Ads by Google Ads by Google

Maua fualaau faasaina i le alii talavou na pu’e e Leoleo ona o tu’uaiga o le gaoi


[ata: foa'i]
ausage@samoanews.com

Pago Pago - AMERIKA SAMOA

 

Ua tu’uaia nei e le malo se alii talavou e 24 tausaga le matua i moliga o le umia faasolitulafono o fualaau faasaina o le aisa ma le mariuana, ina ua pu’e faapagota o ia e Leoleo i le masina na te’a nei e mafua mai i tu’uaiga o lona osofaia lea o se fale ma se faleoloa ae ave faagaoi meatotino sa i totonu ae maua ai e Leoleo fualaau faasaina ia te ia.

 

E tusa ai ma le tagi a le malo, e 2 fale na osofa’i e le ua molia ma lana uo, faapea ai ma se Faleoloa, ae maua ai loa le isi to’atasi e Leoleo ae sola le isi to’atasi.

 

O le ali’i na maua e Leoleo ma pue faapagota, o ia lea o Saipani Vaalotu, ae o lo o tau sailia pea i le taimi nei lana uo na sola ese ma Leoleo, le alii e igoa ia “Wayne”. Ua talosagaina e Leoleo le mamalu o le atunu’u ina ia fesoasoani atu i le tau sailia o le alii talepefale e ala i le tuuina atu o ni fa’amatalaga mai soo se tasi na te silafia le tulaga o lenei fa’aalavelave.

 

Ina ua fesiligia e Leoleo le susuga a Vaalotu e tusa ai o le fa’alavelave e pei ona tu’uaia ai o ia, sa ia ta’ua ai e fa’apea, sa la fuafua ma lana uo la te osofaia fale o aiga ma faleoloa i le po, a o pisi ai tagata i fuafuaga o le palota atoa ai ma le pisi o isi i le puipuiga o le faama’i oti o loo vavao ai le atunuu ma le lalolagi i le taimi nei.

 

I se tasi o po i le masina o Novema na te’a nei e pei ona taua e le malo i le latou tagi ua faaulu nei i luma o le Fa’amasinoga, na talosagaina ai e se Tina mai Tafuna le fesoasoani a Leoleo, ona o ni alii se to’alua na maua o la osofaia se faleoloa, ua sola le to’atasi ae o loo taofia e tagata o le pitonuu le isi to’atasi. 

 

Na taunuu Leoleo ma latou vaaia ai se alii pe tusa ma le 50 tausaga le matua o loo ia taofia le lima o se alii talavou. O lea ali’i talavou o Saipani Vaalotu lona igoa, o ia lea o loo molia i lenei mataupu. O le ali’i na sola ese e iloa i le igoa tau valaau ia Wayne, o le uo lea a Vaalotu sa la to’alua i le taimi o le osofaiga o fale na aafia ma le faleoloa.

 

Na faamatala e le ali’i lea na ia puea ia Vaalotu i Leoleo e fa’apea, o ia na alu e momoli lana uo teine i le galuega, peita’i na galo ona tapuni le faitoto’a pito i luma o lona fale. Pe tusa ma le itula le umi na alu ese ai o ia, ae ina ua toe fo’i mai, na ia molimauina sa i ai le tagata i totonu o lona fale, ona o nisi o meatotino sa i totonu ua taape solo.

 

Na ia siaki lana ato tupe sa i luga o le laulau i totonu o le potu ua gaoia, sa ia iloa fo’i ua aveese lana laptop ma le telefoni sa i luga o le laulau i luma o le potu malolo. O nisi o ato i totonu o le potu malolo ua save’u solo ma tauai i lalo lavalava.

 

Sa taamilo solo le alii e ana le fale i fafo o lona fale e tau saili le tagata na faatinoina lenei gaioiga le alofa i lona fale, ae tau atu ai loa ma lana vaai i ni alii talavou se to’alua o loo tutu mai i le faitoto’a pito i tua o le faleoloa o loo i luma o lona fale. Sa ia manatu o loo taumafai le au alii talavou nei e to’alua e osofa’i le faleoloa, peita’i na toe manino i lana vaai, ua uma ona osofa’i e le au alii ia e to’alua le faleoloa, ona o loo taatitia i o la tafatafa oloa mai totonu o le faleoloa.

 

Vave ona iloa mai e le alii o Wayne le aga’i atu o se tagata ia te i laua, ma ia tago ai loa i le ato sa ia tuu i ai oloa na gaoi ma tamo’e ese loa, ae maua ai na o le alii o Vaalotu i tua o le faleoloa, ma ta’ita’i atu ai loa e le alii lea ia Vaalotu i luma o lona fale ma fesiligia ai.

