Pago Pago, AMERIKA SAMOA

Ua i’u ma le manuia le sailiga tofi a le atunu’u mo lenei tausaga ina ua manumalo le paga a le afioga a Lemanu Palepoi Mauga ma le tofa a Talauega Eleasalo Ale e ave ma Kovana ma le Lutena Kovana mo le isi 4 tausaga i le aofa’i o palota na la maua e 7,154, ae toe filifilia ai le tofa a Uifaatali Amata e avea ma Faipule o le atunu’u mo le nofoa i le laumua i Uosigitone mo le isi 2 tausaga i le aofa’i o palota e 9,833 na ia maua.

E tusa ai ma se ripoti mai le Ofisa o Leoleo i le po anapo, e tapunia Fale Palota uma lava e 41 i le afiafi ananafi e aunoa ma se fa’alavelave na tula’i mai i le aso atoa o le faiga filifiliga a le atunu’u, e afua mai i le Motu Sa i Manu’a, faapea ai le afua ai i le Itumalo o Vaifanua seia oo atu i le Itumalo o Leasina.

E pei ona silafia e le atunu’u, e 3 vaega eseese na fa’atino i ai le faiga palota mo lenei tausaga. O le sailiga o se Kovana ma le Lutena Kovana, o le filifilia o se Faipule mo le nofoa o le atunu’u i le laumua i Uosigitone, atoa ai a le filifilia o sui Faipule mai itumalo eseese mo le Maota o Sui i le Fono Faitulafono.

O le faaiuga e pei ona faalauiloa i le po anapo, o le ulua’i faaiuga lea o le faiga palota mo lenei tausaga. I lalo o Tulafono o Faiga Palota, e 7 aso talu ona mae’a le faitauina i le faitauga muamua, ona faatoa tuuina mai loa lea o le faaiuga aloaia mo le faiga palota o lenei tausaga.

Mo le tauvaga i le tofi Kovana ma le Lutena Kovana, e tatau ona 50.1% e manumalo ai le paga ina ia aloaia le avea ma le isi Kovana ma le Lutena Kovana mo le isi 4 tausaga. 

Afai e le ausia e se paga pasene e pei ona taua i le tulafono, lona uiga, ua agava’a ona faia se palota faalua e saili ai se paga e manumalo i le faiga palota. 

O paga e 2 e maualuga le aofa’i o a laua palota, o paga ia e 2 e tausinio mo le sailiina o le manumalo.

I le faaiuga o le palota o lenei tausaga, na manino mai ai le aofa’i e to’a 7,154 o palota na maua e le paga a Lemanu ma Talauega, tusa lea e 60.3%; 2,594 le aofa’i o palota na maua e le paga a Gaoteote ma Faiivae, tusa lea o le 21.9%; o le paga a Iaulualo ma Tapaau e 1,461 le aofai o palota na maua, tusa lea o le 12,3%, ma le paga a Nua ma Satele e 652 palota na maua, tusa lea o le 5.5%.

O i latou na mafai ona palota i le faiga palota tele a Amerika Samoa mo lenei tausaga 2020 i le sailiga o le tofi Kovana ma le Lutena Kovana, e tusa lea ma le 11,861.

PALOTA MO LE TOFI KOVANA MA LE LUTENA KOVANA

E ui i le tele o matematega talu mai le tausaga na te’a nei ina ua amata ona faalauiloa sui tauva mo lenei faamoemoe, poo ai le paga o le a pale mai i le ta’ita’iina o le malo mo le isi 4 tausaga, ua tasi ai le tofa saili a le atunu’u, o le paga a le afioga a Lemanu ma le tofa a Talauega o le a taitaia le malo, ina ua manumalo le la paga i palota e 

Mai paga e 4 na tausinio i lenei fa’amoemoe, ua tula’i mai ai le maualuga o palota ua manumalo ai le paga a Lemanu ma Talauega, ma ua manino mai ai fo’i le leai o se palota lona lua i lenei tausaga.

I le palota i le 2012 e saili ai le tofi Kovana ma le Lutena Kovana, e leai fo’i se palota faalua na faataunuuina, ina ua maualuga le aofa’i o palota na manumalo ai le paga a le tofa i le Tootoo ia Lolo Moliga ma le afioga a Lemanu P. Mauga.

Na matua faatumulia le nofoaga autu a le paga a Lemanu ma Talauega i Matu’u i sui o komiti o afioaga taitasi, a o faatalitali i se faaiuga o le palota.

O loifofoga o le fiafia faapea ai le agaga faafetai na molimauina i le nofoaga autu a Lemanu ma Talauega ina tuuina mai le faaiuga o le palota i le po anapo.

