Ads by Google Ads by Google

Maua fualaau faasaina i totonu o le Toese i Tafuna ina ua osofa’i e Leoleo


[ata: foa'i]
ausage@samoanews.com

Pago Pago, AMERIKA SAMOA

 

E lei umi se va na fesiligia ai e le afioga i le Faamasino Sili le leai o se malu puipuia o le Toese i Tafuna i le sao lea i ai o fualaau faasaina, ae alia’e mai loa se mataupu i le vaiaso na te’a nei ina ua osofa’i e Leoleo Suesue a le CID ma le Vaega e Suesueina Fualaau Faasaina  le Toese i Tafuna ae maua ai fualaau faasaina.

 

O se fusuaga i le va o pagota o loo taofia i le Toese i Tafuna na alia’e mai i le vaiaso na te’a nei, na mafua ai loa ona osofa’i e Leoleo Suesue totonu o sela o alii pagota na aafia i lenei faalavelave, ma maua ai fualaau faasaina, e pei ona faamaonia mai e le Pule fou o le Toese i Tafuna, le afioga Falana’ipupu Taase Sagapolutele.

 

E to’alua alii pagota ua masalomia i faalavelave eseese nei e lua, ma ua i ai nei i laua i lalo o suesuega faapitoa a Leoleo. O faalavelave eseese e lua e aofia ai le mataupu e pei ona faaoolima ai se alii pagota i se isi alii pagota ma manu’a tigaina ai, faapea ai ma le mataupu i fualaau faasaina na maua i totonu o le Toese.

 

E talitonu le Samoa News ua sauni le malo e faila moliaga faasaga i ali’i pagota e to’alua e pei ona masalomia i nei faalavelave eseese e lua, ma ua faamoemoe o se taimi o i luma e tutula’i ai i laua i luma o le Fa’amasinoga Faaitumalo mo le ulua’i taimi pe afai e mae’a ona faila e le malo tagi faasaga ia te i laua.

 

Na taua e se molimau i le Samoa News e faapea, o se vevesi na tula’i mai i totonu o le Toese i le va o ni ali’i pagota, na faai’u ai i le manu’a tigaina o le isi alii pagota ina ua fa’aaoga e se isi alii pagota se filifili u’amea e sasa ai lona ulu.

 

E le o manino lelei mai i le taimi nei le mafua’aga o lenei faalavelave, na pau le faamatalaga a le molimau, o le vevesi na tula’i mai i le va o alii pagota mai le nofoaga o Le Aute ma Le Filifili, ma ali’i pagota mai le afioaga i Vaitogi, ma i’u i le manu’a tigaina ai o se alii pagota mai Vaitogi.

 

Na taua e se sui o le aiga o le alii na manu’a i lenei faalavelave i le Samoa News e faapea, o le manu’a tigaina ai o se sui o le latou aiga i lenei faalavelave, o se tulaga e le o nofo lelei i finagalo ma manatu o le aiga, ona o le talitonuga maualuga o loo i ai, e tatau ona malu puipuia pagota o loo taofia i le Toese i lalo o le vaavaaiga a le malo.

 

Na taua atili e le sui o le aiga o le alii pagota na aafia i lenei mataupu e faapea, o le alii lea na faaoolima i le tagata o lona aiga na manu’a, sa le tatau ona tatalaina i tua, peita’i, e le o manino lelei pe na faapefea ona tatala i tua le alii lea ma faaoolima i le alii pagota na manu’a.

 

“E tusa ai o le faamatalaga ua oo mai i le matou aiga, sa le tatau ona tula’i mai lea faalavelave, peita’i e atagia mai i le mea sa tupu o se gaioiga na fuafua lelei ina ia maua le avanoa e faaoolima ai i le alii pagota na aafia,” o le molimau lea a le sui o le aiga o le alii pagota na aafia. 

 

Na taua atili e le molimau i le Samoa News e faapea, e ono tuuina atu se tagi a le aiga faasaga i le malo ona o le faalavelave e pei ona manu’a tigaina ai le alii pagota na aafia i lenei mataupu.

 

Ina ua fesiligia e le Samoa News le afioga a Falana’ipupu e tusa ai o lenei mataupu, sa ia teena ai ripoti e faapea o se gaioiga na fuafua le faalavelave e pei ona tula’i mai ma aafia ai le alii pagota na aafia. 

 

Na faamanino e le Pule o le Toese e faapea, o le vevesi  na tula’i mai, o se vevesi masani lava i le va o alii pagota, ae na vave lava ona foia lea faafitauli. Na taua atili e le alii pule o le Toese e faapea, o le mae’a ai o le faalavelave e pei ona tula’i mai, na ia talosagaina ai loa le fesoasoani a Leoleo Suesue latou te sailia totonu o sela o loo taofia ai alii pagota na aafia i lenei mataupu.

