Ads by Google Ads by Google

Maliu se teineitiiti 2 tausagaina ua oso se ta’avale i totonu o le Fale


[ata: foa'i]
ausage@samoanews.com

Pago Pago, AMERIKA SAMOA

O se faalavelave matuia na tula’i mai i le afioga i Nu’uuli i le 2 vaiaso talu ai na maliu ai se teineitiiti e 2 tausaga le matua ina ua oso se ta’avale i totonu o le fale sa latou i ai ma lona Tina ma lona uso e 11 masina le matua. Na manunu’a le Tina e 30 tausaga le matua ma lana tama teine e 11 masina le matua, ae maimau ai le soifua o si alualutoto e pei ona aafia i lenei faalavelave mata’utia.

O le taunuuga o lenei faalavelave ua pu’e faapagota ai nei e Leoleo se tamaitai Asia e 38 tausaga le matua ma ua molia e le malo i le tulafono. O le tamaitai ua molia nei, o ia fo’i lea o le ave ta’avale o le ta’avale na tula’i mai ai le faalavelave, o Xiujn Chen.

E pei ona taua e le malo i le latou tagi e faapea, o le taeao o le aso 14 o Aperila, 2021 pe tusa o le itula e 10:21, na logo ai e se Tama le Ofisa autu o Leoleo i Fagatogo mo se fesoasoani, ona o se faalavelave ua manunu’a tigaina ai se aiga. Na taua atili e le Tama i Leoleo e faapea, e foliga mai o se taavale na oso i totonu o se fale ma manunu’a ai ni tagata. 

Pe tusa e 9 minute talu ona tuana’i le valaau ae taunu’u loa le Taavale Leoleo muamua ma amata loa ona galulue e ofo atu galuega fesoasoani ia i latou na manunu’a i le fa’alavelave. Sa to’atele fo’i ni isi na mafai ona lolofi atu e fesoasoani i Leoleo mo le tau togafitiina o i latou na manunu’a, e aofia ai le Tina ma lana fanau e to’alua.

I faamatalaga na maua e Leoleo e faapea, o le fale e pei ona tula’i mai ai le faalavelave, o se Fale Mautotogi, o loo mau totogi ai nisi o ulugali’i e aofia ai ma le Ulugalii e ana le fanau na aafia. E lei i ai le Tama o le aiga i le taimi na tula’i mai ai le faalavelave, se’i vagana ai le Tina ma nai ona ‘alo laiti e to’alua.

O le vaaiga muamua lava e pei ona molimauina e Leoleo, o se teineitiiti o loo mau lona tino i le va o le pa’u o le ta’avale ma le apa apa o le ta’avale, e le o gaioiga pe manava o ia, ae ua na o le taatia lava i le vaega o loo mau ai lona tino. Sa galulue isi Leoleo e tau togafiti le faalavelave ae o isi Leoleo o loo taumafai e fesiligia nisi o molimau sa i ai i le taimi o le fa’alavelave.

O le taavale na aafia i le faalavelave o le ituaiga o le Hyundai Tuscon lanu mumu. O nisi o molimau na fesiligia e Leoleo i lenei mataupu e aofia ai se ulugali’i sa fa’atau la tau i’a i luma o le auala, faafesaga’i tonu lava le nofoaga o le Faleoloa o le KT i Nu’uuli, ae la vaaia loa le Hyundai Tuscon lanu mumu na sa saoasaoa i luga o le alatele ma afe loa i totonu o le auala pefu lea e ag’ai i tua i le nofoaga o loo i ai le Fale Mautotogi lea na tula’i mai ai le faalavelave, pe tusa lea o le 200 iata le mama ese mai i tua mai le auala tele a le malo.

Na taua e le ulugali’i lea i Leoleo, a o faatau la tau i’a i luma o le auala, na faafuase’i ona tamo’e atu se Tamaloa ia te i laua ma fesili atu i se telefoni se’i vili ai le ta’avale Falema’i, ona o le taavale lea na oso i totonu o le fale ma manunu’a ai se Tina ma lana fanau.

Na faafesoota’i e le ulugali’i sa faatau la tau i’a le Ofisa o Leoleo ma le Falema’i atoa ai ma le la fesoasoani i Leoleo mo le Tina mafatia ma si ana fanau. 

Na taua e le isi molimau sa i ai i le taimi o le faalavelave i Leoleo e faapea, na faateia o ia ina ua ia vaaia le aga’i atu le ta’avale Hyundai lanu mumu ma alu sa’o lava i totonu o le fale. E le i umi ae ona vaaia se tamaitai Asia o loo sii atu se pepe ma natinati atu lava le la taufetuliga i le pito i luma o le alatele a le malo. 

Na fesili Leoleo i le molimau pe na faapefea ona tula’i mai le faalavelave, ae na tali le molimau, e lei vaai i le taimi na tupu ai le faalavelave, sei vagana ai le taimi na faatoa mae’a ai lava, ina ua mae’a le pao leotele na sau mai le Fale Mautotogi, ma ia tula’i ai loa ma tamoe e vaai poo le a lea leo pao tele. 

