Pago Pago - AMERIKA SAMOA

Lipotia e le CNN i le aso Lulu na te’a nei le taumafaiga a le tamaitai Samoa o Laulauga Tausaga-Collins, 25 Tausaga, o se alo Samoa sa soifua a’e i Hawaii ma ua lava tapena o ia mo fa’agatama tau Afeleti, lea e tauva ai i le Togi Pulu Salafa poo le Discus mo Amerika.

Ua fa’ailoa mai o lo’o ua fiafia tele o ia ina ua ia mauaina le togi sili ona mamao i lenei tausaga o tauvaga o ta’aloga i Budapest, Hungary i le aso Lua na te’a nei, ma ua fa’amautu mai ai lona mauaina fo’i o le pine auro i lea vaega.

Peita’i ua fa’ailoa mai lea togi e 69.49mita ma ua ia toe soloia ai lana matati’a sa tamau mai e i le umi e latalata i le 4mita le mamao.

O lo ua fa’amauina fo’i, o le ulua’i taimi lea ua manumalo ai Amerika i lea ta’aloga afeleti o le togi pulu salafa, ma ua latou umia ai fo’i ma le Auro.

“I le taimi nei, ua matua ou le iloa se tala a fai atu, e oo lava ia te a’u, o lea ou te le talitonu a’ia’i, i le mea ua tupu nei. Ioe pau a o lea, “Ua faia e le Atua le mea sili mo a’u i lenei taimi, ua ia aumai le malosi, ma ua ia tali fo’i i a’u tatalo ma le tapua’iga mau a si o’u aiga i Hawaii ma Samoa, alofa fa’afetai i le Atua mo le manumalo,” o se tala lea a le tamaitai Siamupini.

Ua tali tutusa lava ma lana tali sa tuuina ane i le au fa’asalalau a le CNN i le taimi lava na fa’amauina ai lana togi ua tumati’e nei i le lalolagi atoa, 60.49mita le mamao. “O le taimi nei, ou te le o mautonu lo’u mafaufau po’o le mamao lea o la’u togi mulimuli nei. Na’o le fa’afetai lea ua oo mai i lo’u mafaufau, ma talitonu o la’u togi lea ua i ai nei. Ua na’o lagona o le fiafia, ae ua leai ni upu e fa’amatala ai.”

I sina taimi mulimuli ane ina ua toe maua lona avanoa i le vasega o le au fa’asalalau, sa ia fa’ato’a fa’afetaia ai le anoanoa’i o i latou o lo’o tapua’ia ona faiva i lenei tauvaga tele i le Lalolagi. O iina foi sa fa’ato’a mafai ai ona ia fa’afetaia le tapua’iga mau a lona aiga ma lona setete o Hawaii ae maise i lona tupuaga o Amerika Samoa.

O le lona lua i lenei tamaitai togitogi mamao ua tula’i mai ai le tamaitai mai Amerika fo’i, o lana soa sa la’ua tauva, Valarie Allman i lana togi e 69.23mita le mamao i le pine siliva ae fa’ato’a tulaga tolu ai le tamaitai mai Saina, Feng Bin lea ua umia nei le pine apamemea.