 

Na osofa’i e Leoleo Suesue sela o loo taofia ai alii pagota na aafia i le faaoogalima ma maua ai fualaau faasaina, e pei ona faamaonia mai e le Pule o le Toese.

 

Na taua atili e le Pule o le Toese e faapea, o le mataupu tau faaoolima ua taoto atu nei i Leoleo Suesue a le Vaega o Leoleo Suesue a le Ofisa o Leoleo, ae o le mataupu i fualaau faasaina, ua taoto atu nei i Leoleo Suesue o le Vaega e Gafa ma le Suesueina o Fualaau faasaina.

 

FAAFITAULI I FUALAAU FAASAINA

 

O le faafitauli i fualaau faasaina e ulufale i le Toese i Tafuna, e le o se faafitauli e fou i le faafofoga a le atunu’u aemaise lava i le Faamasinoga. Mai le tele o tausaga, e le o se taimi muamua lenei ua osofa’i ai e Leoleo le Toese ma maua ai fualaau faasaina.

 

I tausaga ua mavae, na faaauau mai ai lava e Leoleo a latou gaioiga o le sailia lea o fualaau faasaina i totonu o le Toese. 

 

E oo lava foi i le faafitauli i pagota o loo taofia i le Toese ae faamaonia i suega lo latou faaaogaina o fualaau faasaina, e le o se tulaga e fou i le faafofoga a le atunuu faapea le Faamasinoga. 

 

O taimi uma lava e faamaonia ai i suega a le Ofisa Nofovaavaaia le tagofia e pagota o fualaau faasaina o le aisa poo le mariuana, e manino mai ai masalosaloga o loo mafai lava ona sao fualaau faasaina i totonu o le Toese.

 

O le vaiaso na te’a nei na faagasolo ai i luma o le Faamasino Sili ia Michael Kruse iloiloga o alii pagota e to’alua, na tu’uaia i lo la le usitaia o tuutuuga o la nofovaavaaia. O se tasi o i laua, o le susuga lea a Sonny Mu Kelemete ua faamaonia lona le usitaia o tuutuuga o lana nofovaavaaia, ina ua musu e tuuina atu lona tino e faia i ai suega a le Ofisa Nofovaavaaia e faamaonia ai na te le o tagofia fualaau faasaina.

 

O le musu ai o Kelemete e faatino le suega ua faamaonia ai lona taumafai e ufiufi se gaioiga faasolitulafono.

 

O le isi alii pagota o le susuga a Sierra Isaia, lea na faamaonia i se suega sa faia i le aso 17 o Fepuari, 2021 lona tagofie o le pauta faasaina o le aisa. 

 

E ese mai i le mataupu faasaga ia Isaia ma Kelemete, na faia fo’i e sui o le Ofisa Nofovaavaaia se suega faasaga i ni alii pagota i ni ai tausaga e lei mamao atu mo le faamaonia o loo mama i latou mai le tagofia o fualaau faasaina.

 

I lea suega, na faamaonia ai le faaaoga e pagota e to’atolu o fualaau faasaina. O i latou ia e aofia ai John Tuupo, Junior Tolupo Hodges ma le susuga a Wayne Gasolo.

 

Na taua e Kruse i le vaiaso na te’a nei i le Sui Komesina o Leoleo, susuga a Foifua Foifua Jr, o ia fo’i lea sa avea ma Pule o le Toese mo le tele o tausaga, e foliga mai e le o i ai se aoga o pa sima maualuluga faatoa mae’a ona fausia ao lea lava e sao i totonu o le Toese fualaau faasaina.

 

I le tausaga na te’a nei, na molia ai e Leoleo se fafine faapea ai ma se Leoleo o le Toese, i lo la taumafai lea e faaulufale faanana se vaega o fualaau faasaina o le aisa i totou o le toese. 

 

O le Tina ia Josephine Samatua-Gauta ua molia e le malo i lona taumafai e faaulufale faanana se vaega tele o le pauta o le aisa i totonu o le Toese, ae o le alii Leoleo o le Toese ia Ofisa Enoka Leifi Jr ua molia i lona taumafai lea e fesoasoani ia Gauta i le faaulufale faanana o fualaau faasaina i le Toese.

 

Na faamanino e le susuga i le Sui Komesina ia Foifua Jr i luma o le Faamasinoga i le vaiaso na te’a nei e faapea, o le faafitauli i le pa sima o loo i ai, e maualalo tele le pito i tua o le pa sima, ma o le isi lena itu o lo o masalomia o loo atu ai fualaau faasaina i totonu o le lotoa, aemaise lava pe a tauai atu e nisi afifi i totonu o le lotoa o le toese.