 

Ina ua fesiligia e le alii e ana le fale lea na osofa’i muamua ia Vaalotu poo laua na osofaia lona fale, na tali Vaalotu, ioe, o laua na osofaia lona fale, o loo ia te ia lana ato tupe ae o le laptop ma le telefoni o loo alu ma lana uo.

 

E to’atasi le isi molimau na fesiligia e Leoleo e uiga i lenei mataupu, ma ia taua ai lona vaaia o alii talavou e to’alua o loo tuli oso i totonu o le faamalama o le faleoloa, ma ia faafesootaia ai loa le telefoni o le 911 ma logo i ai le faafitauli.

 

Na faamaonia e Leoleo, sa i ai le isi tagata na vili atu e faatatau i ni alii se to’alua o loo osofaia le Faleoloa. Pe tusa o le 2 minute talu ona tuana’i lea valaau, ae valaau atu loa ma le isi telefoni e logo atu ua ma’ea ona pu’e e se alii le tasi o alii talavou na osofaia le Faleoloa.

 

A o le i auina atu Vaalotu i le Ofisa o Leoleo mo suesuega, na faia muamua se suega faapitoa i lona tino mo aupega ma fualaau faasaina. Ina ua saili e Leoleo le tino o le ua molia, sa latou maua i ai ni paipa tioata se 2 o loo i ai vaega o le pauta faasaina o le aisa. Na toe saili e Leoleo le isi taga o le ofu a Vaalotu ma maua i ai sikaleti mariuana e 2 ua mae’a ona taai ua sauni e ula ma fa’aaoga.

 

Na malie Vaalotu e talanoa i Leoleo e faatatau i le faalavelave e pei ona pu’e faapagota ai o ia. Sa ia taua i Leoleo e faapea, o le autu o le la osofaiga, o le sailia lea o ni meatotino mai totonu o fale o aiga ma faleoloa e faatau atu ina ia maua ai tupe e faatau ai fualaau faasaina mo i laua, a o pisi ai tagata i fuafuaga o le palota faapea ai fuafuaga faaleaiga i nisi o aiga.

 

Sa ia ioeina lo la osofaia ma lana uo o ni fale se 2 faapea ai ma se faleoloa se tasi, ma, o le tele o oloa na gaoia mai fale ia e 2 ma le faleoloa, o loo alu uma lana uo o Wayne. O fualaau faasaina sa maua ia te ia, o meatotino lava a ia na maua mai i lana uo ma le fa’amoemoe e ula ma fa’aaoga e eva ai.

 

E le i mafai ona faailoa e Vaalotu i Leoleo le igoa moni o lana uo, se’i vagana ai le igoa tauvalaau o Wayne

 

Ua talosagaina e le Ofisa o Leoleo le atunu’u mo soo se tasi na te silafia se faamatalaga e faatatau i le alii e igoa ia Wayne ina ia faafesoota’i vave atu le Ofisa o Leoleo i soo se taimi.

 

O le masina na te’a nei na tula’i ai Vaalotu i luma o le Faamasinoga Faaitumalo mo lana ulua’i iloiloga. 

 

Ua molia o ia e le malo i le moliaga o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o vaega o le laau faasaina o le mariuana, o solitulafono mamafa ia e mafai ona faasala ai se tasi i le toese mai le 5 e oo atu i le10 tausaga, pe faasala i le salatupe e le sili atu i le $20,000, poo le faasala foi i faasalaga uma ia e lua.

 

O lo o molia fo’i Vaalotu i moliaga e 3 o le talepe fale i le tulaga muamua; 2 moliaga o le gaoi, o le vaega C lea o solitulafono mamafa, lea e mafai ona faasala ai se tasi si le Toese mo le umi e le silia i le 7 tausaga, pe faasala i le salatupe e le silia i le $5,000, pe faasala fo’i i faasalaga uma ia e lua.

 

O le vaiaso fou lea ua faatulaga e faia ai le ulua’i iloiloga o lenei mataupu. 

 

E $15,000 le vaega tupe lea ua fa’atulaga e tatala ai i tua le ua molia. Afai ae tatala o ia i tua, e le mafai ona ia toe taumafai e faafesootai molimau a le malo e aofia ai lona taufafine ma le alii na aafia, e le mafai fo’i ona ia taumafai e tuua faamalosi le atunu’u, a ia avea o ia ma tagatanu’u lelei e tausisi i soo se tulafono a le malo, ma ia auai i soo se taimi e faatulaga ai aso ma taimi o ana iloiloga.

 

O le tausaga e 2013, na ta’usala ai e le Faamasinoga Maualuga le ali’i o Vaalotu i le moliaga o lona fesoasoani lea i nisi tagata e faatino le solitulafono o le gaoi, o le vaega D lea o solitulafono mamafa. E 20 masina na taofia ai Vaalotu i le Toese i Tafuna, o se tasi lea o tuutuuga o lana nofovaavaaia e 5 tausaga le umi, lea na mae’a i le tausaga e 2018.