Pago Pago - AMERIKA SAMOA

I sana molimau i luma o le iloiloga aufaatasi a le Komiti o Paketi a le Senate ma le Maota o Sui i le vaiaso ua tuanai, sa saunoa ai le Faatonusili o le Ofisa o le Medicaid, le susuga ia Tofoitaufa Sandra King-Young, o lo o sologa lelei lava mea uma i le polokalama lea e auina atu ai tagata gasegase mo togafitiga i atunu’u i fafo (Off-Island Medicaid Referral Program – OMRP).

Ae peitai, na saunoa nisi o sui faitulafono, na talu lava ona tu’uina atu lenei polokalama i lalo o le vaavaaiga a le ofisa a le Medicaid, ua fai lava sina faigata ona maua avanoa e le mamalu lautele e malaga ai i fafo mo a latou talavai.

Na saunoa le afioga Senatoa Malaepule Saite Moliga, ua sili atu le faigata ona saili avanoa tagata o le atunu’u i lenei polokalama, nai lo le taimi o mataituina ai le polokalama e le LBJ.

Sa saunoa Malaepule, o lona faanoanoaga, o le saunoaga a le faatonusili, i le le agava’a o nisi o tagata e faauluina atu e fomai i le LBJ o latou suafa, ina ia mafai ona aveina mo talavai i atunu’u i fafo.  E pei ona ta’ua e Malaepule, o lea e saunoa mai le tamaitai faatonusili, e le o i latou o ni fomavai, ae peitai, o lea e filifili e latou po o ai ua agava’a e ave i fafo mo talavai.

Na fesiligia foi e le afioga i le Fofoga Fetalai ia Savali Talavou Ale, pe aisea ua tele ai tulafono faatulagaina, pe a faaulu atu e fomai mai i le LBJ ia suafa o le mamalu o le atunu’u ua tatau ona ave e fa’aauau talavai i atunu’u i fafo.

Na fia malamalama le afioga i le Fofoga Fetalai po o ai tonu lava e faia le filifiliga po o ai ua agavaa ae o ai ua le agavaa mo lenei polokalama.  Na saunoa Savali, o lo o iai fomai a le LBJ ma le Komiti Faafoe o Faatonusili, ma i sona talitonuga, o i latou ia e tatau ona faia le faaiuga i lenei mataupu, ae o lea ua aumai e le ofisa a le Medicaid, a latou lava fomai e toe faia le galuega lava lea e tasi.

Na tali le tamatai faatonusili e faapea, e le o le latou ofisa e filifilia i latou e tatau ona ave i fafo mo talavai.  O le matafaioi lea a le falemai, ae peitai, o le latou ofisa e gafa ma le puipuiina o le polokalama mai i le fa’aalu seseina o tupe, e ono a’afia ai lo latou ofisa i le tulafono.

Na saunoa foi le tamaitai faatonusili, sa tele ni ripoti o le fa’aaogaina sese o lenei polokalama, i taimi ua tuanai.  Ae o le taimi nei, ua le o toe iai ni ia ripoti.  Ma o le latou matafaioi lea o le suesue auiliili le agava’a o gasegase o lo o fia auina atu i atunu’u i fafo.

E le gata i lea, e pei ona faamanino auiliili e King-Young, e tatau ona talia muamua mai e falemai i Hawaii po o Niu Sila ia le gasegase, ona faato’a mafai lea ona tatalaina e le latou ofisa ia tupe mo le totogiina o pili a nei falemai.

Na toe saunoa le tamaitai faatonusili, o lo o gafa pea fomai a le LBJ ma le matafaioi o le filifiliga o gasegase e ao ona aveina atu i fafo, ae ona o faafitauli tau tupe i taimi ua fano, e aofia ai pili le totogia, o lea ua ave’esea ai le polokalama mai i le falemai, ae tu’uina mai i lalo o le latou ofisa ina ia mafai ona o gatasi ma tulafono a le Medicaid.

Na saunoa King-Young, ua mafua ona ave’esea lenei polokalama mai i le falemai, ona ua le toe iai se faatuatuaga a le malo feterale, i le falemai a le LBJ. Ma o lo o galulue malosi lona ofisa ina ia puipuia lenei polokalama mai i le fa’aaoga sese ma le fa’aalu vale o tupe.

Sa ia molimauina foi le iai o nisi o tagata o le atunu’u o lo o taumafai lava e solia tulafono faatulagaina o lenei polokalama, e ala lea i le agai lava o i latou i atunu’u i fafo mo talavai ma taumafai e apalai mo le OMRP, ae peitai, sa ia taofia lea tulaga.  Sa toe faamamafa mai e le King-Young, e na o fomai o le LBJ e avatu ai le faatagana po o ai ua agava’a mo lenei polokalama.

Na fesiligia e le afioga i le Peresetene o le Senate ia Tuaolo Manaia Fruean ia le avea o Dr. Annie Fuavai ma Faatonusili o fomai a le Medicaid, pe o se fomai e manaomia i lea avanoa.

Sa tali mai le tamaitai Faatonusili, na manaomia se tasi o umia se laisene mai i le Komiti Faafoe o Tautua o le Soifua Maloloina.  Ae na manaomia e lo latou ofisa se tasi ua agava’a i le tomai faafomai ma ua iai le poto masani i tautua o lo o faatinoina i totonu o le LBJ, e fesoasoani i le iloiloina o gasegase o lo o manaomia ona aveina i atunu’u i fafo.  E faamaonia le leai o seisi auala e mafai ai ona fai a latou talavai i totonu o le LBJ, ua na o le aveina atu lava i fafo.  Na ta’ua e King-Young, ua silia ma le 30 tausaga o tautua Dr. Fuavai i le LBJ.