Ua molia nei se alii ave ta’avale i lona umia faasolitulafono o vaega o fualaau fa’asaina o le aisa, e mafua mai i le fa’alavelave lea na maua ai e Leoleo se pepa iila o loo i ai vaega o le pauta faasaina o le aisa i totonu o lana ta’avale, ina ua taofia e Leoleo lana ta’avale i le faaiuga o le vaiaso na te’a nei.

O le vaiaso nei na tula’i ai le susuga a Barrit Siaumau i luma o le Fa’amasinoga Faaitumalo, i le mae’a ai lea ona molia o ia i le solitulafono mamafa e tasi o le umia faasolitulafono o vaega o le pauta faasaina o le aisa, o se solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala i le salatupe e le mafai ona sili atu i le $20,000, poo le faasala foi i faasalaga uma ia e lua.

E $5,000 lea ua fa’atulaga e tatala ai i tua Siaumau mai le Toese i Tafuna. Afai ae tatala o ia i tua, ua fautuaina o ia e le Fa’amasinoga e aua ne’i ona toe solia se tulafono a le malo, e le tatau foi ona ia toe tagofia ni fualaau faasaina poo le ‘ava malosi, a ia avea o ia ma tagatanu’u e tausi i soo se tulafono a le malo.

O le aso Gafua o le vaiaso fou lea ua fa’atulaga e faia ai le ulua’i iloiloga o lenei mataupu.

TAGI A LE MALO

E pei ona taua e le malo i le latou tagi e fa’apea, o le afiafi o le aso 4 o Aperila ao tiute ni Leoleo se to’alua i luga o le alatele a le malo i Tafuna, na la vaaia ai se pikiapu o lo o aga’i atu i luga o le alatele e eseese numera o laisene o lo o i ai. O le laisene pito i luma o lo o pipii ai le numera 3396, ae o le laisene pito i tua o lo o pipii ai le laisene numera 6791.

A o le i aga’i atu Leoleo e taofi le pikiapu, na muamua siaki i le latou Ofisa autu i Fagatogo mo le faailoaina atu o le tulaga o numera o laisene e 2 e pei ona molimauina. Na taua e le Ofisa autu i Fagatogo, o le laisene numera 3396, o le laisene sa’o lea o le ta’avale ae ua mae’a le aoga o le laisene e le i toe faafouina, ae o le laisene numera 6791, e ese le ta’avale e ana le laisene lea a o lea ua faapipi’i i le pito i tua o le pikiapu.

O le maua ai e Leoleo o faamatalaga sa talosagaina, na aga’i atua i loa ma taofi le ta’avale piikiapu e pei ona taua, ma faailoa ai loa i le ave taavale le mafuaaga ua ala ai ona taofi lana ta’avale. E na o le ave taavale lava sa i totonu o le ta’avale, o ia lea o Barrit Siaumau, o le alii o lo o molia i lenei mataupu.

Na fesili Leoleo i le alii ua molia mo lana laisene ave ta’avale peita’i na faailoa e le ua molia, o lo o galo i le fale lona laisene ave ta’avale. O le taimi lea na faailoa ai loa e Leoleo i le alii ua molia le faaiuga o le a faia i lana ta’avale, o le taofia lea i lalo o le vaavaaiga a Leoleo, e le gata e eseese numera o laisene o lo o faapipii i lana ta’avale, ae le o i ai fo’i sona laisene ave ta’avale.

Na talosagaina e Leoleo e to’alua le fesoasoani a isi Leoleo ma mafai ai loa ona auina atu le ta’avale i le Ofisa o Leoleo i Tafuna mo suesuega faaopoopo e uiga i lenei mataupu. O le alii Leoleo na avea le ta’avale a le ua molia aga’i i le Ofisa o Leoleo i Tafuna ae sa nofo le ua molia i le nofoa o le pasese.

Ina ua taunu’u le taavale i le Ofisa o Leoleo i Tafuna, na faailoa ai loa e Leoleo i le alii ua molia, e tatau ona saili uma totonu ma le tino o lana ta’avale e pei o tu ma aga masani o le tulafono, ina ia mautinoa e le o i ai ni fua fualaau faasaina poo ni a’upega mata’utia i totonu.

