Ads by Google Ads by Google

Molia ni ali’i se to’alua i le faia o uiga mataga i ni tamaitai talavou


[ata: foa'i]
ausage@samoanews.com

Pago Pago, AMERIKA SAMOA

 

E to’alua ni Tama matutua ua taofia nei i le Toese i Tafuna ona o tu’uaiga i le faia lea o uiga mataga i ni tamaitai e talavou i lalo o le tulafono. 

 

O le isi o i laua nei o le Tama fai, o lo o tu’uaia i le faia o uiga mataga i lona afafine fai e 18 tausaga le matua faapea ai ma le tama a le uso a lona to’alua e 15 tausaga le matua. O le isi Tama o lo o tu’uaia i lona faia o uiga mataga i le afafine a le ali’i e uso ma Tama e 16 tausaga le matua.

 

Talu ai sootaga o i laua nei ma tamaitai talavou o loo aafia, o le a le mafai ai e le Samoa News ona faalauiloa suafa o i laua nei ua molia, ona o le puipuiga lava i tamaitai talavou o loo aafia i lenei mataupu.

 

O le Tama fai e lata i le 70 tausaga le matua, ua molia o ia i moliaga mamafa e 4 e aofia ai le faia o uiga faasotoma, faia o uiga mataga i fanau talavou, tagofia o itutinosa o ni tamaitai e talavou i lalo o le tulafono, atoa ai ma le faia o uiga mataga i tamaitai e aiga i ai.

 

E $50,000 leaua faatulaga e tatala ai i tua le Tama fai e 63 tausaga le matua. Afai ae tatala le ua molia i tua, ua poloaina e le Faamasinoga o ia ina ia aua ne’i taumafai e faafesoota’i tamaitai e to’alua o loo aafia i lenei mataupu, pe taumafai fo’i i soo se auala e alu i le fale, a ia saili se isi nofoaga fou e faamautu i ai ao faagasolo ai taualumaga o lana mataupu.

 

O le uncle e 55 tausaga le matua, ua molia o ia i moliaga mamafa e 3 e aofia ai le faia o uiga mataga faafeusuaiga, tagofia o itutinosa o se tamaitai e talavou i lalo o le tulafono faapea ai ma le faia o uiga mataga i se tamaitai e aiga i ai.

 

O loo tu’uaia fo’i o ia e le malo i le isi tagi, lea e aofia ai le molia o ia i le moliaga o le umia faasolitulafono vaega o le aisa faapea ai ma le umia faasolitulafono o vaega o le mariuana.

 

E $35,000 le tupe lea ua faatulaga e tatala ai i tua le uncle. Afai ae tatala i tua le ua molia, ua poloaina o ia ina ia saili se isi nofoaga e nofo ai, aua ne’i toe taumafai e faafesootai le tamaitai na aafia poo lona aiga, ma ia avea o ia ma tagatanu’u lelei e tausi i tulafono a le malo.

 

TAGI FAASAGA I LE TAMA FAI

 

E pei ona taua e le malo i le latou tagi faasaga i le Tama fai, o le taeao o le aso 8 o Mati na aga’i atu ai le tamaitai na aafia e 18 tausaga le matua i le Ofisa o Leoleo i Tafuna ma faila lana tagi faasaga i lona Tama fai, i lona faia lea o uiga mataga ia te ia. 

 

O le faalavelave muamua na tula’i mai i le masina o Iuni 2015 ao 12 tausaga le matua o le tamaitai lea, ma le faalavelave lona 2 na tula’i mai i le aso 5 o Fepuari, 2021 i le taimi ao 17 tausaga o le tamaitai na aafia. O le aso na sosoo ai, Fepuari 6, 2021 na atoa ai le 18 tausaga le matua o le tamaitai o loo aafia i lenei mataupu. 

 

I le masina o Iuni 2015, na fai ai le ua molia i lona afafine fai e alu atu e lomilomi ona vae ona o ia e maua i le gasegase o le gugu. A o lomilomi e le tamaitai na aafia vae o lona Tama fai, na fai i ai le Toeaina e faasolosolo atu lana lomi i ona ogavae seia oo lava i le faatonu e le ua molia o lona afafine fai e tago i ona itutinosa.

 

I le aso 5 o Fepuari 2021 na tula’i mai ai le faalavelave lona lua, ina ua valaau le ua molia i lona afafine fai e alu atu e lomilomi ona vae ona ua oso fo’i ona gugu. Na usita’i le tamaitai na aafia ma aga’i atu loa ua lomilomi vae o lona Tama fai, peita’i na faatonu e le ua molia lona afafine fai e faasolo lana lomi i ona ogavae seia oo i lona fai i ai e tago i ona itutinosa.

 

 

Na fai le ua molia i lona afafine fai e faapea, afai e le usita’i i lana faatonuga ma faatino le mea o loo mana’o ai, na te le toe faia lava se mea lelei mo ia, na te le faatauina fo’i se meaalofa mo ia i lona aso fanau. E le gata i lea, na fai le ua molia i lona afafine fai, na te le toe faia fo’i ni mea o lana aoga e aofia ai ma lana faauuga pe afai na te le taliaina lona mana’o.

