Pago Pago, AMERIKA SAMOA

E to’alua ni ali’i na pu’e faapagota e Leoleo i le masina na te’a nei ma taofia i le Falepuipui i Tafuna, e mafua mai i le faalavelave lea na manu’a tigaina ai se ali’i i se inugapia sa faia. Ae ina ua saili e Leoleo tino o ali’i nei e to’alua, na maua i ai vaega o fualaau fa’asaina.

O le 3 vaiaso talu ai ona tutula’i ai i laua nei alii e to’alua i luma o le Fa’amasinoga Faaitumalo, ma faatulaga ai loa e le Fa’amasinoga tupe e tatala ai i laua i tua, lea e $15,000 e tatala ai i tua Anthony Atamu, ae $10,000 e tatala ai i tua Tavita Olive.

Afai e mafai ona tatala i laua i tua, ua poloaina i laua e le Fa’amasinoga ina ia taumamao mai lo la toe tagofia o fualaau fa’asaina po o le ‘ava malosi, e le mafai fo’i ona la taumafai e faafesoota’i molimau a le malo, e aofia ai ma le ali’i na aafia i lenei mataupu.

O le vaiaso fou lea ua faatulaga e faia ai le ulua’i iloilioga o lenei mataupu.

E pei ona taua i faamaumauga a le Faamasinoga, o le susuga a Atamu o lo o nofovaavaaia mo le 7 tausaga talu mai le tausaga e 2015, ina ua ta’usala e le Fa’amasinoga Maualuga i le solitulafono o le talepe fale ma le gaoi. Ua i ai le faamoemoe o le itu a le malo latou te faia se talosaga i le Fa’amasinoga ina ia faaleaoga le nofovaavaaia a Atamu, ae poloaina o ia e tuli lana faasalaga faa falepuipui e 7 tausaga na faamalumalu e le Fa’amasinoga i le 2015.

O lo o tuuaia e le malo ia Atamu ma Olive i le moliaga e tasi o le faaoolima i le tulaga lua; tasi le moliaga o le umia faasolitulafono o vaega o le pauta faasaina o le aisa, o solitulafono mamafa ia e mafai ona faasala ai se tasi i le Toese mo le umi e oo atu i le 10 tausaga, pe faasala i le salatupe e oo atu i le $20,000, faapea ai ma le moliaga mama o le faatupu vevesi i nofoaga faitele.

TAGI A LE MALO

O lenei mataupu na tofu atu i le Ofisa o Leoleo i Tafuna i le po o le aso 14 o Iuni 2021, ina ua talosagaina e se ali’i se fesoasoani a Leoleo faasaga i se Tama e 45 tausaga, na manu’a tigaina i luma o se Faleoloa Asia i Tafuna, ina ua faaoolima i ai ni ali’i se toalua.

Na taunu’u faatasi lava Leoleo ma le ta’avale a le EMS, ma fesoasoani i le ali’i na aafia, ae amata ona faagasolo suesuega a Leoleo e aofia ai le taumafai e saili ni molimau I lenei faalavelave.

Ona o le matuia tele o manu’a o le na a’afia I le faalavelave, o lea na aveina atu ai o ia I le falema’I I Faga’alu mo togafitiga faaopoopo.

E to’atolu molimau na mafai ona fesiligia e Leoleo e uiga i lenei mataupu. 

Na taua e le ulua’i molimau, o ia o se ali’i, o ia fo’i lea na logoina le Ofisa o Leoleo mo se fesoasoani, a o savali mai i luma o le Faleoloa Asia, ae taia loa i lana faalogo le valaau mai o se tagata mai le pito i tua o le Faleoloa, “Ua kakau oga e alu ese.” Na vaaia e le molimau le alii na aafia o lo o savali mai i tua o le Faleoloa, ae o lo o mulimuli mai ai ni ali’i se to’alua. 

Na ta’ua e le molimau, le liliu o le ua a’afia I ali’I e to’alua sa mulimuli mai ia te ia, ae tu’I loa ona foliga ma palasi ai I lalo.  Na tago le isi alii i se fagupia ma ta ai le ulu o le alii na aafia, a’o taatia i lalo o le sima.

