Ads by Google Ads by Google

O lo’o lava pea MMR mo tagata e faiai tui Misela

Ua fa’ailoa e le Fa’atonu o le Matagaluega o le Soifua Maloloina, Motusa Tuileama Nua, “O lo’o lava pea le sapalai o vaila’au mo le faia o tuiga mo le mamalu o le atunu’u e tete’e ai le ma’i pipisi o le Misela”.

 

“O le aotelega o i latou o loo mataituina e ao ina mae’a tuia MMR e 15,000+ ma e aofia ai i latou o lo’o alaala i Amerika Samoa ae le’i faia o latou pepa nofo mau,” o se tala lea a Motusa.

 

“O le taimi lenei, e silia ma le 6,000 tui o lo’o i ai pea, ae o lo’o oka fo’i le isi 2,000 tui mo le vaiaso nei, ma o le a lava ai le sapalai mo le 3 vaiaso o lumana’i. Ae o lo ua mae’a ona taualoa e le CDC le taloasaga a le tatou matagaluega o le Soifua Maloloina ina ia sapalai mai pea tui nei i vaiaso ta’itasi.”

 

Ua fa’amaonia fo’i, e tele fo’i se sapalai o nei tui MMR na fa’aleaogaina ina ua motusia le eletise mo se taimi umi i le masina o Novema. O nei ituaiga o tui, e mana’omia lava ona tausia lelei, ma e le mafai fo’i ona toe fa’aaogaina pe a o’o ina le atoatoa ona teumaluina lelei.

 

“O le sapalai sa teuina lelei i le matou ofisa i Fagaima, e le’i toe ola le afi na fa’aagaaga ina ua pe le paoa, ma ua le mafai ai ona toe lelei a’ia’i nei tui mo le fa’aaogaina. Ua faia fo’i e tusa o le mea e ao ina fai, fa’aleaogaina sa’o lava lea sapalai. O isi uma nofoaga o lo’o teuina ai tui nei, o lo ua mae’a fa’atulaga ai afi moli mo le sapalai o le eletise e teuina ai tui nei pe a pe le eletise i na falema’i. O se fa’aletonu lea na afua ai ona tia’i atoa lea sapalai o tui ua leaga,” o se fa’apupulaga lea a Motusa.

 

Peita’i, ua le mafai ona ia mautinoa lelei, le aofai o tui na fa’aleagaina i lea taimi, ae o le tau aofai e $1,000.