Ads by Google Ads by Google

Maua le to’atasi ae o loo tau saili le isi to’alua o le au talepe fale


[ata: SN]
ausage@samoanews.com

Pago Pago, AMERIKA SAMOA

 

E to’atasi le sui o le vaega talepe fale ua taofia nei e Leoleo i le Toese i Tafuna, ma le isi to’aolua o loo tau sailia pea i le taimi nei, ona o le latou sootaga i le fa’alavelave lea na latou osofaia ma gaoia ai meatotino mai totonu o se fale i Tafuna i le amataga o le tausaga nei.

 

O le ali’i e to’atasi ua maua e Leoleo, o ia lea o Calvin Faaolataga, lea na pu’e faapagota i le masina na te’a nei i lalo o se poloaiga mai le Fa’amasinoga. I le taimi na pu’e faapagota ai Faaolataga, na maua ai e Leoleo vaega o fualaau fa’asaina ia te ia.

 

O le masina na te’a nei na tula’i ai Faaolataga i luma o le Faamasinoga Faaitumalo mo lana ulua’i iloiloga.

 

E 2 tagi ua faila e le malo faasaga ia Faaolataga. I le tagi muamua, ua molia ai o ia i le moliaga e tasi o le talepe fale i le tulaga muamua faapea ai ma le moliaga e tasi o le gaoi, o le vaega C lea o solitulafono mamafa, lea e mafai ona faasala ai se tasi i le Toese mo le umi e oo atui le 5 tausaga, pe faasala foi i le salatupe e oo atu i le $20,000, fuafua lava i le tau o mea na aveesea faagaoi, faatasi ai ma le moliaga e tasi o le faaleaga meatotino i le tulaga muamua, o le vaega D lea o solitulafono mamafa, lea e faasala ai se tasi i le Toese mo le umi e le silia i le 5 tausaga, poo le faasala foi i le salatupe e le silia i le $5,000, poo le faasala foi i faasalaga uma ia e lua.

 

I le tagi lona lua a le malo, ua molia ai Faaolataga i le moliaga e tasi o le umia faasolitulafono o vaega o le pauta faasaina o le aisa, faapea ai ma le moliaga e tasi o le umia faasolitulafono o vaega o le laau faasaina o le mariuana, o ni moliaga mamafa e mafai ona faasala ai se tasi i le Toese mo le umi e oo atu i le 10 tausaga, poo le faasala foi i le salatupe e mafai ona oo atu i le $20,000.

 

E $20,000 le vaega tupe lea ua faatulaga e tatala ai le ua molia i tua mai le Toese i Tafuna. 

 

TAGI A LE MALO

 

E pei ona taua e le malo i le latou tagi, o le latalata i le faaiuga o le masina o Me na talosagaina ai e se ulugali’i mai se vaega o Tafuna le Ofisa o Leoleo i Tafuna mo se fesoasoani, i le la fale na osofaia e ni tagata ma ave faagaoi le tele o meatotino.

 

I le mae’a ai o suesuega e uiga i lenei mataupu, na pu’e faapagota ai loa e Leoleo ia Faaolataga i le masina na te’a nei, i lona aafia lea o le gaioiga sa faia e talepe ai le fale o le ulugali’i na aafia ma ave faagaoi le tele o meatotino sa i totonu, ae faatau atu ina ia maua mai ai fualaau fa’asaina.

 

O le taeao o le aso 24 o Me o le tausaga nei na talosagaina ai e se ulugalii mai se vaega o Tafuna Leoleo mo se fesoasoani, ona o le tele o meatotino o le la fale ua gaoia ina ua talepe ma faaleaga e ni tagata le fale. E tusa ai o le molimau a le ulugalii i Leoleo, o le masina o Fepuari o le tausaga nei na malaga ai i fafo le la tama teine ma lona aiga sa nonofo i le fale. O le tele o taimi la te asia ai le fale ae o nisi o taimi e tuufua ai.

 

Na fesiligia e Leoleo se tasi o ali’i e nofo latalata i le nofoaga na tula’i mai ai le faalavelave, ma faailoa ai e lea alii i Leoleo le igoa o Calvin Faaolataga, o ia lea ma ana uo na ia faalogo na latou osofaia le fale. Na taua atili fo’i e le ali’i lea i Leoleo, o le tele o meatotino na gaoia mai totonu o le fale ua uma ona faatau ai fualaau fa’asaina a Faaolataga ma ana uo.

