Pago Pago - AMERIKA SAMOA

E fa ni fautasi na tauva i le Fa’agatama i le Tai mo le faamanatuina o le 25 tausaga a le kamupani telefoni a le Bluesky, ua fa’aleaogaina o latou tulaga i le tu’uga, ina ua o latou le usita’ia tulafono o le tu’uga.

O sa nei e aofia ai sa uma e lua a le Manulele Tausala mai i le afioaga a Nu’uuli, o le Fealofani Samoa mai i le afioaga o Fagasa faapea le Paepaeulupo’o mai i le afioaga o Aua.

Sa faia lenei fa’ai’uga a le komiti a le Bluesky sa mata’ituina lenei tu’uga fautasi, ina ua mae’a ona o latou iloiloina ata sa pu’eina e masini pu’eata.

Ma i le faia ai o lenei fa’ai’uga a le komiti a le Bluesky, sa faapea ona tu’uina atu ai loa le manumalo i le sa o le Matasaua mai i le Manu’atele ma ua tusia ai nei o latou igoa i tala fa’asolopito a Amerika Samoa, i le latou ulua’i manumalo i Fa’agatama o le Tai.  Fa’atasi ai ma le latou fa’ailoga tupe e $10,000.

O le sa mai i le afioaga o Pago Pago, le Aeto, ua mauaina le tulaga lua ma le latou fa’ailoga tupe e $8,000.  O le tulaga tolu, sa faapea ona faapaleina ai le Lupelele mai i le afioaga o Iliili, faatasi ai ma le fa’ailoga tupe e $6,000.  Ma le tulaga fa sa faamanuiaina ai le Iseulaolemoana mai i le afioaga o Fagatogo, ma le latou faailoga tupe e $4,000.

E ui ina sa iva fautasi na fa’amoemoe e auai i le tu’uga va’a lona lua a le Bluesky i lenei tausaga, ae peitai, sa na’o le valu va’a na mafai ona tausinio, ina ua afaina le sa a le afioaga o Vatia, le Fua’o, i le latou toleniga i le aso Lulu o le vaiaso ua tuana’i, a’o loma le tu’uga i le aso Tofi.

Ma e pei lava fo’i o tu’uga va’a i taimi tuana’i, sa feagai foi lenei tu’uga ma ona fo’i fa’afitauli, e pei ona amata mai ai lava i le taimi na pa ai le fana se’ia o’o lava i le fa’ai’uga.

Ona o tulaga fa’aletonu i tala o le tau, aemaise ai o le popolega i le saogalemu o auva’a taitasi, sa faapea ona toe tu’utu’u mai ai i gatai o Fagatogo ia le amataga o le tu’uga.  Ma e ui ina sa iai se faamoemoega e amataina le tu’uga i le 7:30 i lea taeao, ae peitai ane, e pa ifo le fana amata, ua lima minute e te’a ai le valu.

Na fa’amamafaina i se fonotaga sa faataunuuina ae e le’i o’o i le aso o le tu’uga, lea na auai ai kapeteni o sa ta’ita’i ma le komiti sa fa’afoeina lenei fa’agatama, le le amataina o le tu’uga se’ia vagana ua laina fa’atasi uma sa i tulaga ua mae’a ona fa’atulagaina ai i latou.

I le amataga o le tu’uga na va’aia ai le muamua i luma o le Manulele Lowrider, le Fealofani Samoa faapea le Paepaeulupo’o.  Soso’o mai ai i tua ma le Aeto mai Pago Pago, le sa lona lua a le afioaga o Nu’uuli, le Lupelele mai Iliili, le Iseulaolemoana mai Fagatogo faapea le Matasaua mai Manu’a.

Ina ua taunu’u tonu lava ia sa mai Nuuuli, Fagasa ma Aua i le uafu tele a le malo i Fagatogo, sa va’aia loa le sese’e atu i luma o le Fealofani, ma ta’imua ai i nofoa e 12.  Soso’o mai ai ma le Aeto, Lupelele ma le Matasaua, ae o lo’o finau malosi mai pea i tua ia le Manulele Tausala ma le Iseula.

Sa fa’aauau pea ona sau ai lava le tu’uga, i le pito i luma o le Fealofani i nofoa e 12, a’o tauivi mai pea le Manulele Lowrider ma le Paepaeulupo’o.  Ma ua lata ina o’o mai le tu’uga i le ogasami malu, e sese’e gofie ai va’a.

Na va’aia le toe amata ona toe sese’e ese mai i luma o le Lowrider a Nu’uuli pe a ma le 2 i le 3 nofoa, mai i le Paepaeulupo’o ae sa le’i fa’avaivai ai le ‘e’eli o foe a le auva’a mai i Aua.

Ae o le taimi lea ua taunu’u tonu ai lava le Fealofani Samoa i gatai tonu lava o le Rainmaker, i le mea sa sou ai tele le sami ma amata ona tulaga fa’aletonu ai lo latou sa.  O i’ina sa maua ai loa ma le avanoa a le sa o Nu’uuli ma amata loa ona se’e ese mai i le Paepaeulupoo ma tuliloa mai le Fealofani.

O seisi faafitauli na tula’i mai, ina ua filiva’a ia le Fealofani ma le Paepaeulupoo ma sa molimauina le tula’i mai o se fe’ese’esea’iga i le va o auva’a e lua, ma i’u ai ina sa’e le Fealofani.  Na faapea ona fa’atopetope atu le vaega a Leoleo ma le Marine Patrol e lavea’i mai le auva’a.

A’o tula’i mai lea fa’afitauli, sa tatalaina ai loa le avanoa e se’e atu ai le sa a Nu’uuli i le tigi.  Na soso’o atu ai ma le Matasaua mai Manu’a lea sa sau lava mai i le pito i tua.  

Ae peita’i ane, i le fa’ai’uga sa fa’aleoina e le komiti a le Bluesky ina ua mae’a ona faia sa latou iloiloga ma su’esu’ega, sa fa’amautuina ai le fa’aleaogaina o le manumalo a le Manulele Lowrider, faapea ai ma le Fealofani Samoa, Paepaeulupoo ma le Manulele Tausala 2, ona ua le usita’ia tulafono o le tu’uga.

E pei ona sa fa’alauiloa mai i se fa’aaliga fa’alauaitele mai i le pulega ma le komiti fa’afoe o le tu’uga va’a, a le Bluesky, na ta’ua ai le le’i faigofie ona faia o le fa’ai’uga mautu e pei ona iai nei le tu’uga o lenei tausaga.

Ae petai, o se fa’ai’uga ua mafai ona ‘autasi ai le Komiti o le Tu’uga Fautasi faapea ma kapeteni o sa ta’itasi.

Sa fa’aalia le agaga fa’afetai ma le fa’amalo i afio’aga uma sa auai a latou sa, faapea ma kapeteni o sa ta’itasi, i lo latou lagolagoina o le faaiuga ua faia.

E to’atele nisi o le mamalu o le atunu’u sa fa’aalia lo latou lagolagoina ma le sapasapaia o le fa’ai’uga ua tu’uina mai, e ala i a latou manatu fa’aalia i luga o upega tafa’ilagi.  Sa fa’aalia e nisi lo latou agaga fa’afetai i le komiti ona o lenei fa’ai’uga faigata ma le fa’amaoni, ua mafai ona faia, ma se fa’amoemoega maualuga, o le a mafai ona avea ma fa’ata’ita’iga tumau mo ni isi tu’uga o le a faia i le lumana’i.