Ads by Google Ads by Google

Maua le pine auro a Amerika Samoa i Afeleti o le 2024 i Fiti


[ata: foa'i]

Pago Pago - AMERIKA SAMOA

O le aso Sa (aso To’ona’i lea i Amerika Samoa), na amatalia ai Afeleti o le Pasefika  (Oceania Athletics Championships) i Suva, Fiti ma i lona aso muamua, na ausia ai e Amerika Samoa lana ulua’i pine, o le pine apamemea, ina ua tulaga tolu ia le alii o Stanley Iakopo i le tauvaga tamo’e mo le 60 maila, mo au ta’a’alo e 30 tausaga aga’i i luga.

O le aso lona lua, sa faapea foi ona toe maua ai le pine lona lua a Iakopo, ina ua manumalo i le tauvaga tamo’e ma puna (110m hurdles), ma ia mauaina ai le pine auro o lea miliga.

Na fa’aalia e Iakopo lona mitamita tele ona ua mafai ona ia ausia nei pine e lua mo Amerika Samoa ma sa ia ave ai le mua ma le fa’ane’etaga i le Atua.  Sa ta’ua foi e Iakopo o lo’o milo ai lava ma Amerika Samoa i totonu o tauvaga a malo malolosi e pei o Ausetalia ma Niu Sila.

O lo’o auai faatasi le susuga ia Iakopo ma ona alo e to’alua, i Afeleti faavaomalo o lenei tausaga.  O le tamaitai 18 tausaga o Filomenaleonisa ma lona atalii 17 tausaga o Mametto, ma o lo’o tauva fo’i i la’ua.  Na iai se faamoemoe e auai atu ai foi ma le atalii 16 tausaga, o Audiscott, ae peitai, ua le taulau lea faamoemoe ina ua manu’a i ana toleniga.

E le o se taimi muamua lenei ua ‘auai ai lenei tama ma ona alo i tauvaga tamo’e.  O le tausaga ua mavae sa faapea ona o latou tauva ai foi i Taaloga o le Pasefika lona 17, lea sa faia i Honiara, i le atu Solomona.

O le taimi mulimuli lava na tauva ai le tamaitai o Filomenaleonisa i tauvaga faavaomalo (international) o ta’aloga ia sa faia i Glasgow i Sikotilani ia Mati, lea na tauva ai ma nisi o tagata ta’a’alo malolosi o le lalolagi.

I se fa’atalanoaga ma le Samoa News, i ta’aloga o le Pasefika i le tausaga ua mavae, sa faaleoina e alo a le susuga ia Iakopo ia le u’una’aia malosi o i latou e si o latou tama, o le mafua’aga lea o le faamanuiaina o a latou taumafaiga.

Ma o a latou taumafaiga ua faapea ona fa’amalosia ona o le fesoasoani a le alii tamo’e Olimipeka o Peter Pulu, mai i Papua Niu Kini, lea sa paoa i ona vaitaimi o miliga tamo’e i le 1980, lea e o’o mai lava i nei ona po, e le’i tata’eina e seisi lana taimi tamo’e.

O Pulu, o se uo mafana a Iakopo mai vaitaimi o a latou toleniga, ma sa talosagaina o ia e Iakopo ina ia fesoasoani e koleni o ia ma lana fanau.  Ma sa faapea ona malaga atu Pulu i Saipan i le mea o lo’o fa’amautu ai Iakopo ma lona aiga, mo le faia o a latou toleniga.

O le amataga o le tausaga nei, na tu’ua ai e Iakopo ma lona aiga ia Saipan, lea na faamautu ai mo le silia ma le 20 tausaga, ma malaga mai i Amerika Samoa, lea o lo’o galue ai nei o ia o le Faatonusili o le Ofisa o Tagata Faigaluega a le LBJ.

Ma na amata mai lava I le 1980 o tamo’e o ia i lalo o le tagavai a Amerika Samoa i tauvaga faavaomalo.

I le masina o Aperila o le tausaga nei, sa manumalo ai Iakopo i le tauvaga tino mamaso (Bodybuilding) a le Sau Ia, lea ua pale ai nei o ia o Mr. American Samoa.

O seisi foi lea fa’agatama e pele i le agaga o le susuga ia Iakopo, talu mai lava ona ia manumalo i le tauvaga tino mamaso a’o talavou o ia, ma ia manumalo ai i le ulua’i tauvaga a le teritori, lea sa faia i le 1990.  Ma toe manumalo ai i le tauvaga i le 1992.

I le mae’a ai o le tauvaga ia Aperila lea na ia toe manumalo ai, sa faapea loa ona o latou tapenapena mo Afeleti lea o lo’o faagasolo nei i Fiti.  Ma o le vaiaso ua mavae na malaga atu ai i Saipan mo le fa’au’uga a lona afafine, ma o latou malaga sa’o atu ai lava i Fiti ma nai ona alo, e fai ma sui o Amerika Samoa.

E tolu miliga na tauva ai Iakopo, o le 100 mita, 200 mita ma le ‘long jump’.

Ae o Filomenaleonisa ma Mametto o lo’o tauva i le 100 mita ma le 200 mita.