Ads by Google Ads by Google

Masalomia ni gaioiga fa’aaoga le tatau o tupe Ofisa o Auaunaga Lautele


[ata: foa'i]
ausage@samoanews.com

Pago Pago, AMERIKA SAMOA

 

O loo tau tu’ua’i solo lava afioga i Faipule poo ai na avatua faanana i totonu o le Maota o Sui se faila o lo o taua ai gaioiga le faamaoni ma le soona fa’aaoga le tatau o tupe a le feterale i totonu mai le Matagaluega o Auaunaga ma Tautua Lautele e se Kamupani Tuamoti.

 

O le aso Faraile o le vaiaso na te’a nei na tau aao ai e afioga i Faipule se faila o loo i ai ni faamaumauga e faatatau i le kamupani tumaoti e faaigoa o le “Center for Families of Individuals with Developmental Disabilities” (CFIDD), o se kamupani e fai paaga ma le Vaega e taua o le “American Samoa Development Disabilities Planning Council” (ASDDPC), o se tasi o auaunaga o loo ofo atu e le Matagaluega o Auaunaga ma Tautua Lautele a le malo o Amerika Samoa (DHSS).

 

I faamaumauga o loo i totonu o le faila o loo taua ai, i le va o le tausaga e 2017 seia oo mai i le masina o Ianuari o le tausaga nei, 2021, na maua ai e le CIFDD se vaega tupe e silia ma le $240,000 mai le DDPC mo le faatinoina o auaunaga eseese e fesoasoani ai i aiga o i latou e i ai manaoga faapitoa.

 

E le iloa poo ai na tufatufaina faamaumauga nei i afioga i ali’i faipule.

 

I le taimi o le tauaofiaga a le Maota o Sui i le aso Faraile na te’a nei, na tula’i ai le Taitaifono o le Komiti o Tautua  ma Auaunaga Lautele a le Maota o Sui, afioga Su’a Alexnader Eli Jennings ma faailoa i afioga i Faipule le suia o le taimi o le iloiloga mo Muavaefaatasi mai le 8:30 i le taeao i le 11:00 i le taeao lava o le aso Tofi nei.

 

Na faamanino e Su’a i le Fofoga Fetalai le mataupu e faatatau i le faila lea ua tauaao e afioga i Faipule, o lo o taua ai tu’uaiga oga oga faasaga i le auaunaga a le Matagaluega o Tautua ma Auaunaga Lautele, e manaomia fo’i se taimi e iloilo muamua ai e le Komiti nei faamaumauga ao lei oo atu i le taimi o le iloiloga.

 

Na taua atili e Su’a lona talitonuga, e le tatau ona faalauiloa faalaua’itele faamaumauga o loo i totonu o le faila, ona e ono aafia ai aia tatau o tagata faigaluega a le Matagaluega o loo taua i luga o nei faamaumauga. Sa ia fautuaina fo’i le Fofoga Fetalai ina ia taoto atu le faila e silasila i ai le Loia a le Fono a o le i faia i ai se faaiuga a le Komiti.

 

Na fesili le afioga i le Fofoga Fetalai ia Savali Talavou Ale ia Su’a, poo ai na tufatufaina faamaumauga i afioga i Faipule, ae na saunoa Su’a, na te le iloaina poo ai na auala atu ai le faila i totonu o le maota. 

 

Saunoa Savali e faapea, e i ai lava tulafono ma ta’iala a le Maota e faatatau i mataupu faapenei e tatau ona mulimuli ta’i ai afioga i Faipule.

 

Na lagolagoina e le afioga i le Faipule mai le afioaga i Aua ia Faimealelei Anthony Fu’e Allen le finagalo o le Fofoga Fetalai. Saunoa Faimealelei e faapea, e fai lava si matuia o tu’uaiga o loo taua i faamaumauga nei e tatau ona silasila toto’a i ai le maota. O lona popolega o loo i ai, ina ne’i faalauiloa suafa o i latou o loo taua i luga ona avea lea ma auala e aafia ai o latou aia tatau i lalo o le tulafono.

 

O le Faatonusili filifilia o le Matagaluega ia Muavaefaatasi, na faatoa taliu mai i tua i le aso Gafua na te’a nei, i le mae’a ai lea o aso e 14 na taofia ai i totonu o le nofoaga o le quarantine i le Tradewinds Hotel i Tafuna, faatasi ai a isi tagata e to’a 159 na malaga mai i le ulua’i malaga a le va’alele na toe faafo’i mai ai le mamalu o le atunu’u na taofia i Hawaii ma Amerika, e mafua mai ina ua taofia malaga a va’alele ona o le faama’i o loo vevesi ai le lalolagi.

 

Ina ua fesiligia e le Samoa News ia Su’a e uiga i lenei mataupu i le mae’a ai o le tauaofiaga a le Maota, sa ia teena ai faamatalaga e faapea o ia na auala atu ai le faila i totonu o le maota. Saunoa Su’a e faapea, na te lei iloaina poo ai le tagata na auala atu ai le faila i totonu o le maota, e le o ia foi na tufatufaina. 