 

Na maua e Leoleo le ali’i o Faaolataga mai le fale o se tasi o ana uo i Petesa ma auina atu loa o ia i le Ofisa i Tafuna mo suesuega. Ina ua fesiligia o ia e uiga i lenei mataupu, na ta’utino ai le ua molia i Leoleo, e faamaonia tu’uaiga faasaga ia te ia ma ana uo i lo latou osofaia o le fale i le vaveao o le aso Sa, Me 24 ae ave faagaoi meatotino sa i totonu.

 

O nisi o meatotino na gaoia e pei ona taua e le ua molia i Leoleo e aofia ai laptops, o telefoni, o mea faigaluega e pei o ili laupapa, tipi u’amea e alu i le uila, o le moavao faapea ai telefoni e 2, o lavalava, o pea seevae ma se tupe.

 

O le tele o meatotino na gaoia e pei ona taua e le ua molia, na faatau atu i se tamaloa i Vaitogi mo fualaau fa’asaina, ae o isi meatotino na tufatufa atu i nisi o ana uo ae aumai ai tupe e fa’atau ai a latou pia, sikaleti ma mea’ai.

 

O le mae’a ai ona fesiligia e Leoleo o le ua molia, na toe tatala ai loa o ia e alu i le fale i lalo o tuutuuga, o le a ia faailoa i Leoleo igoa o isi tagata o loo aafia i lenei mataupu, e aofia ai ana uo e to’alua na latou osofaia le fale, o le igoa o le tamaloa mai Vaitogi na faatau i ai mea sa gaoia ae aumai ai fualaau faasaina, atoa ai ma igoa o isi tagata na faatau i ai isi mea sa gaoia ae maua mai ai tupe.

 

O le mae’a ai o le 2 vaiaso talu ona tatala i tua le ua molia, na agai atu ai loa Leoleo ma pu’e faapagota mai o ia, i lalo o se poloaiga mai le Faamasinoga, ma auina atu loa le ua molia i le Ofisa i Tafuna mo isi suesuega. A o le i auina atu le ua molia i le Ofisa o Leoleo i Tafuna, na saili muamua e Leoleo lona tino poo i ai ni aupega poo nisi mea e ono lamatia ai le saogalemu o Leoleo.

 

I totonu o le taga o le ofuvae a le ua molia sa faia, na maua ai e Leoleo se paipa tioata o loo tumu i vaega o le pauta o le aisa, atoa ai ma se pepa iila laititi o loo i ai se sikaleti mariuana ua uma ona taai. Na faia se suega i mea na maua i le tino o le ua molia ma faamaonia ai, o vaega ia o le pauta faasaina o le aisa atoa ai ma le laau faasaina o le mariuana.

 

Na faailoa e le ua molia i Leoleo lona malamalama i ona aia tatau faaletulafono, ma ua ia malie fo’i e faamatala mea uma na tutupu i le taimi o le latou osofaiga. 

 

O le autu atoa o le latou faamoemoe e pei ona taua e le ua molia i Leoleo, o le osofaia lea o fale e nonofo ai ulugalii matutua ma le talitonuga, e tele meaaoga e maua mai ai e mafai ona faatau ese atu ae maua mai ai tupe ma fualaau fa’asaina. 

 

Na taua e le ua molia e faapea, o lana taavale sa fa’aaoga e la’u ai meatotino na gaoia mai i le fale o le ulugalii na aafia i Tafuna, o ia fo’i na faatali atu i totonu o le ta’avale, ae o ana uo e to’alua na aga’i atu i totonu o le fale ma faatino le osofaiga.

 

O nisi o meatotino na gaoia na latou faatauina atu i le fale o le tamaloa Vaitogi e igoa ia ‘TONE’ ae maua mai ai fualaau faasaina mo latou. O isi oloa na faatau atu i nisi o ana uo ae maua mai ai tupe. 

 

Na saili e Leoleo le fale o se tasi o ulugalii na taua na faatau aga’i i ai isi mea na gaoia, ma faaaonia mai ai e le ulugalii i Leoleo le faamatalaga a le ua molia. Na faaali e le ulugalii i Leoleo le laptop ma le ili e alu i le uila na alu atu Faaolataga ma faatau atu ia tei laua i le $100, ina ua ia mana’omia se tupe e faatau ai se meaai a le latou aiga mo le aso Sa. E nao le $50 na tuu e le ulugalii ia Faaolataga, ae na le teuina mea na alu atu ma ia ma le la talitonuga, o mea na gaoia mea uma.

 

Na toe faafo’i e le ulugalii mea na alu atu ma Faaolataga i Leoleo, ma toe tuuina atu ai loa i le ulugalii e ana le fale. Na faamaonia e le ulugalii, o isi ia meatotino na gaoia mai i totonu o le la fale.

 

O lo o tau sailia pea e Leoleo isi ali’i e to’alua na aafia i lenei solitulafono.

