Ads by Google Ads by Google

Maua se fesoasoani tau tupe mo ni va’a, tausiga o paka ma ‘amu i le a’au


[ata: foa'i]

Pago Pago - AMERIKQ AMOA

I se fa’aaliga fa’alauaitele mai i le ofisa a le sui Faipule a Amerika Samoa i totonu o Uasigitone, le tofa ia Uifa’atali Amata, ua fa’alauiloa mai ai le nofo saunia o Amerika Samoa mo se fesoasoani tau tupe mai i le Malo Tele, e fa’atauina ai ni va’a se lua e tautuaina femalagaiga a le teritori i le va o Tutuila ma Manu’a, ae le gata i lea, e mo le fa’aleleia atili o paka ma malae ta’alo faapea le faasaoina o amu i le a’au.

E $21.25 miliona mai i le Matagaluega o Femalagaiga a le malo Feterale (FTA) lea ua mae’a ona faamaonia mai, e faatau ai ni va’a se lua, e mafai ona faatinoina le tautua mo femalagaiga i le va o Tutuila ma Manu’a.

I le fa’aaliga a le sui Faipule, na ia momoli ai lana faamalo i le Ofisa o Galuega Lautele (DPW) mo le talosagaina o lenei vaegatupe. 

Sa faauluina e le tamaitai Faatonusili Faleosina Voigt ma lona ofisa ia se talosaga mo se vaegatupe e mafai ona faatauina ai se va’a ma le faalauteleina o lenei auaunaga, aua femalagaiga i le va o Tutuila ma Manu’a.  Ma i le taliaina o le taumafaiga a lenei ofisa a le malo, o le a faamanuiaina ai nei tagata o Amerika Samoa i ni va’a fou se lua, e sui tulaga i le MV Sili lea na le toe fealuai talu mai le 2018, ma faalauteleina ai lenei auaunaga.  

I le taimi nei, na o le MV Manu’atele lea o lo o faatinoina lenei galuega, aua femalagaiga a le mamalu o le atunuu, ma le la’uina o uta i le va o Manu’a ma Tutuila.

E tusa ai ma le talosaga a le DPW, o nei va’a fou e lua, o le a tutusa i le fausaga e aofia ai le uumi, i le va o le 100 ma le 130 futu, ma e mafai ona lauina ai ni pasese i le va o le 75 ma le 95, o lona saosaoa e o’o atu i le 12 nota.

Na ta’ua i totonu o le talosaga a le DPW le avea o le mauaina o nei va’a fou ma auala e mafai ona fa’amalosia ai aoaoga, pisinisi, galuega, ma avanoa faaturisi, ae le gata i lea, o le fa’aleleia atili o le fesootaiga ma tagata o Manu’a.

Sa saunoa le Failautusi o le Matagaluega o Femalagaiga a le Malo Tele, ia Pete Buttigieg, o nei va’a, o se vaega taua le i totonu o le tele o nu’u ma malo a le Iunaite Setete, ona e taua tele mo galuega, o tautua faale soifua maloloina, mo oloa ma tautua mo le tausiga o soifua – e pei o nu’u ma afioaga sa ia asiasi atu ai i Alaska Wisconsin ma le setete o Uasigitone.

Na ta’ua foi e Buttigieg, o le a mafai ona fesoasoani nei tupe (lea o le a faatauina ai nei va’a fou), e soso’o ai tagata ma avanoa ma alagamanuia e latou te manaomia.

Na fa’aalia e Amata lona agaga fa’afetai i le tamaitai Faatonusili o le DPW, ia Faleosina Voigt ma lana au ofisa ona o la latou galuega mae’ae’a ua mafai ona taliaina e le FTA la latou talosaga mo lenei vaegatupe ua mafai ona maua mai, e penefiti ai tagata o le atunu’u e le gata i nei vaitaimi aemaise le lumanai.  Na ta’ua foi e le sui Faipule ia le taua tele o le iai o ni ala o femalagaiga saogalemu.  E le gata i lea, na ia fa’aalia foi lona agaga fa’afetai i le FTA ma le DOT mo le taliaina o le talosaga a le teritori, ma le lagolagoina o lenei taumafaiga.

Sa fa’ao’oina atu foi le agaga faamalo a le sui Faipule i le afioga i le Kovana, Lemanu P. S. Mauga faapea le afioga i le Lutena Kovana, Talauega Eleasao V. Ae mo le taitaiga o lenei taumafaiga.