Pago Pago - AMERIKA SAMOA

O le masina na te’a nei na pu’e faapagota ai e Leoleo ni alii se to’alua ona o tu’uaiga i lo la faaoolima i se isi ali’i. Ae ina ua pu’e faapagota e Leoleo i laua ia e to’alua, na maua ai  ma vaega o fualaau faasaina.

O le masina na te’a nei na tutula’i ai Willie Sefo ma Alapati Timo, i luma o le Fa’amasinoga Faaitumalo mo le la ulua’i iloiloga. 

E ta’i 2 tagi ua faila e le malo faasaga ia i laua ua molia.

I le tagi muamua, ua molia ai Sefo ma Timo i moliaga o le faaoolima i le tulaga lua atoa ai ma le gaoi, o vaega C o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala foi i le salatupe e le silia i le $5,000, poo le faasala uma i faasalaga uma ia e lua.

E ta’i $10,000 ua faatulaga e le Fa’amasinoga e tatala ai i tua Sefo ma Timo i le mataupu lea.

I le tagi lona lua, ua molia ai Sefo i le umia o vaega o le pauta faasaina o le aisa, ae molia le susuga a Sefo i le umia faasolitulafono o vaega o le laau faasaina o le mariuana, o solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e le silia i le $20,000, poo le faasala fo’i i faasalaga uma ia e lua.

E ta’i $5,000 ua faatulaga e le Fa’amasinoga Faaitumalo e tatala ai i tua i laua to’atasi i le tagi lona lua a le malo.

Afai e mafai ona tatala i laua i tua, ua poloaina i laua e le Fa’amasinoga ina ia taumamao mai lo la toe tagofia o fualaau fa’asaina poo le ‘ava malosi, e le mafai fo’i ona la taumafai e faafesoota’i molimau a le malo, e aofia ai ma le ali’i na aafia i lenei mataupu.

O le aso Tofi o le vaiaso nei lea ua faatulaga e faia ai le ulua’i iloilioga faapitoa o le tagi a le malo faasaga ia Sefo ma Timo.

E pei ona taua i faamaumauga a le Faamasinoga, o le susuga a Sefo o lo o nofovaavaaia mo le 7 tausaga talu mai le tausaga e 2017, e mafua mai ina ua ta’usala o ia e le Fa’amasinoga Maualuga i le solitulafono o le talepe fale ma le gaoi. Ua i ai le faamoemoe o le itu a le malo latou te faia se talosaga i le Fa’amasinoga ina ia faaleaoga le nofovaavaaia a Atamu, ae poloaina loa o ia e tuli lana faasalaga faa falepuipui e 7 tausaga na faamalumalu e le Fa’amasinoga.

TAGI A LE MALO

O lenei mataupu na tofu atu i le Ofisa o Leoleo i Tafuna i le po o le aso 17 o Tesema 2021, ina ua talosagaina e se ali’i se fesoasoani a Leoleo faasaga i se Tama na manu’a tigaina i luma o se Faleoloa Asia i se nofoaga i Tafuna, ina ua faaoolima i ai ni ali’i se toalua.

O ali’i e to’alua na tu’uaia sa faaoolima i le Tama na aafia, o le susuga lea a Sefo ma Timo, i laua ua molia i lenei mataupu. O le Tama na aafia e 45 tausaga le matua, e faigaluega o se ali’i Kamuta i se tasi o Konekarate Fau Fale i le atunu’u.

Na taunu’u faatasi lava Leoleo ma le ta’avale a le EMS, ma mafai ai loa ona ofo atu le fesoasoani i le ali’i na aafia, ae amata ona faagasolo suesuega a Leoleo e aofia ai le taumafai e saili ni molimau sa vaai i le taimi na tula’i mai ai le faalavelave.

Na taua e molimau sa i ai i le taimi na taunuu ai Leoleo, le matuia tele o manu’a na aafia ai le ulu ma foliga o le alii na aafia, o le mafua’aga lea na taumafai ai sui o le EMS faapea ai ma nisi o le atunu’u sa i ai i le taimi e sa’esa’e le na aafia i totonu o le Ta’avale a le Falema’i ma auina atu ai loa i le Falema’i i Fagaalu mo togafitiga faaopoopo.

E to’atolu molimau na mafai ona fesiligia e Leoleo e uiga i lenei mataupu. Na taua e le ulua’i molimau, o ia o se ali’i, o ia fo’i lea na logoina le Ofisa o Leoleo mo se fesoasoani, lona vaai tino lava i le taimi na tula’i mai ai le fa’alavelavelave.

Na taua e le molimau e fa’apea, a o savali mai i luma tonu lava o le Faleoloa Asia lea na tula’i mai ai le fa’alavelave, ae taia loa i lana faalogo le valaau mai o se tagata mai le pito i tua o le Faleoloa, “Ua kakau oga e alu ese.” Na vaaia e le molimau le alii na aafia o loo savali mai i tua o le Faleoloa, ae o lo o mulimuli mai ai ni ali’i se to’alua. 