Maua le to’atasi ae o loo tau saili le isi to’alua o le au talepe fale

 

tusia Ausage Fausia

 

E to’atasi le sui o le vaega talepe fale ua taofia nei e Leoleo i le Toese i Tafuna, ma le isi to’aolua o loo tau sailia pea i le taimi nei, ona o le latou sootaga i le fa’alavelave lea na latou osofaia ma gaoia ai meatotino mai totonu o se fale i Tafuna i le amataga o le tausaga nei.

 

O le ali’i e to’atasi ua maua e Leoleo, o ia lea o Calvin Faaolataga, lea na pu’e faapagota i le masina na te’a nei i lalo o se poloaiga mai le Fa’amasinoga. I le taimi na pu’e faapagota ai Faaolataga, na maua ai e Leoleo vaega o fualaau fa’asaina ia te ia.

 

O le masina na te’a nei na tula’i ai Faaolataga i luma o le Faamasinoga Faaitumalo mo lana ulua’i iloiloga.

 

E 2 tagi ua faila e le malo faasaga ia Faaolataga. I le tagi muamua, ua molia ai o ia i le moliaga e tasi o le talepe fale i le tulaga muamua faapea ai ma le moliaga e tasi o le gaoi, o le vaega C lea o solitulafono mamafa, lea e mafai ona faasala ai se tasi i le Toese mo le umi e oo atui le 5 tausaga, pe faasala foi i le salatupe e oo atu i le $20,000, fuafua lava i le tau o mea na aveesea faagaoi, faatasi ai ma le moliaga e tasi o le faaleaga meatotino i le tulaga muamua, o le vaega D lea o solitulafono mamafa, lea e faasala ai se tasi i le Toese mo le umi e le silia i le 5 tausaga, poo le faasala foi i le salatupe e le silia i le $5,000, poo le faasala foi i faasalaga uma ia e lua.

 

I le tagi lona lua a le malo, ua molia ai Faaolataga i le moliaga e tasi o le umia faasolitulafono o vaega o le pauta faasaina o le aisa, faapea ai ma le moliaga e tasi o le umia faasolitulafono o vaega o le laau faasaina o le mariuana, o ni moliaga mamafa e mafai ona faasala ai se tasi i le Toese mo le umi e oo atu i le 10 tausaga, poo le faasala foi i le salatupe e mafai ona oo atu i le $20,000.

 

E $20,000 le vaega tupe lea ua faatulaga e tatala ai le ua molia i tua mai le Toese i Tafuna. 

 

TAGI A LE MALO

 

E pei ona taua e le malo i le latou tagi, o le latalata i le faaiuga o le masina o Me na talosagaina ai e se ulugali’i mai se vaega o Tafuna le Ofisa o Leoleo i Tafuna mo se fesoasoani, i le la fale na osofaia e ni tagata ma ave faagaoi le tele o meatotino.

 

I le mae’a ai o suesuega e uiga i lenei mataupu, na pu’e faapagota ai loa e Leoleo ia Faaolataga i le masina na te’a nei, i lona aafia lea o le gaioiga sa faia e talepe ai le fale o le ulugali’i na aafia ma ave faagaoi le tele o meatotino sa i totonu, ae faatau atu ina ia maua mai ai fualaau fa’asaina.

 

O le taeao o le aso 24 o Me o le tausaga nei na talosagaina ai e se ulugalii mai se vaega o Tafuna Leoleo mo se fesoasoani, ona o le tele o meatotino o le la fale ua gaoia ina ua talepe ma faaleaga e ni tagata le fale. E tusa ai o le molimau a le ulugalii i Leoleo, o le masina o Fepuari o le tausaga nei na malaga ai i fafo le la tama teine ma lona aiga sa nonofo i le fale. O le tele o taimi la te asia ai le fale ae o nisi o taimi e tuufua ai.

 

Na fesiligia e Leoleo se tasi o ali’i e nofo latalata i le nofoaga na tula’i mai ai le faalavelave, ma faailoa ai e lea alii i Leoleo le igoa o Calvin Faaolataga, o ia lea ma ana uo na ia faalogo na latou osofaia le fale. Na taua atili fo’i e le ali’i lea i Leoleo, o le tele o meatotino na gaoia mai totonu o le fale ua uma ona faatau ai fualaau fa’asaina a Faaolataga ma ana uo.

 

Na maua e Leoleo le ali’i o Faaolataga mai le fale o se tasi o ana uo i Petesa ma auina atu loa o ia i le Ofisa i Tafuna mo suesuega. Ina ua fesiligia o ia e uiga i lenei mataupu, na ta’utino ai le ua molia i Leoleo, e faamaonia tu’uaiga faasaga ia te ia ma ana uo i lo latou osofaia o le fale i le vaveao o le aso Sa, Me 24 ae ave faagaoi meatotino sa i totonu.

