Pago Pago - AMERIKA SAMOA

E to’afa ni alii e faigaluega i le Kamupani i’a a le StarKist Samoa na maliliu i le vaveao o le aso Toona’i na te’a nei, ina ua tula’i mai se faalavelave ta ta’avale i le taimi tonu lava na taape mai ai tagata faigaluega a le kamupani ua mae’a galuega o le po, pe tusa o le itula e 2:00 i le vaveao o le aso Toona’i na te’a nei, Tesema 18, 2021.

E le o se tala e talia gofie e aiga o i latou e to’afa ua maliliu lenei tala, ona sa faamavae ma i latou i le taimi na aga’i mai ai i le galuega i le afiafi o le aso Faraile ma le faamoemoe e toe fo’i manuia atu i aiga e pei ona masani ai i aso e tele o le olaga.

O ata sa pue e nisi o tagata faigaluega ma tu’u i luga o upega o fesootaiga faaonaponei, le Facebook, na mafai ai ona maimoa le to’atele o le atunu’u i le faalavelave sa tula’i mai.

Na taua e nisi o tagata faigaluega sa i ai i le taimi na tula’i mai ai le faalavelave e faapea, o se ta’avale na tuli atu ma le taavale Leoleo, lea na alu atu ma so’a le isi ta’avale i luma tonu lava o le faitoto’a tele a le Kamupani, lea na tula’i mai ai loa le faalavelave ma maliliu ai alii e to’alua sa i totonu o le ta’avale, ae lelea atu le ta’avale na tuli e Leoleo i totonu o le pa a le Kamupani ma maliliu ai isi ali’i e to’alua.

Na fesiligia e le Samoa News le Sui Komesina o le Matagaluega o le Puipuiga o le Saogalemu Lautele ia Foifua Foifua Jr e tusa ai o lenei faalavelave, ma ia faamaonia mai ai i latou e to’afa na maliliu.

O le tele o fesili na tula’i mai i lea vaveao, pe aisea na faaauau ai pea le tuliga e le ta’avale Leoleo o le ta’avale lea na tuli atu ma mafua ai loa le faalavelave.

Na faamanino e Foifua Jr e faapea, na taofi e Leoleo sa tiute i luga o le alatele i Satala i luma tonu o le vaega o loo i ai Fanuatanu se ta’avale i le soona alu saoasaoa. Na tu le ta’avale ona aga’i atu lea o Leoleo ma taumafai e faamanino i le ave ta’avale le mafua’aga ua taofi ai lana ta’avale.

A o talanoa atu Leoleo i le ave ta’avale, na faafuase’i ona toe oso le ta’avale ma fai ai loa tuliga ma Leoleo.

Na fai si saoasaoa o le alu a le ta’avale lea ua sola ese ma Leoleo ao aga’i atu i le itu o lo o i ai le Kamupani i’a. O le taimi tonu lea ua amata ona gasolo mai i fafo tagata faigaluega a le kamupani ua manava le sifi po.

Na taua e se molimau i le Samoa News e faapea, o le ta’avale mai Masefau o loo i ai ni alii se toafa i totonu, na solomuli mai i tua ma le faamoemoe o le a sauni e aga’i atu i Masefau. E fetaui le tau solomuli mai i tua o le ta’avale lea, ae fetaui fo’i ma le oo mai o le ta’avale lea o loo fai mai tuliga ma Leoleo, ma tula’i mai ai loa le fa’alavelave. 

O alii e to’alua sa nonofo i le nofoa pito i tua o le ta’avale mai Masefau na maliliu ai lava i le taimi na tula’i mai ai le fa’alavelave. O isi alii e to’alua sa nonofo i le pito i luma e aofia ai ma le ta’avale, na saogalemu i laua.

Na lelea atu le ta’avale lea na tuli mai e Leoleo aga’i i totonu o le pa ma maliu ai le ali’i Leoleo po, faatasi ma le isi alii faigaluega. O nisi o tagata faigaluega sa manunu’a ma auina atu i le Falema’i mo togafitiga. 

O i latou e to’alua sa i totonu o le ta’avale lea na tuli atu e Leoleo, e leai se isi na maliu, se’i vagana ai nai manu’a na aafia ai i laua. Na auina atu foi i laua i le Falema’i i Faga’alu mo togafitiga. Sa maitauina le ‘ona o le ave ta’avale o le ta’avale lea na mafua ai le faalavelave i le taimi na tau ta’ita’i atu ai i le ta’avale a le EMS.