Na faliu le alii na aafia e talanoa i le au ali’i e to’alua na mulimuli mai i ona tua, ae faateia loa o ia ina ua faapo o ia e le isi ali’i e ala i lona tu’i o ona foliga ma palasi ai i lalo. Na tago le isi alii i le fagupia ma ta ai le ulu o le alii na aafia ao taatia i lalo o le sima.

Ona faaauau ai pea lea ona ta tu’i e le au alii e to’alua ua molia le alii na aafia ma kiki lona tua, seia oo ina la faalogo ua ia valaau atu e soia.

O le isi molimau sa ia faailoa i Leoleo lona vaaia o le isi alii o le to’alua ua molia o ia kiki foliga o le tagata o loo taatia i lalo, ae o le isi alii o loo ia ta tu’i foliga ma le tino. O le faamatalaga lava fo’i lea a le molimau lona tolu na tuuina atu i Leoleo, e le gata sa ia taua le faaoolima o alii e toalua ua molia i le alii na aafia, ae na ia vaaia foi foliga onana o i laua e to’alua na faatinoina le solitulafono.

O le tuana’i ai o aso e 4 talu ona mae’a le fa’alavelave, na maua ai loa le avanoa e fesiligia ai e Leoleo le alii na aafia i le Falema’i i Fagaalu, mo le tuuina atu o sana faamatalaga e faatatau i le faalavelave sa tula’i mai.

Na taua e le alii na aafia, o ia faatoa manava i le afiafi lea, ona topetope atu ai lea i le Faleoloa Asia e le mamao ma lona fale e faatau se mea’ai mo lana fanau. Ina ua foi mai i totonu o le Faleoloa o le a oso i totonu o lana ta’avale, ae ona faalogoina se tagata o valaau atu ia te ia, “Uso, o afea e toe faafoi mai ai mea faigaluega a lo’u uso matua lea na e sau ma oe ua ou fia fa’aaogaina.”

Na taua e le alii na aafia i Leoleo, na tasi lava lana faalogo ona ia iloa lea, o le leo lea o Atamu, lea o lo o valaau mai i tua o le Fale Tuufua o loo i le pito i tua o le Faleoloa. Sa na ia savali i tua ma ia iloa ai, o Sefo ma le isi ana uo o loo fai le la inugapia i tua o le Fale Tuufua.

E silia i le itula o eva ma talanoa ai ia Sefo, ona o lona taumafai e faafilemu mai le pisapisao e faatatau i mea faigaluega. Ae na ia faalogo atu loa ua amata ona ese le talanoa a Sefo o lea na ia faamavae ai loa ma ia tulai’ ma alu ese.

Na faateia o ia ina ua oo mai i luma i le vaega o loo paka ai lana ta’avale, ae toe valaau atu Sefo ia te ia e faatali atu. A o la talanoa ma Sefo, na faafuase’i ona tu’i o ia e le uo a Sefo, le susuga a Timo ae na te lei iloaina le taimi na tu’i ai o ia, ma palasi ai loa i lalo, ma fa’aauau ai loa le fasiga o ia seia oo ina matapogia ua ia le iloa se mea. E te’i ane o loo taoto i le Falema’i ma manu’a e tele ua aafia ai ona foliga.

O manu’a na aafia ai le alii na manu’a e aofia ai se ta’e tele i le itu agavale o lona ao, o lona auvae na gau ma ua mae’a ona faauaea, faapea ai ma ona foliga na unaoa uma, o ona mata fo’i na solo uli atoa.

O le lata i le faaiuga o le masina na te’a nei na faatoa maua ai e Leoleo ia Sefo ma Timo i le fale o Timo i Tafuna, ma auina atu ai loa i laua i le Ofisa o Leoleo mo suesuega.

Ina ua fesiligia e Leoleo i laua nei e tusa ai o lenei faalavelave, sa la ioeina ai lo la faia o lenei solitulafono o le faaoolima i le alii na aafia ma manu’a tigaina ai o ia. Na ta’utino atili Sefo e faapea, o ia na faatalanoaina le alii na manu’a ae o Timo na muamua pa’i i ai.

A o le i fesiligia e Leoleo ia Sefo ma Timo, na faia se suega faapitoa i o la tino ina ia mautinoa la te le o tauaveina fualaau fa’asaina poo aupega mata’utia.

Na saili e Leeoleo le tino o Sefo ma maua ai se paipa tioata o lo o i ai vaega o le pauta paepae i totonu. Na saili le tino o Timo ma maua ai se tamai pepa iila o lo o i ai vaega o lau mamago o le mariuana i totonu. Na faia e Leoleo se suega faapitoa i le pauta paepae na maua ia Atamu ma faamaonia ai, o vaega ia o le pauta faasaina o le aisa.

Na faia fo’i se suega i lau mamago na maua ia Sefo ma faamaonia ai, o vaega ia le laau faasaina o le maruana.