Ads by Google Ads by Google

Molia ni alii I se faalavelave na a’afia ai se a’upega malosi


[ata: SN]
ausage@samoanews.com

Pago Pago, AMERIKA SAMOA

E to’atolu ali’i na taofia e Leoleo i le Toese i Tafuna i le vaiaso na te’a nei, e mafua mai i se faalavelave  na tula’i mai i Fagalele, Leone, na fa’aaoga faasolitulafono ai se a’upega malosi (fana).

O lea ua tu’ua’ia ai Patelesio Mckenzie i lona fa’apaina faasolitulafono o se laau malosi aga’i i ni tagata se to’aono; o Loma Eneliko ua tu’uaia i lona faia o ni gaioiga e save’u ai le nonofo filemu o tagata, ina ua savali ma se agaese aga’i i se tamaitai Leoleo, ae o le ali’i lona tolu, o Aukusitino Mckenzie, na tatala i tua e aunoa ma se tagi na faila e le malo faasaga ia te ia.

O le vaiaso na te’a nei na tutula’i ai Mckenzie ma Eneliko i luma o le Faamasinoga Faaitumalo mo le la ulua’i iloiloga. 

Ua molia e le malo ia Mckenzie i le moliaga e tasi o le faatupu vevesi i nofoaga faitele; tasi le moliaga o le fa’aaoga faasolitulafono o se a’upega; tasi le moliaga o le umia o se a’upega e lei lesitalaina; ma le moliaga e tasi o le faapa faasolitulafono o se a’upega, o solitulafono mama uma lea e mafai ona faasala ai se tasi i le Toese mo le umi e oo atu i le tasi le tausaga, pe faasala foi i le salatupe e mafai ona oo atu i le $1,000, poo le faasala foi i faasalaga uma ia e lua.

Ua toe tatala i tua i laua nei e faatali ai le la iloiloga lea ua faatulaga e faia i le faaiuga o le masina nei.

O tuutuuga ua tatala ai i laua i tua e aofia ai le aua nei o la toe taumafai e faafesoota’i i latou e to’a 6 na aafia i lenei mataupu poo nisi o latou aiga i soo se auala; e le tatau ona la toe umia se a’upega malosi, pe taumafai fo’i e faia ni gaioiga e ono save’u ai le nonofo filemu o tagata, a ia avea i laua ma tagatanu’u e tausi i tulafono a le malo.

TAGI A LE MALO

O le afiafi o le aso 25 o Tesema 2020, pe tusa o le itula e 5:51, na faafesoota’i ai e se tamaitai le Ofisa o Leoleo mo se fesoasoani, ina ua ia faalogoina pulu fana i Fagalele, Leone o lo o latou tafafao ma taeele ai ma ana uo ma tausoga e to’alima (5).

E to’atele Leoleo na tali atu i le valaau ona o ripoti i le aafia ai o se laau malosi. Na taunu’u Leoleo ma latou vaai ai se tama matua o lo o tau upu ma se tamaloa i luma o le fale na alu atu ai le telefoni mo se fesoasoani. Na faalogoina e Leoleo le avaavau o le tama matua i se tagata faapea, “Aisea na e faapapa ai lau fanau aga’i i la’u fanau?”

O le tagata sa tau upu ma le tama matua, o Patelesio Mckenzie, lea ua molia i lenei mataupu. Na vave ona faato’a filemu e Leoleo le mataupu ma amata loa ona latou fesiligia molimau e tusa ai o le faalavelave sa tula’i mai.

Na fesiligia e Leoleo le tuafafine o le ali’i ua molia po o ai na faapaina le fana aga’i i tagata e to’a 6 na a’afia i lenei mataupu, ae na tali le tuafafine a McKenzie, na te le iloa po o ai. I suesuega mulimuli ane a Leoleo atoa ai ma faamatalaga mai molimau, na i ai McKenzie ma lona tuafafine, i le taimi na tula’i mai ai le faalavelave.  Na ta’ua e molimau, sa faapapa e McKenzie le fana aga’i ia i latou na aafia ae folafola atu i ai e lona tuafafine upu tau faamata’u fai mai, “E i ai le tagata o le a oti i le aso lenei.”

Na ave e Leoleo le ali’i ua molia i totonu o lona fale ma faaauau ai le suesueina o le mataupu, ae fautuaina le tama matua, ina ia tuua le nofoaga ma le filemu. 

Na fesiligia e Leoleo ni isi sa i ai i le nofoaga na tula’i mai ai le faalavelave po o ai na faapaina le fana, ma taua ai e molimau, o Patelesio Mckenzie.

