Ads by Google Ads by Google

Loka i le Toese se alii ona o tu’uaiga i le talepe fale ma le gaoi


[ata: SN]
ausage@samoanews.com

Pago Pago - AMERIKA SAMOA

 

O le masina talu ai na pu’e faapagota ai e Leoleo se ali’i e 30 tausaga le matua, ma ua taofia nei i le Toese i Tafuna ona o tu’uaiga i lona osofaia lea o se Faleoloa i totonu o Tafuna i le masina o Ianuari o le tausaga nei ae ave faagaoi le tele o oloa ma meatotino sa i ai.

 

Ae ina ua taofia faapagota e Leoleo lea ali’i ua molia nei, e le gata na maua i ai fualaau faasaina, ae na maua ai i faamaumauga a le Ofisa o Leoleo, o lo o i ai se tusi saisai e pu’e faapagota ai o ia ona o tu’uaiga i lona osofaia lea o se Fale Teuoloa a se Pisinisi i Tafuna i le amataga o le tausaga na te’a nei, 2021.

 

O le masina lava fo’i na te’a nei na tula’i ai Taavili Lafaele i luma o le Fa’amasinoga Faaitumalo, ina ua mae’a ona faila e le malo tagi eseese e 3 faasaga ia te ia.

 

I le tagi muamua, o lo o tu’uaia ai Lafaele i le moliaga o le faomea faamalosi i le tulaga muamua; tasi le moliaga o le gaoi; tasi fo’i le moliaga o le talepe fale i le tulaga muamua, o le vaega C lea o solitulafono mamafa, lea e mafai ona faasala ai se tasi i le Toese mo le umi e oo atu i le 7 tausaga, pe faasala i le salatupe e oo atu ile $5,000, poo le faasala foi i faasalaga uma ia e 2.

 

I le tagi lona 2, o lo o tu’uaia ai le ua molia i le moliaga e tasi o le talepe fale i le tualga muamua; tasi le moliaga o le gaoi; tasi fo’i le moliaga o le faaleaga meatotino i le tulaga muamua; o solitulafono mamafa uma ia o le vaega C.

 

Ae i le tagi lona tolu faasaga ia Lafaele, ua molia ai o ia i le moliaga e tasi o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 tausaga e oo atu i le 10 tausaga le umi, pe faasala foi i le salatupe e oo atu i le $20,000.

 

E $25,000 le vaega tupe lea ua faatulaga e le Fa’amasinoga e tatala ai i tua Lafaele, afai ae mafai ona tatala o ia i tua, e le mafai ona ia toe taumafai e faafesootai molimau a le malo, poo i latou fo’i sa aafia i lana solitulafono. 

 

E le mafai ona toe alu i nofoaga eseese ia o lo o tu’uaia o ia na ia osofaia, a ia avea o ia ma tagatanu’u lelei e tausisi i tulafono uma a le malo.

 

Na finau le Loia Fautua a Lafaele i le Fa’amasinoga mo se avanoa e faaitiitia ai i le $5,000 le tupe e tatala ai i tua le ua molia. Na taua e le Loia Fautua a Lafaele e fa’apea, o le ua molia, o se ali’i Tama talavou e faamoemoe i ai lona aiga aemaise lona to’alua ma lana fanau e to’alua.

 

E faigaluega malosi o ia, e leai fo’i se fuafuaga e sola ese ma Amerika Samoa, aua o lona atunuu lenei na fanau ai, o lo o i ai uma fo’i iinei lona aiga, faapea ai lana Ekalesia ma le afioaga o loo tautua faamaoni ai.

 

O tagi fo’i e 3 ua faila e le malo faasaga ia te ia, na taua e le Loia Fautua a le ua molia, ua na o ni tu’uaiga lava e le o mafai ona faamaonia i le taimi nei.

 

Na tete’e malosi le Loia a le malo i le talosaga ina ia faaitiitia le tupe e tatala ai i tua ia Lafaele. Na taua e le itu a le malo e fa’apea, o gaioiga e pei ona tu’uaia ai lenei alii e matua matuia lava, aemaise ai fo’i, ua silia i le 2 tausaga o tau sailia o ia e Leoleo ona o le mataupu e pei ona tu’uaia ai o ia i le 2018. Na finau le Loia a le malo i le Fa’amasinoga ina ia faatumau pea le tupe e tatala ai i tua le ua molia, lea fo’i na talia e le Faamasinoga.

 

TAGI A LE MALO

 

E pei ona taua e le malo i le latou tagi e fa’apea, ole po o le aso 21 o le masina o Ianuari i le amataga o le tausaga nei na talosagaina ai e se alii Asia e fai sona Faleoloa i se vaega o Tafuna le fesoasoani a Leoleo, ona o se ali’i na ia fao faamalosi lana ato tupe o lo o i ai le tinoitupe e silia i le $600 i totonu, faapea ai ma lana iPhone sa i luga o le fata na gaoi foi e le ua molia.