Ona faaauau ai pea lea ona ta tu’i e le au alii e to’alua ua molia le alii na aafia ma kiki lona tua, seia oo ina la faalogo ua ia valaau atu e soia.

O le isi molimau sa ia faailoa i Leoleo lona vaaia o le isi alii o le to’alua ua molia o ia kiki foliga o le tagata o loo taatia i lalo, ae o le isi alii o loo ia ta tu’i foliga ma le tino. O le faamatalaga lava fo’i lea a le molimau lona tolu na tuuina atu i Leoleo, e le gata sa ia taua le faaoolima o alii e toalua ua molia i le alii na aafia, ae na ia vaaia foi foliga onana o i laua e to’alua na faatinoina le solitulafono.

O le tuana’i ai o aso e 4 talu ona mae’a le fa’alavelave, na maua ai loa le avanoa e fesiligia ai e Leoleo le alii na aafia i le Falema’i i Fagaalu, mo le tuuina atu o sana faamatalaga e faatatau i le faalavelave sa tula’i mai.

Na taua e le alii na aafia, o ia faatoa manava i le afiafi lea, ona topetope atu ai lea i le Faleoloa Asia e le mamao ma lona fale e faatau se mea’ai mo lana fanau. Ina ua foi mai i totonu o le Faleoloa o le a oso i totonu o lana ta’avale, ae ona faalogoina se tagata o valaau atu ia te ia, “Uso, o afea e toe faafoi mai ai mea faigaluega a lo’u uncle lea na e sau ma oe ua ou fia fa’aaogaina.”

Na taua e le alii na aafia i Leoleo, na tasi lava lana faalogo ona ia iloa lea, o le leo lea o Atamu, lea o lo o valaau mai i tua I se fale tuufua i tua o le faleoloa.  Sa ia aga’I atu I le mea na valaau mai ai le tagata, ma ia iloa ai o Atamu ma sana uo o fai se la inugapia.  

Na ta’ua e le alii na a’afia, sa silia ma le itula na eva ma talanoa ai iina ia Atamu, ona o lona taumafai e faafilemu mai le pisapisao e faatatau i mea faigaluega. Ae na ia faalogo atu loa ua amata ona ese le talanoa a Atamu, o lea na ia faamavae ai loa ma ia tula’I ese.

Ae na faateia o ia ina ua oo mai i luma I lana ta’avale, ae toe valaau atu Atamu ia te ia e faatali atu. A o la talanoa ma Atamu, na faafuase’i ona tu’i o ia e le uo a Atamu, le susuga ia Olive, ae na te lei iloaina le taimi na tu’i ai o ia, ma palasi ai loa i lalo, ma fa’aauau ai loa le fasiga o ia seia oo ina matapogia ua ia le iloa se mea. E te’i ane o loo taoto i le Falema’i.

O manu’a na aafia ai lenei alii, e aofia ai se manu’a tele i le itu agavale o lona ao, o lona auvae na gau ma ua mae’a ona faauaea, faapea ai ma ona foliga na unaoa uma.

O le masina na te’a nei na faatoa maua ai e Leoleo ia Atamu ma Olive i le fale o Olive i Tafuna, ma auina atu ai loa i laua i le Ofisa o Leoleo mo suesuega.

Ina ua fesiligia e Leoleo i laua nei e tusa ai o lenei faalavelave, sa la ioeina ai lo la faia o lenei solitulafono o le faaoolima i le alii na aafia ma manu’a tigaina ai o ia.

A o le i fesiligia e Leoleo ia Atamu ma Olive, na faia se suega faapitoa i o la tino ina ia mautinoa la te le o tauaveina fualaau fa’asaina poo aupega mata’utia.

Na saili e Leeoleo le tino o Olive ma maua ai se paipa tioata o lo o i ai vaega o le pauta paepae i totonu. Na saili le tino o Atamu ma maua ai se tamai pepa iila o lo o i ai vaega o le pauta paepae i totonu. Na faia e Leoleo se suega faapitoa i le pauta paepae na aua ia Atamu ma Olive ma faamaonia ai, o vaega ia o le pauta faasaina o le aisa.