 

Sa molimauina e le Samoa News i le taimi a o lumana’i ai le tatala o le tauaofiaga, o tamaitai faigaluega a le maota o sui na laua tufatufaina kopi o le faila i afioga i Faipule.

 

I le tauaofiaga a le Maota o Sui i le aso Lua o le vaiaso nei, na toe talanoaina ai fo’i le mataupu lava lenei, ina ua faasea le afioga a Su’a i se ripoti na faasalalau e se Leitio Faasalalau, ma tu’uaia ai e faapea, o ia lea na tufatufaina atu kopi o le faila i afioga i Faipule i le aso Faraile o le vaiaso na te’a nei.

 

Na taua e Su’a lona naunau e faasa’o le ripoti ina ne’i tu’uaia sese ai fua o ia i lenei faila. 

 

E le i nofo lelei le finagalo o le Sui Fofoga Fetalai ia Fetu Fetui Jr le saunoaga a Su’a. Na faailoa e Fetu ia Su’a lona le fiafia tele i le fesuisuia’i o ana saunoaga.

 

“Ua uma ona fai le ta tala i le aso Faraile e uiga i le faila lea, lea fo’i sa ta talanoa ai i tua, a o lea ua toe sui mai lau tali. Aua e te fefe e faailoa le mea sa’o, o le mafua’aga lena e fesuisuia’i ai au faamatalaga,” o le saunoaga lea a Fetu ia Su’a.

 

Na fautuaina e Savali ia Su’a ina ia susu sa’o lava i le tusitala o le Leitio na tusia le ripoti e faailoa i ai lona finagalo, ae aua le faaalia i luma o le Maota e le maua ai se tali mautu i lana mataupu.

 

O le faila e pei ona vavao ai le maota o sui, e fa’atatau i le faalapotopotoga tumaoti o le CFIDD o lo o fai paaga ma le Vaega o le DDPC, o se tasi o Vaega i lalo o le faamalu a le Matagaluega o le DHSS.

 

O loo taua i faamaumauga e faapea, e i ai ni vaega tupe tetele na maua e le CFIDD e totogi ai le faatinoina o auaunaga ma tautua sa latou ofoina atu i aiga o i latou o loo aafia i manaoga faapitoa o le tino, e ui o loo manino le to’atele, e leai ni auaunaga faapea na faia e lenei Faalapotopotoga mo aiga o i latou e i ai manaoga faapitoa o le tino.

 

O loo taua i le ripoti le talosagaina lea e le CFIDD o vaega tupe nei mai le DDPC e faatupe ai auaunaga e tele o loo latou ofoina atu i aiga o i latou e i ai manaoga faapitoa o le tino. O le va o le tausaga e 2017 ma le masina o Ianuari o le tausaga nei 2021 na maua ai e le CFIDD nei faamanuiga.

 

Mo se faataitaiga, i le aso aso 15 o Aokuso, 2017, na faamanuiaina ai le CFIDD i le tupe e $45,978 mo le faatinoina o a latou auaunaga ma tautua masani.

 

O le aso 4 o Mati, 2019 na maua ai e le CFIDD le $40,000 mai le DDPC mo le faatinoina o tautua ma auaunaga mo aiga o i latou e i ai manaoga faapitoa o le tino.

 

O le aso 31 o Tesema 2020, na faamanuiaina ai fo’i le CFIDD i le vaega tupe e $40,000 mai le DDPC.

 

O le aso 4 o Ianuari 2021, e $139,000 na maua e le CFIDD mai le DDPC mo le faatinoina o lenei auaunaga. E 5 talosaga eseese a le CFIDD na tuuina atu mo lenei vaega tupe, ma latou maua ai loa le aofai e pei ona taua.

 

Ae i le aso 12 o Ianuari lava lea, na toe faamanuiaina ai le CFIDD i le vaega tupe e $10,185 mai le CFIDD.

 

Na taua e ni isi o sui sinia mai le Ofisa o Tautua ma Auaunaga Lautele e faapea, ua tele tausaga e le o toe i ai le auaunaga a le CFIDD, ma o le mafua’aga fo’i lea ua fesiligia ai nei mau tupe fesoasoani poo fea o aga i ai.

 

O le latou Ofisa sa i ai lea i Tafuna, peita’i e le o toe i ai lea Ofisa e oo mai i le taimi nei. 

 

Na maua le avanoa o le Samoa News e fesiligia ai le Tamaitai o loo faauluulu i ai le CFIDD e uiga i lenei mataupu, lea fo’i sa maua lona avanoa e faailoa mai ai lona itu o lenei mataupu.

 

O le aso a taeao lea ua faamoemoe e sosoo atu ai le isi vaega o lenei ripoti e tusa ai ma le talanoaga ma le Tamaitai e faauluulu i ai le CFIDD.