Apia - SAMOA

E to’alima ni leoleo sa galulue i le falepuipui i Tanumalala i Samoa, ua fa’amalolo mai a latou tiute, a’o fa’aauau su’esu’ega a leoleo i tu’uaiga e faapea, na o latou fesoasoani i le sola’aga a le alii pagota o Lauititi Tualima.

Ua faapea ona fa’amaonia e le Komesina a Leoleo, le susuga ia Auapa’au Logoitino Filipo ia le amataina o le su’esu’ega a le latou ofisa ma afai ae fa’amaonia i a latou su’esu’ega ia le a’afia o leoleo nei e to’alima, o le a fa’apea loa ona molia i latou i le tulafono ma fa’ate’a ai loa i latou mai i le ofisa a leoleo.

Sa fa’alauiloa e Auapa’au i le Samoa Observer, le tatalaina o Tualima mai i lona sela, ina ia mafai ona auai i se polokalame a le falepuipui, ma o iina, o lo’o masalomia, na fesoasoani ai ni leoleo i le sola’aga a le alii pagota.

Na ta’ua foi e Auapa’au le taofia o lenei polokalama, a’o feagai ai lo latou ofisa ma a latou su’esu’ega.

O Tualima na sola mai i le falepuipui i Tanumalala i le fa’ai’uga o le masina o Ianuari o le tausaga nei ae na mafai ona toe pu’eina o ia i le aso 17 o Mati, i se nofoaga e tu lata i le a’oga tulaga muamua a Aele.  

Ae ua mafua ona masalomia ia leoleo, ona o le taimi na sola ai le alii pagota, i le 7 i le afiafi.

Na mauaina Tualima i totonu o ni fale nofo totogi, i tua o le malae lakapi a le aoga tulaga muamua a Aele ma sa molimauina e se sui a le Samoa Observer, ia le fa’atumulia o lea nofoaga i le taimi na ta’ita’iina mai ai e leoleo ia Tualima, ma ona lima ua lokaina.

Na fa’aalia e le ofisa a leoleo le agaga fa’afetai i le mamalu lautele ona o le latou fesoasoani, ua mafai ai ona toe mauaina le alii pagota.

Ma na ta’ua foi e Au’apa’au le iai o se avanoa e ono molia ai i latou o lo’o nonofo i le fale nofo totogi, pe afai ae fa’amaonia lo latou fa’alafiina o le le alii pagota.

Sa saunoa Auapa’au, o le taimi nei, e leai seisi o molia i le fa’alafiina o Tualima, ae o lo’o fa’aauau pea a latou su’esu’ega.

Ae le gata i lea, a’o fa’aauauina pea su’esu’ega i le sola ‘ese a Tualima mai i Tanumalala, ua molia o ia i lana sola’aga ae e le i fa’amautuina se aso e tula’i ai i luma o le faamasinoga, e tali i lona moliaga fou.

O Tualima o se pagota ua lauiloa i le faomea, gaoi, osofa’ia o fale a tagata, fa’amalosi tamaitai, fa’ao’o manu’a i tagata ma e le o se taimi muamua lenei ua sola ‘ese ai mai i le falepuipui.

O Tualima, lea ua atoa lona 32 tausaga, sa ta’usalaina i se faalavelave lea na ia saisaia ai se tamaloa turisi mai i Ausetalia, ae fa’amatamata, a’o ia (Tualima) fa’amalosia lona to’alua, i le faletalimalo a le Lupe Sina i le tausaga 2015, i le na’o le 23 tausaga o lona soifua.