Ads by Google Ads by Google

Malaga muamua a le “MV Lady Samoa IV” i le Aso Faraile ua te’a


[ata: foa'i]

Pago Pago - AMERIKA SAMOA

 

O le aso Faraile talu ai, Novema 18, sa taunu’u ai i Amerika Samoa le malaga muamua i le va o Apia ma Pago Pago le va’a  a le malo o Samoa, le MV Lady Samoa IV, e pei taula i le Uafu i Fagatogo. 

 

O le va’a fou o Samoa lea e fa’atautaia e le Samoa Shipping ma ua mafai ona fa’ataunuu mai lea malaga aua ua mae’a asiasi le US Coast Guard i Samoa ma latou pasia aloaia ai ona faia malaga i le va o Samoa e lua. 

 

Sa malaga i Apia sui o le U.S Coast Guard mai Amerika Samoa ina ia siaki ma pasia le va’a laupasese ma lau ai fo’i ma uta. Fa’ailoa e se tasi o sui a le Coast Guard i le teritori, lea na auai i le au malaga i Apia, Lt. Gary Lecompte, “O le matou malaga na asiasi i Samoa mo lea fa’amoemoe e fa’apasia ai le va’a fou lea, ua mae’a lelei ma ua fa’ataga ai le ulua’i faigamalaga lenei e fa’ataita’ia mai ai alava’a e le MV Lady Samoa IV. E le gata i lena avanoa matagofie e maimoa ai fo’i i Samoa ae ua asia ai fo’i ma le Kolisi mo A’oa’oga Tau Aliiva’a ina ia mafai ona taualoa mo nisi e a’otauina ai i folauga i le sami ma vaitafe e le US Coast Guard.”

 

Sa malaga foi i Samoa le taitai o le Marine Safety Detachment Unit, Coast Guard i Amerika Samoa, le susuga ia Richard Quintana.

 

Ona o lea va’a o le va’a fou fa’ato’a uma ona fausia ma o lana ulua’i malaga i luga o le sami o le aumaiga lea mai Iapani i Samoa, o lea sa fa’aalia ai e Lecompte, “E le’i fesiligia le fausaga aua o lea sa folau mai le va’a mai Iapani i Samoa, ae o isi mea uma e ao ina mautinoa o lo ua mae’a faatulaga uma i totonu o le va’a ina ia mautinoa e fa’aaoga e le auva’a ma le pasese pe a oo ina lutia se folauga i peau lagavale o le sami sousou. O taimi na ua mae’a fa’atulaga ai e le Coast Guard a latou tulafono i mea faigaluega e moomia mo le vala’auina mai o se vaa fa’aola ma faailo e tatau ona tafana mai o se avea’i mo se fesoasoani.”

 

O le kamupani e nafa ma le fa’afoeina o malaga a le va’a sa latou tapena se ‘aiga fiafia ma fa’atulaga fo’i se sauniga  pu’upu’u e ootia ai e le fa’atina o le atunuu, Ella Mauga le Lipine e tatala aloa’ia ai faigamalaga a le MV Lady Samoa IV. O nei mea uma sa fa’atulaga lava i le Uafu i Fagatogo. 

 

O le ulua’i malaga na malaga mai ai le Minisita o Feoa’iga & Fela’ua’iga Olo Fiti Va’ai, malaga mai fo’i le ta’ita’ifono o le Samoa Shipping Corporation Board Tagaloa Fa’afouina Su’a ma nisi o sui o lea tautua mai Samoa.

 

O le va’a lenei, ua fa’ailoa mai sa fa’atupeina lava e le Malo o Iapani mo Samoa ma e 297 nofoa mo pasese e faimalaga ai ma ua i ai fo’i ma potu fa’apitoa ua mae’a saunia lelei mo pasese fa’apitoa e faimalaga ai. I le taimi nei o le a amatalia ai malaga a le MV Lady Samoa IV o le taimi lava e pisi tele ai le va o Samoa ma Pago Pago i fela’ua’iga o uta ma fa’amomoli fa’apea ma pasese e fia malaga i Samoa e fai Kerisimasi ma Tausaga fou ai ma toe taliu mai e faigaluega.

 

E mautinoa fo’i o le a to’atele nisi e fia malaga i le va’a lenei nai lo le taugata ua i ai nei pasese o va’alele.