 

I se faatalatalanoaga ma Leoleo, na faamatala ai e le alii Faipisinisi e fa’apea, o le itula e 7:30 i le afiafi o le aso lea na ulufale atu ai se alii ma fai sana faatau i lona faleoloa. O lea alii, o ia lea o Lafai, le ua molia i lenei mataupu

 

E 2 fagupia vailima lapopo’a ma apa mea’ai na fa’atau e le ua molia i le po lea, ona ia tuua ai loa lea o le Faleoloa ae aga’i ese atu i fafo. Na taua e le Pule o le Faleoloa i Leoleo e fa’apea, e $100 le tupe pepa na tuu atu e le ua molia e totogi ai lana fa’atau e lata i le $20 le aofa’i.

 

Talu ai e le i lava sana sui i totonu o le masini tupe, o le mafua’aga lea na tago ai le Pule o le Faleoloa i lana ato tupe sa tuu i lalo o le fata i le vaega o loo tu ai, ma aumai ai le tupe e fai ai le sui a le ua molia. Ina ua maea ona fai le sui, na tago ai le Pule o le Faleoloama toe tuu lana ato tupe i lalo o le fata, a o vaai ma molimauina e le ua molia.

 

Na maea ona totogi le faatau a le ua molia ona ia savali loa lea i fafo ma le Faleoloa, ae pe tusa o le itula e 8:39, na toe vaaia ai e le Faatauoloa le ua molia ua ulufale atu i totonu o le faleoloa, faatasi ai fo’i ma se isi ali’i pe tusa ma le 30 ona tausaga le matua.

 

Na savali sa’o le ua molia i le vaega o loo i ai pusa aisa, ae o le isi alii na aga’i i tua i le vaega o loo i ai lavalava. Na alu atu le ua molia ma uu mai fagupia vailima lapopo’a e 2 ma pepa saimini e 3 ona savali mai loa lea ua totogi lana faatau ma toe aga’i i fafo.

 

Na taua e le Pule o le Faleoloa, e ulufafo loa le ua molia, ae valaau mai loa le alii lea o loo i totonu o le faleoloa na te manaomia se fesoasoani i se tasi o oloa o loo fia iloa pe fia lona tau. Na taatia e le Pule o le Faleoloa lana telefoni i luga o le fata, i tafatafa lava o le masini tupe ae savali aga’i i tua i le vaega o loo mana’omia mai ai le fesoasoani.

 

E fetaui la toe faliu mai i tua o le Pule o le Faleoloa, ae ona vaaia loa le ua molia ua tamo’e mai i totonu o le faleoloa ma aga’i sa’o atu lava i le vaega o loo i ai le masini tupe, ona aapa lea o lona lima i lalo o le fata i le vaega o loo i ai lana ato tupe ua se’i ese mai, ma taumafai loa e tamoe i fafo, ae fetaui ma lona oo atu i ai. 

 

Na tu le ua molia e faatali le oo atu o le Pule o le Faleoloa, ona ia una’i lea o ia ma palasi atu ai le Pule o le Faleoloa i le isi itu o le fatafa, ma aapa atu ai le ua molia ma aumai le telefoni sa i luga o le fata ma alu ese vave loa ma totonu o le faleoloa. O le alii lea sa i ai i totonu o le faleoloa na tamo’e ane ma fesoasoani i le Pule o le Faleoloa, ma valaau ai loa ma Leoleo i le taimi lava lea.

 

Na masalomia e i ai se sootaga o le alii lea sa i totonu o le Faleoloa ma Lafaele, peita’i ina ua faia suesuega a Leoleo na manino ai, e leai se fesootaiga o i laua ia e to’alua.

 

Na mafai ona iloilo e Leoleo ata uma sa pu’e e le masini pu’eata o le Faleoloa, lea na mafai ai loa ona iloa e tagata foliga o Lafaele ma le nofoaga o lo o nofo ai o ia.

 

O le masina na te’a nei na faatoa mafai ai loa ona pu’e faapagota e Leoleo ia Lafaele mai le fale o lana uo sa nofo ma lafi ai o ia i Kokoland, ina ia faigata ai i Leoleo ona maua o ia. Ina ua fesiligia e faatatau i le Faleoloa lea sa ia osofaia i Tafuna, na ata le ua molia ma faapea atui Leoleo, “O le ova o lo’u ‘ona na mafua ai ona tula’i mai le faalavelave i lena po.”

 

Ae ina ua fesiligia e Leoleo le ua molia i le mataupu lea e pei ona tu’uaia ai o ia i le 2019, na teena malosi ai e Lafaele lona aafia i lea osofaiga. Na taua e le ua molia e fa’apea, e leai se taimi na ia osofaia ai se fale o se aiga, se’i vagana ai lava le Faleoloa lea na ia fao faamalosi mai le ato tupe, ona o lona mana’o i se tupe e fesoasoani ai i lona aiga.

 

A o le i auina atu Lafaele i le Ofisa o Leoleo mo suesuega, na saili e Leoleo lona tino mo ni aupega poo nisi mea e ono lamatia ai lo latou saogalemu. I totonu o le taga o le ofu o Lafaele sa fai, na maua ai e Leoleo se paipa tioata o loo i ai vaega o le pauta faasaina o le aisa.

Ina ua fesiligia e Leoleo le ua molia e faatatau i le paipa tioata o loo i ai vaega o le pauta o le aisa na maua i totonu o le taga o lona ofu sa fai, na ta’utino le ua molia, o le paipa na avatu e le isi ana uo ma ia.