 

O nisi o meatotino na gaoia e pei ona taua e le ua molia i Leoleo e aofia ai laptops, o telefoni, o mea faigaluega e pei o ili laupapa, tipi u’amea e alu i le uila, o le moavao faapea ai telefoni e 2, o lavalava, o pea seevae ma se tupe.

 

O le tele o meatotino na gaoia e pei ona taua e le ua molia, na faatau atu i se tamaloa i Vaitogi mo fualaau fa’asaina, ae o isi meatotino na tufatufa atu i nisi o ana uo ae aumai ai tupe e fa’atau ai a latou pia, sikaleti ma mea’ai.

 

O le mae’a ai ona fesiligia e Leoleo o le ua molia, na toe tatala ai loa o ia e alu i le fale i lalo o tuutuuga, o le a ia faailoa i Leoleo igoa o isi tagata o loo aafia i lenei mataupu, e aofia ai ana uo e to’alua na latou osofaia le fale, o le igoa o le tamaloa mai Vaitogi na faatau i ai mea sa gaoia ae aumai ai fualaau faasaina, atoa ai ma igoa o isi tagata na faatau i ai isi mea sa gaoia ae maua mai ai tupe.

 

O le mae’a ai o le 2 vaiaso talu ona tatala i tua le ua molia, na agai atu ai loa Leoleo ma pu’e faapagota mai o ia, i lalo o se poloaiga mai le Faamasinoga, ma auina atu loa le ua molia i le Ofisa i Tafuna mo isi suesuega. A o le i auina atu le ua molia i le Ofisa o Leoleo i Tafuna, na saili muamua e Leoleo lona tino poo i ai ni aupega poo nisi mea e ono lamatia ai le saogalemu o Leoleo.

 

I totonu o le taga o le ofuvae a le ua molia sa faia, na maua ai e Leoleo se paipa tioata o loo tumu i vaega o le pauta o le aisa, atoa ai ma se pepa iila laititi o loo i ai se sikaleti mariuana ua uma ona taai. Na faia se suega i mea na maua i le tino o le ua molia ma faamaonia ai, o vaega ia o le pauta faasaina o le aisa atoa ai ma le laau faasaina o le mariuana.

 

Na faailoa e le ua molia i Leoleo lona malamalama i ona aia tatau faaletulafono, ma ua ia malie fo’i e faamatala mea uma na tutupu i le taimi o le latou osofaiga. 

 

O le autu atoa o le latou faamoemoe e pei ona taua e le ua molia i Leoleo, o le osofaia lea o fale e nonofo ai ulugalii matutua ma le talitonuga, e tele meaaoga e maua mai ai e mafai ona faatau ese atu ae maua mai ai tupe ma fualaau fa’asaina. 

 

Na taua e le ua molia e faapea, o lana taavale sa fa’aaoga e la’u ai meatotino na gaoia mai i le fale o le ulugalii na aafia i Tafuna, o ia fo’i na faatali atu i totonu o le ta’avale, ae o ana uo e to’alua na aga’i atu i totonu o le fale ma faatino le osofaiga.

 

O nisi o meatotino na gaoia na latou faatauina atu i le fale o le tamaloa Vaitogi e igoa ia ‘TONE’ ae maua mai ai fualaau faasaina mo latou. O isi oloa na faatau atu i nisi o ana uo ae maua mai ai tupe. 

 

Na saili e Leoleo le fale o se tasi o ulugalii na taua na faatau aga’i i ai isi mea na gaoia, ma faaaonia mai ai e le ulugalii i Leoleo le faamatalaga a le ua molia. Na faaali e le ulugalii i Leoleo le laptop ma le ili e alu i le uila na alu atu Faaolataga ma faatau atu ia tei laua i le $100, ina ua ia mana’omia se tupe e faatau ai se meaai a le latou aiga mo le aso Sa. E nao le $50 na tuu e le ulugalii ia Faaolataga, ae na le teuina mea na alu atu ma ia ma le la talitonuga, o mea na gaoia mea uma.

 

Na toe faafo’i e le ulugalii mea na alu atu ma Faaolataga i Leoleo, ma toe tuuina atu ai loa i le ulugalii e ana le fale. Na faamaonia e le ulugalii, o isi ia meatotino na gaoia mai i totonu o le la fale.

 

O lo o tau sailia pea e Leoleo isi ali’i e to’alua na aafia i lenei solitulafono.