Ads by Google Ads by Google

Molia le alii o loo nofovaavaaia i isi solitulafono mamafa


[ata: SN]
ausage@samoanews.com

Pago Pago, AMERIKA SAMOA

 

Ua toe aafia i le tulafono se ali’i o loo nofovaavaaia mo le 7 tausaga ona o le solitulafono o le gaoi, ina ua taofi e Leoleo lana ta’avale i le solitulafono i luga o le alatele i le masina na te’a nei, ae maua ai e Leoleo fualaau faasaina i totonu o le ta’avale. 

 

Na taumafai lea ali’i ua molia, le susuga a Malaki Tagaloa e sola ese ma Leoleo i le taimi na taofi ai e Leoleo le ta’avale, peita’i na vave gaioiga a Leoleo na mafai ai ona pu’e faapagota Tagaloa ma auina atu ai loa i le Ofisa o Leoleo mo suesuega.

 

O le masina lava fo’i na te’a nei na tula’i ai le susuga a Taloga i luma o le Fa’amasinoga Faaitumalo. 

 

Ua molia nei o ia i le solitulafono o le umia faasolitulafono o vaega o le pauta faasaina o le aisa; tasi le moliaga o le umia faasolitulafono o vaega o le pauta o le aisa ma le faamoemoe e tulei ma faatau atu i isi tagata; faapea ai ma le moliaga e tasi o le umia faasolitulafono o vaega o laau faasaina o le mariuana; o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e mafai ona oo atu i le $20,000, poo le faasala foi i faasalaga uma ia e lua.

 

E $10,000 le vaega tupe lea ua fa’atulaga e le afioga i le ali’i Fa’amasino ia Elvis P. Patea e totogi ona faatoa mafai lea ona tatala le ua molia i tua mai le Toese i Tafuna.

 

Afai ae tatala o ia i tua, ua poloaina o ia e le Fa’amasinoga ina ia usita’i i tuutuuga ua tuuina atu e tatala ai o ia i tua, faapea ai ma tuutuuga uma na tuuina atu o lana nofovaavaaia i le 3 tausaga talu ai.

 

TAGI A LE MALO

 

O le mataupu e pei ona molia ai Tagaloa na alia’e mai i le taeao o le aso 27 o Novema na te’a nei ina ua taofi e Leoleo se pikiapu lanu uliuli i luga o le alatele i Malaeimi i le ova o maila na alu ai le ta’avale mai maila faatulafono i luga o le alatele. Ae ina ua mae’a ona taofi e Leoleo le ta’avale, na iloa ai e Leoleo, e le gata e eseese numera o loo pipi’i i laisene o le ta’avale, ae foliga mai fo’i ua mae’a le tausaga e aoga ai le laisene o le ta’avale.

 

E to’alua ali’i sa i totonu o le ta’avale i le taimi na taofi ai e Leoleo, o le ali’i ave ta’avale, o ia lea o Malaki Tagaloa ma le isi sa la to’alua i totonu o le ta’avale.

 

A o talanoa Leoleo ia Taloga, sa maitauina e le isi Leoleo le minoi solo o le pasese ma taumafai e fa’aaoga lona vae taumatau e una’i ai se afifi i lalo o le nofoa. Sa vaaia fo’i foliga popole o le pasese i le taimi ao faia ana gaioiga. Talu ai popolega o Leoleo i lo latou saogalemu, na fesiligia ai loa e Leoleo le pasese pe i ai ni aupega i totonu o le ta’avale e ono lamatia ai lo latou saogalemu. Na tali le pasese e leai ni aupega i totonu o le ta’avale.

 

Talu ai e leai se laisene ave ta’avale a Tagaloa na fealua’i ma ia i le taimi na fesiligia ai o ia e Leoleo, atoa ai ma gaioiga a le pasese sa faia i le taimi na taofi ai e Leoleo le ta’avale, na faatonu ai loa e Leoleo ia Tagaloa ma le pasese e o i fafo ma le ta’avale. Na faailoa e Leoleo ia Tagaloa, o le a taofia o ia i le leai o sona laisene ave ta’avale, faatasi ai ma lana ta’avale, o le a taofia fo’i sei vagana ua alu atu se isi o lona aiga e i ai sona laisene e ave i tua le ta’avale. 

 

A o le i auina atu Tagaloa ma le ave ta’avale i le Ofisa o Leoleo i Tafuna, na faia se suega faapitoa i o la tino ina ia mautinoa la te le o tauaveina ni aupega poo ni fualaau fa’asaina. Na saili fo’i e Leoleo le tino o le pasese mo ni aupega ma fualaau faasaina.

 

E leai ni aupega poo ni fualaau faasaina na maua i le pasese, ae ina ua sailia e Leoleo le tino o le susuga a Tagaloa, na maua ai se paipa tioata o lo o i ai vaega o le pauta faasaina i le taga o lona ofu sa fai. Sa maua ai fo’i pepa iila e faaaoga e utu ai le aisa ma faatau atu, faapea ai ma straws e 3 ua mae’a ona ta tipi tulimanu ae utu ai i totonu vaega o le pauta pa’epa’e o le aisa.