Saunoa Foifua Jr e faapea, o le mae’a ai o togafitiga a le ave ta’avale o le ta’avale lea na tula’i mai ai le faalavelave, 

Sa molimauina i ata sa pu’e ma faasalalau i luga o le Facebook le galulue faatasi o tagata faigaluega a le kamupani e ofo atu le fesoasoani i tagata faigaluega na manunu’a.

Sa i ai foi tagata faigaluega na molimauina i luga o ata sa pu’e ma faasalalau i luga o le Facebook, na taofia e Leoleo i le po lea. Ina ua fesiligia le Sui Komesina o Leoleo, sa ia faamaonia mai ai lea tulaga.

Saunoa Foifua Jr e faapea, o nisi o tagata faigaluega a le kamupani i’a na taofia e Leoleo i le taimi o le faalavelave, na taua i ripoti lo latou faalavelave a o faatino galuega a Leoleo. Na mafai ona faamaonia lea tulaga i ata sa pu’e ma faasalalau i luga o le Facebook, i le tau fai valaau atu o nisi o tagata faiglauega i Leoleo i le leai o se latou galuega fesoasoani mo i latou o loo aafia.

O se tasi o ata video sa lagona atu ai nisi o tagata faigaluega o loo lafo upu masoa i Leoleo. 

Saunoa Foifua Jr e faapea, e faigata i tagata faigaluega ona malamalama i le galuega a Leoleo i le taimi na tula’i mai ai le fa’alavelave, atonu o le mafua’aga lea na tula’i mai ai le faafitauli ma taofia ai loa nisi o tagata faigaluega i lalo o le vaaiga a Leoleo i lea po.

Ae i le faamaninoga o le faalavelave na tula’i mai, na saunoa ai Foifua Jr e faapea, o le ave ta’avale o le ta’avale lea na tula’i mai ai le faalavelave, sa faamaonia muamua e le Faamasinoga lana solitulafono o le ave ta’avale ‘ona.

O lo o i ai taumatematega  atonu o le mafua’aga lea na sola ese ai le alii lea ma Leoleo i le taimi na taofi ai e Leoleo lana ta’avale, ina ua ia iloa o loo ona fo’i ma fealua’i i luga o le alatele.

E lomia lenei ripoti, o lo o faagasolo pea suesuega a Leoleo i le mafua’aga o lenei faalavelave.

O le mae’a ai o le fa’alavelave, na lolofi atu ai uo ma aiga o i latou na maliliu i le Falesa i le Falema’i o le LBJ i Faga’alu, e auai i se sauniga lotu faapitoa mo i latou uma na aafia. Na auai i lea sauniga faapitoa le toatele o uo ma aiga o i latou e toafa ua maliliu, atoa ai ma nisi o tagata faigaluega a le kamupani na lolofi atu e faaali lo latou fa’aaloalo ma le loto nutimomoia ona o le faalavelave faafuase’i ua motusia ai le mafutaga ma uo i le galuega.

O le taeao ananafi lea na faataunuuina ai se isi sauniga lotu faapitoa i luma o le kamupani i’a, le nofoaga tonu na tula’i mai ai le fa’alavelave, e manatua ai soifua ua maliliu i lenei faalavelave.

O lenei sauniga lotu na taitaia lava e taitai o le Kamupani, faatasi ai le silia i le toa 100 tagata faigaluega ma le toatele o uo ma aiga na lolofi atu e molimauina lenei sauniga lotu faapitoa.

O upu faamalosi na tuuina mai e le Taitai o le Kamupani, e faalototeleina ai tagata faigaluega ina ia taoto atu le galuega o le Tulafono i aao o Leoleo ma le Fa’amasinoga, ae nofo tapua’i pea le aiga-kamupani ma tatalo i le Atua mo lana faamafanafanaga i aiga loto faavauvau.

E talitonu le Samoa News, o le taeao ananafi lea na tula’i ai le ave ta’avale o le ta’avale lea na aafia i lenei faalavelave mo le ulua’i taimi, ma faagasolo ai loa taualumaga o lana mataupu.