 

I le aoauli o le aso 5 o Mati, 2021 ina ua tuua mai le aoga a le afafine fai, sa ia vaaia ai lona tausoga e 15 tausaga o loo nofo atu i fafo o le fale ma tagi. Na fesili le afafine fai i lona tausoga i le mafua’aga e tagi ai ae na faamatala i ai e lona tausoga gaioiga mataga sa faia e le ua molia ia te ia.

 

Na taua e le tausoga e faapea, na fai atu le ua molia e alu atu e lomilomi ona vae ona ua oso ona gugu. Sa ia usita’i i ai ona o ia o lona uncle ma la aga’i atu ai loa i totonu o le potu ma amata loa ona lomilomi ona vae. Sa fai atu le ua molia ia te ia e faasolo lana lomi i ona ogavae ma oo ai i lona faatonu o le tamaitai e tago i ona itutinosa. E lei usita’i i ai le tamaitai, ae na ia tula’i i luga ma savali ese loa ma le potu.

 

Ina ua fesiligia e Leoleo le ua molia e tusa ai o tu’uaiga faasaga ia te ia, sa ia ioeina ai tu’uaiga uma lava faasaga ia te ia. Sa ia faatoese fo’i i Leoleo e tusa ai o le mea ua tula’i mai ae i lona talitonuga, ua lagona lona sese.

 

TAGI FAASAGA I LE UNCLE

 

I le masina na te’a nei na aga’i atu ai le tamaitai e 16 tausaga le matua ma le uso o lona Tina i le Ofisa o Leoleo i Tafuna e faila le la tagi faasaga i le ua molia, i lona faia lea o uiga mataga ia te ia. Na taua e le tamaitai na aafia i Leoleo e faapea, e masani ona alu i le fale o lona uncle e fesoasoani i le faiga o feau atoa ai ma le kukaina o ana mea’ai, pe afai e oso ona gugu ma le mafai ai ona savali.

 

I le masina o Novema o le tausaga na te’a nei, na tula’i mai ai le ulua’i faalavelave ina ua alu e fesoasoani e tae le lapisi ma faamama le lotoa. A o tu i luga o le laulau e tapena ipu, na te’i ona ua tago atu se tagata i lona fatafata. Sa ia faliu i tua e vaai poo ai mai ia vaaia ai lona uncle o loo tu atu i ona tua, o lea na ia fai ai i lona uncle e alu ese ma le fale ona ua mataga tele lana mea ua fai. 

 

O le isi faalavelave na tula’i mai i le masina o Ianuari o le tausaga nei ao i ai i le fale o lona uncle, sa lagona lona vaivai i ana galuega sa fai, o lea na manatu ai loa e moe i totonu o le isi potu o le fale se’i ma’ea le vevela o le la ona alu lea i le fale. A o moe i luga o le moega, na faateia o ia ina taoto atu lona uncle i lona luga ma tago atu i ona itutinosa. Sa ia taumafai e una’i ese peita’i sa musumusu atu ia te ia e aua ne’i pisa i se isi.

 

I le masina o Fepuari na te’a nei, na toe tula’i mai ai fo’i le isi faalavelave ina ua tauanau e lona uncle o ia e alu atu e matamata le la ata, ae na te’i ina ua ki ane le ata, o ata lea. Sa taofi e lona uncle o ia i totonu o le potu ae fai i ai uiga mataga faafeusuaiga.

 

O le 2 vaiaso talu ai na faatoa maua ai e Leoleo le ua molia ma auina atu loa i le Ofisa o Leoleo i Tafuna mo suesuega. Sa fesiligia e Leoleo le ua molia poo i ai ni a’upega poo ni fualaau faasaina ia te ia, na tali le ua molia, e leai.

 

Ae ina ua saili e Leoleo le tino o le ua molia, sa maua i ai se tama’i ato uliuli i le taga o loa ofuvae sa fai. I totonu o le tama’i ato uliuli a maua ai e Leoleo ni straws se 2 ua mae’a ona tipi faamaai tulimanu, o lo o i ai vaega o le pauta faasaina o le aisa, faapea ai ma se pepa iila o loo tumu i lau mamago o le mariuana.

 

Ina ua fesiligia e Leoleo le ua molia e tusa ai o fualaau faasaina sa maua ia te ia, na ia taua ai e faapea, o fualaau faasaina na aumai i se tasi o ana uo e fesoasoani ai i lona mafaufau, ona o le tele o taimi e tutupu ai lagona ita ia te ia e faatatau i lona aiga, ma ia manatu ai e faia ni gaioiga leaga i lona aiga. Ae o taimi uma lava na te tagofia ai fualaau faasaina, e suia ai ona mafaufauga ma maua ai e ia le filemu.

 

Na faia ni suega i fualaau faasaina na maua ma faamaonia ai, o pauta papae sa i totonu o straws o vaega ia o le aisa, ae o lau mamago sa i totonu o le pepa iila o vaega ia o le mariuana.