 

E eseese potu na ave i ai Tagaloa ma le ave ta’avale i le taimi na fesiligia ai i laua e Leoleo e tusa ai o lenei mataupu.

 

Ina ua fesiligia e Leoleo le pasese i le mafuaaga o lona i ai i totonu o le ta’avale a Tagaloa, na ia taua ai e faapea, o ia sa nofonofo i luma o se Faleoloa i Pavaiai ae afe atu loa le ta’avale a Tagaloa ma fai atu ia te ia e alu atu la te tietie i Vaitogi e momoli meamata a le isi aiga ona la toe o mai ai lea.

 

Ina ua taunuu le ta’avale i Vaitogi, na alu Tagaloa i le fale o se aiga e momoli le taga pepa talo ma fa’i, ae ina ua toe fo’i mai Tagaloa, sa ia vaaia se pepa iila o loo uu mai i lona lima. Na taua e le pasese le fa’aali atu e Tagaloa o le taga pepa ia te ia, o loo i ai fualaau faasaina i totonu. 

 

Sa alu le la ti’eti’ega i Leone ma toe fo’i mai ai i Iliili ma la aga’i atu ai loa i Malaeimi ma le faamoemoe la te afe i se fale’aiga e fa’atau ai se la mea’ai o le taeao, ae faafuase’i loa ona taofia e Leoleo le la ta’avale i le soona alu saoasaoa.

 

Na faamatala atili e le pasese i Leoleo e faapea, ina ua taofi e Leoleo le la ta’avale i le saoasaoa, na faafuase’i ona tu’u atu e Tagaloa se tama’i pepa iila ia te ia o loo i ai lau mariuana, ma fai atu ia te ia e tago e nana le pepa iila i lalo o lona nofoa. Na usita’i le pasese i le faatonuga a Tagaloa ma ia tago ai ua nana le pepa iila o loo i ai lau mariuana i lalo o lona nofoa.

 

Na saili e Leoleo totonu o le ta’avale a Tagaloa ae matamata i ai Tagaloa. I le pito lava i tua o le nofoa o le pasese, na maua ai e Leoleo se pepa iila o loo i ai lau o le laau faasaina o le mariuana. 

 

Ina ua fesiligia e Leoleo ia Tagaloa e tusa ai o fualaau faasaina na maua ia te ia faapea ai le ta’avale, na faatoese le ua molia ma ta’utino i Leoleo, o fualaau faasaina uma ia e patino ia te ia. E leai se mea e aafia ai fua le pasese i fualaau faasaina sa maua ia te ia faapea ai lana ta’avale.

 

Na malie Tagaloa e faailoa i Leoleo Suesue le mataupu e faatatau i fualaau faasaina. I lana faamatalaga na ave i Leoleo sa ia ta’utino ai e faapea, o ia e fai lana faatoaga talo ma fa’i e masani ona faatau e maua ai tupe mo lona aiga. O isi taimi, e alu ai ave tau talo ma aufa’i i nisi o ana uo ae maua mai ai fualaau faasaina e fa’aaoga mo ia i taimi e fai ai ana galuega.

 

I le aso e pei ona tula’i mai ai le fa’alavelave, na alu ai e momoli le tau talo ma le pepa fa’i i le fale o lana uo i Vaitogi ae maua mai ai ana fualaau faasaina. Ao aga’i mai i luga o le alatele, na ia tau mai i lana uo e masani ona la eva o nofonofo atu i luma o se Faleoloa, o lea na ia afe ai ma piki o ia, ma la ti’eti’e ai loa i Vaitogi.

 

Na ta’utino Tagaloa i Leoleo, o fualaau faasaina na aua ia te ia ma lana ta’avale, na faafesuia’i ma le tau talo ma le pepa fa’i na sau mai ai. Na fiu Leoleo e fesili ia Tagaloa poo ai le igoa o le tagata mai Vaitogi na aumai ai fualaau faasaina, na musu le ua molia e fa’ailoa i Leoleo. Pau lana faamatalaga, o fualaau faasaina e masani ona maua mai i ana uo, na te fa’aaogaina isi ae o isi vaega na te faatau atu i nisi o ana uo.

 

SOLITUALFONO MUAMUA

 

O le masina o Mati o le 2017 na faasala ai e le Fa’amasinoga Maualuga ia Tagaloa e nofovaavaaia mo le 7 tausaga, ina ua ta’usala o ia i solitulafono mamafa e 2 o le gaoi ma le talepe fale. E 28 masina na manatu le faamasinoga e faasala ai Tagaloa i le Toese, peita’i, e na o le 13 masina na taofia ai o ia i le Toese ae toe tatala i tua, ma le tuutuuga e aua ne’i ona toe solia se isi tulafono a le malo.