Apia - SAMOA

O se tala faanoanoa ua salalau atu i le lalolagi atoa, ma ua le mautonu ai le to’atele, i le maliu fa’afuase’i o le tina 78 tausaga le matua, o Caroline Sinavaiana-Gabbard, ma ua molia ai nei se tamaitai e 57 tausaga le matua, o Papali’i Sia Figiel.

Ma ua fa’atumulua luga o le initeneti, aemaise le Api o Foliga (Facebook) i faamaisega, o tomanatunatuga, o manatu alofa, e tusa ai ma le soifuaga o lenei tina, o Gabbard.

O Gabbard, o se tusitala ma se tusi solo ua lauiloa ana tusitusiga, o se tagata sa fiafia i tala faasolopito, ma sa galue malosi i le puipuiga o le siosiomaga.  O se polofesa ua litaea mai lana tautua mai i le Iunivesite o Hawaii i Manoa, faapea foi le Kolisi o Amerika Samoa (ASCC).

 E tusa ai ma se ripoti mai i le Samoa Observer, na faamatalaina e se uo a Gabbard, e le’i finagalo e lomia lona suafa, lona agaga fa’anoanoa ina ua salalau tala o lenei fa’alavelave mata’utia ua maliu ai si ana uo.  Ma sa ta’ua e lenei uo, o Gabbard o se tagata alofa, o se tusitala maoa’e ma e lagolago malosi i isi fo’i tusitala, ma o se tagata to’afimalie ma le agamalu.

I le faaiuga o le 2022, sa lapata’ia ai e Gabbard ia tulaga pagatia e o’o iai le atunu’u, ona o le le tu malosi o le malo e taofia le fa’aaogaina o vaila’au ia o lo’o fa’aaoga e tineia ai vao.

Na soifua mai Gabbard i le 1946 i totonu o le afioaga o Utulei i Amerika Samoa ma o ia o le tuafafine o se alii o lo’o galue i totonu o le faigamalo a Amerika, le susuga ia Mike Gabbard faapea foi si ona ‘niece’ o Tulsi Gabbard.

Sa avea o ia ma uluai tamaitai Samoa na avea ma polofesa i totonu o a’oa’oga i Amerika.

Sa fa’aauauina a’oa’oga a Gabbard i le Iuniveste a le Setete o Sonoma, Iunivesite a Berkeley i Kalefonia faapea le Iunivesite o Hawaii.

Sa avea o ia ma polofesa tusitala i le Iunivesite o Hawaii, e lata i le 20 tausaga ma na avea foi o ia ma polofesa o tala o le Pasefika, i le Iunivesite o Hawaii i Manoa.

I le 2002 na lomia ai nisi o ana solo ma sa aloaia foi o ia i luga o le mekasini o le ‘USA Today’, o se tasi o tamaitai po o tina maoa’e mai i se teritori a Amerika.

I se ripoti mai i le ofisa a leoleo e tusa ai ma le fa’alavelave na tupu, ua fa’amautuina ai le moliaina o Papali’i i le fasioti tagata.

I se faamatalaga mai i le Komesina o Leoleo, le susuga ia Auapaau Logoitino Filipo, sa ia fa’ailoa mai ai le le o mautinoa o le mafua’aga na tupu mai ai lenei fa’alavelave.

Ae e tusa ai ma ulua’i su’esu’ega a leoleo, ua fa’ailoa mai ai le tupu o lenei fa’alavelave i le aso Toonai ma o le aso lava lea na tu’ua ai e le ua maliu ia Gabbard i totonu o lona fale, ae alu atu i Lotofaga e tafao ma se tasi o ana uo.

O le taeao o le aso Sa na soso’o ai, na fa’ato’a faamatala ai e Papali’i i lana uo, le mea sa tupu i le va o ia ma Gabbard, ma o la agai atu ai loa i le Ofisa a Leoleo.

Sa faapea loa ona aga’i atu leoleo i le fale a Papali’i ma maua atu ai le tino maliu o Gabbard.