Pago Pago - AMERIKA SAMOA

Ua molia nei le susuga Jubilee Ki ina ua masalomia i lona po ina o lana uo teine o Faiai Sulufaleese, a’o la iai i le falemai i Faga’alu, i le aoauli o le aso 15 o Tesema, 2023.  Ona o le malosi o le po a Ki, na mailoga ai lona lima i le itu tauagavale o foliga o Suufaleese.

O moliaga o Ki, e aofia ai le Faatupu vevesi i nofoaga faitele ma le Fa’ao’olima i lona tulaga e tolu.

O le moliaga o le faatupu vevesi e mafai ona fa’afalepuipui ai se tasi i le ono (6) masina, po o se sala tupe e i le va o le $150 ma le $500; po o fa’asalaga uma e lua.  O le moliaga o le Fa’ao’olima i lona tulaga e tolu, e mafai ona fa’afalepuipui ai se tasi i le o’o atu i le tasi (1) tausaga, po o se sala tupe e i le va o le $150 ma le $1,000; po o fa’asalaga uma e lua.

E tusa ai ma fa’amaumauga a le faamasinoga, na aveina e sikulaki o le falemai ia leoleo, ina ua taunuu atu, i le Ofisa a le Pulesili a le falemai, o iina na iai le tamaitai o Sulufaleese.  Ma sa molimauina e leoleo le mailoga o le po a le ua molia, i foliga o lenei tamaitai.

E taunu’u atu leoleo, ua sola ese ia Ki mai le nofoaga na tupu ai le fa’alavelave.

Sa faamatala e Sulufaleese i leoleo, sa i tua o le fale lea o lo o iai le ofisa o tagata faigaluega a le LBJ, lea e faigaluega ai o ia, ae ona fa’alogoina le valaau atu o Ki mai i se taxi.  Na ta’ua e Sulufaleese, lona le amanaia o le valaau atu a Ki, ma ia savali agai i tua o le ofisa, ae mulimuli atu ai Ki.

Sa ta’ua foi e Sulufaleese, na fai se la taugaupu e fa’atatau i le la faigauo, ae fa’ate’ia o ia, ina ua po e Ki le itu taugavale o ona foliga, ona toe liliu lea ma toe oso i le taxi, ma alu ese atu.

Sa taumafai leoleo e saili le ua molia, ae peitai, sa le i mauaina o ia.  Na fa’ailoa atu iai e Sulufaleese, atonu ua toe foi Ki i le latou fale i Ottoville.

Na aga’i loa iai leoleo i Ottoville, ma maua atu ai le alii o Ki ma aveina loa o ia i le Ofisa a Leoleo i Tafuna mo nisi suesuega.

Ina ua mae’a ona fa’ailoa atu e leoleo ia Ki ona aia taua, na tete’e le alii e le faia sana faamatalaga e uiga i le fa’alavelave na tupu.  Ae sa ia fa’ailoa atu i leoleo, o lo o manao i lana loia.  O lea na saunia ai loa le aveina o ia i le to’ese i Tafuna e fa’atalitali ai lona fa’amasinoga.

E taunuu leoleo ma Ki i le falepuipui, ua iai le loia a Ki ma lona tama.  Sa faamatalaina e leoleo i le tua’a o Ki ia le fa’alavelave na tupu.

O lo o ta’ua foi i fa’amaumauga a le famasinoga, se tusi na tusia, o lo o ta’ua ai e faapea, o Ki ma Sulufaleese, ua lua tausaga o le la faigauo, ae e le i faaipoipo.  O lo o nofo malamalama foi aiga e lua i le la faiga uo.  Ma e le o nonofo faatasi.

E $500 le tupe fa’atulagaina e mafai ona tatalaina ai i tua ia Ki mai i le falepuipui, e fa’atali ai lona fa’amasinoga.