A o faagasolo galuega a Leoleo, sa molimauina e Leoleo se pepa iila o lo o nana i totonu o se vaega o le ta’avale e latalata i le foeuli o le ta’avale. Na aumai e Leoleo le pepa iila ma iloa ai vaega o le pauta paepae o lo o i ai i totonu. Ina ua faaali e Leoleo le pepa iila o loo i ai vaega o le pauta paepae i le alii ua molia, na lulu lona ulu ma faapea atu i Leoleo, na te le iloa poo ai e ana le pepa iila na latou maua.

Na tu’u e Leoleo le pepa iila i le Leoleo Sinia sa i ai i le taimi na saili ai le ta’avale a le ua molia, ona alu lea o le Leoleo Sinia ma fesili i le ua molia poo a mea o lo o i totonu o le pepa iila, na tali fo’i le ua molia, na te le iloa poo a mea o lo o i ai, e le o ia fo’i e ana le pepa iila na latou maua.

O le taimi lea na faafesootai ai loa e Leoleo mai le Ofisa o Leoleo i Tafuna le Vaega e gafa a le suesueina o Fualaau Faasaina e le Ofisa o Leoleo, ma aga’i atu ai loa ali’i Leoleo Lutena e to’alua mo le tauaveina o lenei mataupu.

Na muamua faia e Leoleo Lutena se suega i le pauta paepae na maua i totonu o le pepa iila ma faamaonia ai, o vaega ia o le pauta faasaina o le aisa.

Ina ua mae’a ona faia le suega i le pauta, na fesiligia ai loa e Leoleo le alii ua molia e uiga i le pepa iila lea na maua i ai vaega o le pauta faasaina o le aisa, atoa ai ma laisene sese na faapipi’i i le tino o lana ta’avale. Na muamua faatoese le ua molia i Leoleo Lutena e to’alua e tusa ai o laisene sese na faapipii i lana ta’avale.

Sa ia taua e fa’apea, o le isi laisene o le laisene o le ta’avale a lona uso, ae na tago ma aumai e faapipi’i i le tino o lana ta’avlae, ina ia mafai ai ona ave lana ta’avale i le fale o lona uncle i Vaitogi. A o aga’i atu lana ta’avale i luga o le alatele, na faafuase’i ai loa ona taofia o ia e Leoleo i luga o le alatele.

I le pepa iila sa maua i ai vaega o le pauta faasaina o le aisa, na matua teena e le ua molia le i ai o sona iloa e faatatau i lea pepa iila. Sa ia taua i Leoleo Lutena e to’alua e faapea, sa faigata ona ia iloa lelei atu gaioiga a Leoleo sa faia i totonu o lana taavale i le taimi na latou sueina ai totonu o le ta’avale, ona sa poloka e le isi ali’i Leoleo le vaega e mafai ai ona ia iloa atu gaioiga uma sa faia.

Ae na faateia o ia ina ua alu atu se ali’i Leoleo Sinia ma faaali atu le pepa iila ia te ia, ma fesili atu poo ai e ana lea pepa iila, ae na ia tali i ai na te le iloa poo ai e ana le pepa iila. Na taua atili e le ua molia i Leoleo Suesue, e leai se fesootaiga o ia ma le pepa iila na maua i totonu o le ta’avale.

Ina ua fesiligia e Leoleo Suesue ali’i Leoleo e to’atolu sa i ai i le taimi na su’e ai le ta’avale a le alii ua molia, sa latou taua ai le kilia o le vaega na nofo ai le ua molia mai le itu na maua ai le pepa iila. Sa vaai ma molimauina e le ua molia gaioiga uma a Leoleo i le taimi na su’e ai totonu o lana ta’avale.

Na taua e le isi Leoleo, na vaai tino le ua molia i le taimi na maua ai le pepa iila i totonu o le ta’avale, ae ina ua faaali atu ia te ia le pepa iila, sa lulu lona ulu ma fai mai na te le iloa poo ai e ana le pepa iila.