O le viiga i le Atua e ala i le sauniga lotu na taitaia e le susuga Rev. Fouvale Asiata, e faafetaia ai le faamoemoe ua i’u ma le manuia ma faai’uina ai le mafutaga i le po anapo.

Na faafetaia e le afioga a Lemanu komiti o afioaga taitasi uma lava i le galuega fita sa alo atu i ai mo le tele o masina, lea ua i’u ma le manuia e ala i lenei manumalo mataina. Na auai i lenei faamoemoe ni isi o Faasuaga o le atunu’u e pei o le afioga i le Maoputasi ia Mauga T. Asuega, o afioga i Maopu, faapea ai fo’i ma le susuga i le Matua ia Togiola T. A Tulafono.

O isi paga e 3 na tausinio i le sailiga o le tofi Kovana ma le Lutena Kovana e aofia ai Gaoteote ma Faiivae, lea na maua palota e , tusa lea e % le aofa’i o palota.

PALOTA MO LE FAIPULE I UOSIGITONE

Mai sui tauva e 3 na tausinio mo le nofoaga o le atunuu i le laumua i Uosigitone, ua manumalo ai le tofa a Uifaatali Amata i le aofai o palota e 9,880, tusa lea o le 83.5%.

O le susuga a Meleagi Suitonu-Chapman na ia maua le aofai o palota e 249, tusa lea o le 2.1%,  ae o le susuga a Oreta Tufaga-Mapu Crichton na ia maua palota e 1,704, tusa lea o le 14.4%.

O le manumalo ai o Uifaatali i le faiga palota o lenei tausaga, ua tula’i mai ai lona sauni atu mo lana nofoaiga lona 4 i le nofoa o le atunuu i le laumua i Uosigitone.

I le toe filifilia ai o ia e le atunuu mo le isi 2 tausaga, na faafetaia ai e Uifaatali le tofa saili a le atunuu lea ua toe filifilia ai o ia e avea ma sui i le laumua i Uosigitone.

“Ua segia lo’u mauli. Ta te matamuli. O ai le tagata noa ua e manaia. Faafetai. Faafetai tele lava Amerika Samoa,” o le saunoaga lea a Uifaatali.

Sa ia faafetaia fo’i sui tauva e to’alua sa latou tausinio mo lenei faamoemoe. 

“Lau susuga Meleagi Suitonu-Chapman, lau susuga Oreta Mapu Crichton, a tuutuu i le loloto o gafa e tasi le tupuaga o i tatou uma. Malo le tausinio faafetai le taupati. Se leaga o le itupa e au lana inailau. E lelei le palei le tofi, ae sili ona taua lo tatou nonofo fealofani ma le fetausia’i.”

O le a lomia i le isi a tatou lomiga le atoaga o le saunoaga a le tofa a Uifaatali e tusa ai o le toe filifilia o ia mo le isi 2 tausaga.

E tusa ai ma le ripoti mai le Ofisa o Palotaga a le atunu’u, e tusa ma le 11,833 le aofa’i o tagata sa palota mo le tofi faipule i le laumua i Uosigitone i lenei tausaga palota.

PALOTA MO FAIPULE O LE MAOTA O SUI

I le tausinioga a le Maota o Sui mo tofi Faipule mai Itumalo taitasi, o le a mafai ona maua atu se atoaga o lenei tausinioga i le tatou lomiga o le a sosoo ai.

Ae tusa ai ma le faaiuga le aloaia na mafai ona tuuina mai e le Ofisa o Palota, ua toe filifilia mai ai le afioga i le Fofoga Fetalai ia Savali Talavou Ale e fai ma Faipule mo le Itumalo o Alataua mai sui tauva e to’atolu sa latou tausinio i le palota o lenei tausaga.

E to’a 5 sui Faipule e le i manuia a latou taumafaiga mo nofoa a latou Itumalo mo le isi 2 tausaga, ae to’a 5 fo’i sui faipule fou ua manuia a latou taumafaiga mo le sailiga tofi a le atunu’u i le aso ananafi. 

O Faipule fou e to’alima e aofia ai le sui ua leva fo’i ona avea ma Faipule o le Maota o Sui i nofoaiga e tele ua mavae, le tofa a Lavea Fatulegae’e Palepoi Mauga, ma sui fou e to’afa o le ulua’i taimi lenei ua filifilia ai i latou i nofoa o a latou itumalo.

O le a mafai ona tuuina atu le atoaga o le faaiuga o le sailiga tofi mo afioga i Faipule i le Maota o Sui i le tatou lomiga o le a sosoo ai nei.