Lu’i e tagata o se aiga ia leoleo a’o faatino o latou tiute faaletulafono
Pago Pago - AMERIKA SAMOA
O se faalavelave na tula’i mai i le taeao o le aso 15 o Setema, na lokaina ai e leoleo ia ni tagata se to’atolu o se aiga, ina ua valaau e se tina ia leoleo ona o sana tama, ae feosofi ai isi e toalua o le aiga, a’o taumafai leoleo e avefaapagotaina le alii ua molia.
E tusa ai ma fa’amaumauga a le malo, o lo’ ta’ua ai le valaau atu o se tina i le ofisa a leoleo, i le taeao o le aso 15 o Setema ma ripotia ai le fa’ao’oina o le lima a sana alo tama, i sona alo tamaitai.
(O le a le lomia e Le Lali ia suafa o i latou ua a’afia ma molia i lenei mataupu, aua le puipuiga o le tamaitai na a’afia.”
Na agai atu leoleo i le nofoaga na tupu ai le faalavelave ma talatalanoa ma le tina sa valaau mai i le ofisa a leoleo ma sa faasino iai e le tina ia le potu o iai lana tama.
Ae ina ua agai mai leoleo ma le ua molia, i le taavale a leoleo, na feosofi atu ni tagata se to’alua o le aiga, ma taumafai e taofi leoleo mai i le aveina o le ua molia. Ma na fautuaina e leoleo ia le to’alua lea ina ia aua le fa’alavelave i le faatinoga o a tiute faaleoleo, ae peitai, sa tu’uaia e i la’ua ia e to’alua ia leoleo, i le le faia o le la galuega. Ma o la fa’atonuina leoleo ina ia tatala atu le ua molia. E le gata i lea, sa o la palauvale foi i leoleo.
A’o fa’aauau pea ona taumafai leoleo e faatino o latou tiute, sa oso atu se tasi o le aiga ma fai atu i le leoleo, e aua le u’una’ia o ia e tu’i le gutu o le leoleo. E oso atu le leoleo e pu’e o ia lea, ae oso mai leisi ma taofi lima o le leoleo ma taumafai e se’i ese atu le ua molia. Ma ia faapea mai i le leoleo, e tu’u lona ‘nephew’ ae na te le tu’i ina le gutu o le leoleo.
O se taimi mulimuli ane, na sau ai se tamaloa o le aiga, ma taitai atu i la’ua ia i totonu o le fale.
A’o fa’atalitali leoleo mo nisi leoleo o lo’o agai atu, sa o latou faatalanoaina le tina o le ua molia ma lona tuafafine ma sa ta’ua e le tina e faapea, e le o se taimi muamua lea ua tupu ai se faalavelave faapenei i totonu o le latou aiga, ona o le ua molia. Ma sa fa’aalia e le tina lona mana’o e ave’ese atu le ua molia, mai totonu o le latou aiga.
Sa faamatalaina e le tuafafine a le ua molia, e faapea, sa ia faalogoina le leotele ma le le fa’aaloalo, o le ua molia i lona tina ma sa ia fesiligia ai lona tuagane (lea ua molia) i le mafuaaga e faapea ai lana amio. Ae liliu mai le ua molia, i le po o ia.
Ina ua taunu’u isi leoleo faaopoopo, sa le gata ina lokaina le atalii muamua, ae na faapena foi ona ave ai ma le to’alua lea na faalavelave i leoleo a’o faatino o latou tiute faaletulafono.
Ua molia le alii muamua i le Fa’ao’olima i lona tulaga e tolu (sauaga i totonu o aiga), o se vaega ‘C’ o soligatulafono mama e mafai ona faafalepuipui ai i le o’o atu i aso e sefululima po o se sala tupe e $300; po o faasalaga uma lua.
E $300 se vaegatupe na faatulagaina e mafai ona tatalaina ai le ua molia, e faatalitali ai lona faamasinoga.
Ae o leisi to’alua, ua molia uma i la’ua i le Fa’alavelave a’o taumafai leoleo e avefaapagota se tasi, o se vaega o soligatulafono mama, e mafai ona faafalepuipui ai i le tausaga e tasi, po o se sala tupe e $1,000, po o faasalaga uma e lua.
E ta’i $1,000 sa faatulagaina e tatalaina ai i la’ua ia, e faatalitali ai o la faamasinoga.