Pago Pago - AMERIKA SAMOA

O le faafaigaluegaina o tausi soifua - po’o tausi ma’i - mai Fiti ma Filipaina, nai lo o Samoa tuaoi ua tulai ai nisi o fesili, ae fa’amamino e le pulesili o le LBJ Medical Center lenei mataupu. 

I le feiloaiga ma tusitala i le sauniga e fa’afeiloai ai tausi soifua mai Fiti, na fa’amalamalama ai e le Pule Sili o le Falema’i o le LBJ, ia Moefaauo Bll Emmsley e fa’apea, o le toe iloiloina o mataupu aoaoina o loo fa’aaoga i le polokalame tausi soifua a le Iunivesite Aoao o Samoa (NUS), e le o tutusa ma tulaga fa’ata’atitia ai laisene a Amerika mo tausi soifua ma a avea ma lu'i le mauaina o tusipasi mai Amerika mo tausi soifua mai Samoa.

Saunoa le Pule Sili, e mana’omia le galulue fa’atasi o le LBJ ma le NUS i le polokalame o tausi soifua, ina ia mafai ai ona fa’a faigaluega tausi soifua mai Samoa.

Fa’ailoa e Moefa’auo e fa’apea, o le mea matou te mana’omia o le tu’u fa’atasi lea o se vaega fa’apitoa a le LBJ e malaga i Samoa e fesoasoani i le fausiaina o se a’oa’oga i se tulaga e talia e mafai ona matou fa’afaigaluega tausi soifua mai Samoa.

Faaalia e le Pule Sili, sa latou faia foi lea lava tulaga mo tausi soifua mai Fiti lea na ave moni ai lava i lalo i Amerika Samoa nei mataupu aoaoina faatasi ai ma tusitusiga ma pepa aloaia.

“Ma ua toe fo’i mai ia te a’u o le a’oa’oga a Fiti e tutusa lelei lava ma le Iunaite Setete ma ua matou talia lena mea ma ua matou aga’i atu i le isi vaega,” o se fa’amatalaga lea a Moefa’auo i le au tusitala.

O le le lava o tausi soifua i le falema’i na alia’e mai i le iloiloga a le Maota o Sui, a o le’i fa’ai’u le nofoaiga o lo o i ai nei i le masina na te’a nei.

E tusa ai ma se tusitusiga na tuuina atu e Moefaauo i le iloiloga a le Maota o Sui, o le le lava o tausi soifua o loʻo faʻaauau pea ma o se tulaga e silia ma le valu tausaga o lo’o fa’aauau pea. 

O lo’o fa’ailoa foi i ia tusitusiga e fa’apea, leai se fuafuaga mautu e faʻaitiitia lenei fa’afitauli, seʻia oʻo ina faʻatuputeleina i le taimi ole COVID, ina ua faʻafuaseʻi ona faʻamautu e le LBJ ia tausimaʻi e 25 mai Amerika i le tele o tupe faʻaalu a le FEMA, e le mafai e le LBJ ona gafatia lenei filifiliga e aunoa ma fesoasoani tupe mai fafo e fesoasoani mai. 

Ua fa’ailoa foi e fa’apea, o le puleaga fou a le LBJ sa tu’ufa’atasi tulaga mana’omia i le falema’i e pei ona i ai nei aua le lumana’i.

"O le fuafuaga e manaʻomia ai le faʻafaigaluegaina malosi o faiga fou mo le taofiofia ma le toe faʻatulagaina o totogi o tausisoifua, toe faʻavasegaina i tulaga eseese i luma, ma fofo mo taimi pupuu ma fofo umi, lea o loʻo faʻatinoina nei.”

“O fa'ai'uga vave e fa'apea - 22 ua a'oa'oina maualuga, fa'apolofesa, tele le poto masani, ma fa'apitoa fa'amaonia tausima'i mai Fiti [na taunu'u mai i le masina talu ai], e fesoasoani i le fa'amama avega i le fa'alavelave mata'utia na fa'atupuina i le tele o tausaga.”

“E le gata i lea, o lo’o fuafua le pulega a le LBJ e fa’aulu mai nisi o tausi soifua e to’a 20 mai Filipaina a’o fa’atali le manuia o le toe fa’atalanoaina ma le malo o Filipaina, lea e le’i leva atu ona latou pulea le malaga atu a latou tausi soifua mai le o ese atu.”

“Ua fuafua le LBJ e faamaea lenei fuafuaga i le isi 6 masina,” o se vaega lea o pepa sa tuuina atu i le iloiloga a le Maota o Sui.