu i lo latou ofisa ma se teutusi, na mana’o e lafo i Apia.  Ae ina ua fesiligia ia Manu po o a mea o i totonu o le teutusi, na fa’ailoa atu iai e Malu, o pepa.

Na fa’ailoa atu e le tamaitai faigaluega a le ofisa vaalele, i le ua molia, e manaomia ona tatala le teutusi e faamaonia meatotino o i totonu.  Ma ina ua tatalaina le teutusi samasama sa maua ai i totonu se teutusi paepae, lea na maua ai i totonu ia le vaega o fualaau faasaina, o le Aisa.

Sa faatonuina loa e le tamaitai faigaluega a le ofisa vaalele ia ni alii se to’alua o le latou aufaigaluega, e taofi Malu ae se’i logo ia leoleo o le malae vaalele.  Na mafai ona pu’eina e le tamaitai faigaluega a le malae vaalele ia le ata a le ua molia, ma sa ia taofia foi le teutusi na alu atu ma le ua molia.

Sa ta’ua e le tamaitai faigaluega a le ofisa vaalele, le faasino atu e le ua molia, ia le taavale na alu atu ai ma le teutusi.  Ae ina ua taumafai alii faigaluega a le ofisa vaalele e taofi le pikiapu lanu mumu, sa tu’ua e le taavale ia le malae vaalele.

Ina ua taunu’u leoleo a le malae vaalele, sa o latou aveina Malu i le latou ofisa ma sa tau’a’aoina atu foi e leoleo o le malae vaalele i leoleo mai i le Ofisa Leoleo a Tafuna, ia le teutusi lanu samasama na iai i totonu ia se teutusi lanu pa’epa’e, ma ni taga pepa i’ila se lua, na iai i totonu ia le vaega o fualaau faasaina, o le Aisa.

Sa fa’ailoa atu foi e leoleo o le malae vaalele, i sui malu o le malo, le mauaina o le ata o le pikiapu lanu mumu lea na alu atu ai le ua molia.

Na aveina Malu i le Ofisa a Leoleo i Tafuna mo le fa’aauauina o su’esu’ega a leoleo.  Ma sa ia faamatalaina i leoleo, sa alu atu se tasi o ona tuaoi (Misi Siua) ma piki mai o ia ma la agai sa’o mai i le malaevaalele.  Ma ina ua o la taunu’u mai i le malaevaalele, sa faatonuina o ia e lana tuaoi e ave le teutusi ma le $20 i le tamaitai i totonu o le ofisa vaalele.  

Sa fa’ailoa e Malu i lana tuaoi, Siua, e leai sana ID ina ne’i te’i ua tapa e le ofisa vaalele.

Na fa’ailoa atu e Malu i leoleo, e na te le iloa po o a mea sa i totonu o le teutusi.  Na pau lava le tulaga na mana’o iai, o sona auala mai ia Siua e alu ai i lo latou fale, aua e tuaoi i la’ua.

Sa ta’ua foi e le ua molia, ina ua ia tu’uina atu le teutusi i le tamaitai faigaluega a le ofisa vaalele, sa fa’ailoa mai e le tamaitai, o le a tatala le teutusi, lea na ia tu’uina atu iai le faatagana.  Ma sa ia fa’asinoina mai le pikiapu na alu atu, i le tamaitai o le ofisa vaalele.  Ae ina ua savali mai le leoleo a le malae vaalele i le pikiapu, o iina na alu ese faatopetope ai le taavale a Siua.

O lo’o talosagaina e Malu e fia avea o ia ma molimau a le malo.

Ina ua su’esu’eina e leoleo ia pepa i’ila na i totonu o le teutusi pa’epa’e, sa mafai ona fa’amaonia o lo’o iai totonu ni vaega o fualaau faasaina, o le Aisa.