E fetaui lava lona autilo atu i le vaega tonu na sau ai le pao leotele ae ona vaaia loa se tamaitai Asia ua oso i fafo mai le itu o le ave ta’avale o le ta’avale Hyundai lanu mumu, ma ia tatala le faitoto’a pito i tua o le taavale ae sii mai i fafo se pepa sa i ai ma la savavali ese mai loa mai le nofoaga na tula’i mai ai le faalavelave.

A o faagasolo suesuega a Leoleo, o le taimi fo’i lea na mae’a ai galuega fesoasoani a le isi vaega o Leoleo ma sui o le vaega a le EMS, ma auina atu i loa le Tina ma lana fanau e to’alua na aafia i lenei faalavelave i le Falema’i mo togafitiga. Ae o le taimi lava fo’i lea na amata ai loa galuega a le isi vaega o Leoleo o le tau sailia lea o se nofoaga e maua ai le tamaitai Asia na faafoeina le ta’avale, lea ua mautinoa lona sola ese mai i le nofoaga na tula’i mai ai le fa’alavelave.

E toatele isi molimau na fesiligia e Leoleo ma maua mai ai faamatalaga e faatatau i le itu na sola aga’i i ai le tamaitai na faafoeina le ta’avale. Na asia e Leoleo totonu o le Faleaiga o le Taumafa i Nu’uuli ma latou maua ai se tamaitai Asia e tutusa lelei lona laei o loo faia ma laei o le tagata lea na faamatala e molimau na vaaia o oso ese mai i le faitotoa o le ave ta’avale o le ta’avale na aafia i le faalavelave.

O le mae’a ona fesiligia solo e Leoleo o molimau, na faamaonia ai loa, o le tamaitai Asia tonu lava lea na faafoeina le ta’avale, o ia lea o Xiujn Chen, o ia fo’i lea ua molia i lenei mataupu. Na auna atu e Leoleo ia Chen i le Ofisa o Leoleo i Tafuna mo suesuega atili e uiga i lenei mataupu.

Ina ua fesiligia e Leoleo ia Chen e tusa ai o lenei mataupu, sa ia ta’utino ai e faapea, o ia na faafoeina le ta’avale na tula’i mai ai le faalavelave, ae ina ua tupu le faalavelave, sa ia manatu a e sola ese ona o lona fefe i lona saogalemu ma lona ola ina ne’i aafia o ia i se isi tagata.

Na taua e Chen i Leoleo e faapea, o ia na moe i le itula e 8:00 i le po ua tuana’i ae toe ala i luga i le 12:00 i le vaveao, e lei toe moe mai lava i le taimi lea seia oo mai i le taeao i le taimi na amata ai lana galuega, o le tausi tama lea i le afafine o lona Pule. O lana galuega e tele ina mana’omia ai le fealua’i i le ta’avale e momoli le afafine o lona Pule i le aoga ma nisi o nofoaga e fia malaga i ai. 

I le taeao o le aso e pei ona tula’i mai ai le faalavelave, sa lagona lona fiamoe, o le mafua’aga lea na faafuase’ia ai ona tu lona vae i le vae penisini ole ta’avale ma soona alu saoasaoa ai loa ma alu atu sa’o lava ma taia i le fale o loo mau totogi ai tagata ma tula’i mai ai loa le fa’alavelave.

Ina ua mae’a ona fesiligia e Leoleo ia Chen e tusa ai o lenei mataupu, na auina atua i loa o ia i le Toese i Tafuna ma taofia ai, e faatali ai le taeao e sosoo ai e tula’i ai i luma o le Faamasinoga Faaitumalo.

O le 2 vaiaso talu ai ona tula’i ai Chen i luma o le Faamasinoga Faaitumalo mo lana ulua’i iloiloga. O le ali’i loia fautua ia Michael White o loo tula’i mo Chen ae o le alii loia sili lagolago ia Robert Morrison III o loo tula’i mo le itu a le malo.

O moliaga ua faia faasaga ia Chen e aofia ai le moliaga o le faaoolima i le tulaga lua, o le vaea D lea o solitulafono mamafa; faapea ai moliaga mama e pei o moliaga e 2 o le faaoolima i le tulaga tolu; tasi le moliaga o le ave taavale faatamala ua oo ai le maliu i se isi tagata; tasi le moliaga o le faatamala ua aafia ai le saogalemu o fanau laiti, ma le moliaga e tasi o le ave taavale faatautala.

E $20,000 lea ua faatulaga e tatala ai i tua Chen e faatali ai le vaiaso nei lea ua faatulaga e faia ai le isi ana iloiloga faapitoa.

Ina ua toe asia e Leoleo le tamaitai na manu’a o loo taofia i le falema’i i le aoauli o le aso lava lea, na manino mai ai i ripoti, ua i’u lona soifua.

O le aso Faraile o le vaiaso na te’a nei na lagomau ai si afafine na aafia i lenei faalavelave faafuase’i i lona aiga i Pavaiai. Ia faamaiise le Atua i le aiga faavauvau.