A o talanoa Leoleo ma le ua molia i totonu o le fale, na faafuase’i ona vaaia e Leoleo se ali’i ua vaovao atu ma se agaese ia te i latou. O ia lea o Loma Eneliko, le ali’i o loo molia i lenei mataupu, 

Na valaau atu Leoleo ia Eneliko e aveese le agaese o lo o i lona lima, peita’i na atili ai ona leoleoa Eneliko ma savali aga’i mai i le Leoleo. Na sii e le Leoleo i luga ona lima e faailoa atu ai, e le o i ai se a’upega o ia te ia. Na toe talosaga le Leoleo ia Eneliko e tuu i lalo le agaese, lea foi na usitaia e Eneliko.

O le mae’a ai o le talanoaga a Leoleo ma i laua e to’alua ua molia i le fale, na talosagaina ai loa i laua latou te malaga atu i le Ofisa o Leoleo i Leone mo le faatalatalanoaina atili o lenei mataupu. Na faatonuina fo’i e Leoleo molimau atoa ai ma i latou na aafia ina ia aga’i atu i le Ofisa o Leoleo i Leone mo le tuuina atu o a latou faamatalaga e tusa ai o le faalavelave sa tula’i mai.

Na taua e se tasi o i latou e to’a 6 na aafia i lana faamatalaga sa tuuina atu i Leoleo e faapea, sa faia se latou taelega i Fagalele, le nofoaga e masani ona latou taeele fiafia ai. I se taimi o le afiafi, na alu atu ai Patelesio ma valaau atu ia te i latou e o ese ma le fanua, peita’i sa ia tali mai i ai, “atonu e te pule i le fanua ae e te le pule i le sami lea matou te taeele ai.”

O le ita tele o Patelesio i le tali na avatu, na valaau mai ai loa ia i latou o loo taeele e faatalitali i le mea o le a ia faia ia te i latou. Na taua e molimau e faapea, e le i leva ona alu ese atu Patelesio ae latou vaaia loale masau mai o lona tuafafine ma leoleoa mai ia tei latou ma tutuli ese latou ma le fanua, faatasi ai ma lana folafolaga, “e i ai le tagata o outou e oti i le aso lenei.”

E le i  umi ona leoleoa le tuafafine a Petelesio, ae faalogoina loa e i latou na aafia le papa mai o fana. Na manino lelei le vaai a le isi molimau, o Patelesio o loo ia faapapaina le fanau. E tusa ai o faamatalaga a i latou nei sa tuuina atu i Leoleo, e tusa a le 10 pa o le fana sa latou faalogoina. 

O le taimi na faalogoina ai e i latou na aafia le pa o le fana, na latou tau fetuli ai loa i luga mo se fesoasoani peita’i sa latou faalogoina le aga’i atu o pulu fana ia tei latou. 

Na faamatala e se tasi o molimau le faateia o ia ina ua see isi pulu fana e 2 i le va o ia ma ona tausoga. O isi fo’i pulu sa latou faalogoina le salalau i luga o lau o laau o loo latou lalafi ai. 

Na taua e le isi molimau i Leoleo e faapea, o le sami i Fagalele, o se nofoaga ua masani ai tupulaga mai Leone ona taeele ma fiafia ai mo aso uma o le olaga. Ae talu lava ona fo’i mai Patelesio ma lona tuafafine mai fafo, ua fai lava ma tutupu faafitauli i le nofoaga i Fagalele. 

Na taua e isi molimau na mulimuli fesiligia e Leoleo lo latou fefefe i le taimi na faapapa atu ai e Patelesio le fana ia te i latou. Sa latou tau fetuli i le isi itu e sulufa’i i ai peita’i sa latou faalogoina le aga’i atu pea o pulufana. O isi pulu fana na see i lona papatua ae o le isi pulu fana na asa ane i luga o lau o laau, ae o le taimi lea sa latou faalogoina ai le tuafafine a Patelesio o loo valaau leotele atu ia te i latou, “e i ai le tagata o outou e oti i le po lenei.”

Na maua e Leoleo se laau malosi o le ituaiga o le semi-rifle mai le nofoaga na tula’i mai ai le faalavelave faapea ai ma pulu fana e 4 o le ituaiga o le ‘.30 caliber’ na totoe ai i totonu o le vaega e utu i ai pulu. Ae ina ua saili e Leoleo le tino o Patelesio, na maua ai i totonu o le taga o lona ofu isi pulu fana e 6 o le ituaiga o le ‘.38 caliber’.