Pago Pago - AMERIKA SAMOA

O le aso 4 o Fepuari, 2025, na ripotia mai ai e se tagata faigaluega a le Ofisa o Fa’ato’aga, i le ofisa a leoleo i Tafuna ia le gaoia o le latou ofisa, lea na agai atu ai loa leoleo mo a latou suesuega.

Na faamatalaina e le tagata faigaluega a le ofisa o fa’ato’aga e faapea, na usu atu mo galuega i lea taeao, ma ona va’aia ai, e foliga main a su’esu’eina e se/ni tagata ia le latou ofisa.  Sa ia ta’ua le tele o ni a latou oloa fou na to’ai taunu’u atu, ua tatalaina uma.  Ae na o le pau le oloa na misi, o se atigipusa o ni moliuila (G26), lea na maua atu o matala i totonu o le tanoa fuluipu a le ofisa.

Sa ta’ua foi e le alii faigauega e faapea, na gaoia foi e le au gaoi ia ni i’a se tolu e ta’i 10 pauna (yellowfin) sa i totonu o le pusa aisa a le ofisa.  Ma sa molimauina ia se laina toto mai i totonu o faitoto’a a le ofisa agai atu i fafo ma sa maua ai e leoleo ia ni fa’ailoga o pa’u ta’avale, i le palapala i fafo o le ofisa.

O le taeao lava lea, na maua mai ai se vala’au i nisi leoleo, na fa’ailoa mai ai le mauaina o le au gaoi faatasi ai ma oloa na o la gaoia.

Na ta’ua e leoleo ia sa mauaina le au gaoi, na o latou agai atu e tali se vala’au e tusa ai ma ni tagata ua o i totonu o se fale tu’ufua i tafatafa o le fale’aiga a le Manaia.

O iina na lokaina mai ai le susuga ia Tino Jaylann Fa’aivi ma Suimai Time, o taumafai e sola ese ma se taga lapisi, na maua ai ni oloa i totonu faapea ma se moa vao.

Sa aveina atu uma i la’ua i le ofisa a leoleo mo le fa’aauauina o a la suesuega.

Ae o oloa sa maua i totonu o le taga lapisi, o ni mitiafu (DOA) e lua, ma sa fa’amaonia mai ai iina i leoleo, o oloa nei ia sa gaoia mai i le ofisa o fa’ato’aga.  O isi oloa na maua ai i totonu o le taga lapisi, na aofia ai ni moliuila (G26) e 18, o se ili, o se masini faamama ‘ea, o ni pusa ‘markers’, o se ‘ink cartridge’, o se uati lima, o se samala, pea seevae e lua, o mata tioata, o se ili tu’u taga ma le tele o isi oloa.

Na mafai ona fa’amaonia e le tagata faigaluega a le DOA lea na valaau i le ofisa a leoleo, ia meatotino a le latou ofisa ia na i totonu o le taga lapisi na maua i alii ua molia.

Ina ua fa’atalanoaina e leoleo ia Fa’aivi ma Time, sa fa’amatalaina e Time e faapea, e le’i auai o ia i le gaoiga o le ofisa a fa’atoaga.  Na ia ta’ua e fa’apea, o le vaveao lena, na tula’i mai ai se fe’ese’esea’iga i le va o ia ma lona to’alua, ma tu’ua ai e lona toalua ia le latou fale.

Sa ta’ua e Time lona alu e saili mai lona to’alua ma sa afe atu ai i le fale tu’ufua lea e i autafa o le fale’aiga a le Manaia, ma ia va’aia ai ia Fa’aivi ma seisi iloa, e na te le iloa, o la’u ni oloa i totonu o se taxi.  Ae o le ili lea na maua atu ia te ia, na ia maua i le fanua.

Ae peitai, i le molimau a Fa’aivi sa ia fa’asino ai le lima ia Time ma ia ta’ua e faapea, o Time e ana le tonu e la te o e gaoi le ofisa o fa’ato’aga.

Na ta’ua e Fa’aivi e faapea, na o e ma Time e su’e le to’alua a Time, ma na o la oso atu i tua o le fale’aiga a le Manaia, ae fai atu Time ia te ia, e la te ‘tipi’ atu i le auala lea e alu agai i le ofisa o faatoaga, se’i alu e fai sana pisinisi.

Sa faamatalaina e Fa’aivi le mana’o o Time e la te osofaia ia le ofisa o faatoaga, ma o Time na oso atu i se faamalama, ae faatonu o ia e va’ava’ai pe sau seisi.  Ona tatala mai lea e Time o le faitoto’a tele ma o la agai atu ai loa i totonu o le ofisa ma amata ona su’esu’e meatotino na i totonu o le ofisa.

Na ta’ua e Fa’aivi le amata mai o le la suesuega mai i le ofisa pito i luma, i totonu o lkesi ma so’o se vaega o le ofisa.  Ona soso’o mai ai lea i atigipusa, ae ua tele tele, ua le mafai ona o la aveina.

I le fa’aauauina o le faamatalaga a Fa’aivi, sa ia ta’ua ai lo la agai mai fafo, ae va’aia ai e Time ia se taxi o tu i autafa o le ofisa ma sa masani ia Time i le avetaxi.  Na o le pau le tulaga na manatua e Fa’aivi, o le pikiapu a le ‘Airport taxi’, ae na te le manatua le lanu o le taavale.

Sa faapea ona o la’uina meatotino na o la gaoia mai totonu o le ofisa, i luga o le pikiapu (taxi) ma o latou malaga atu ma le ave taxi, i le tu’u i la’ua i le fale tu’ufua i tafatafa o le fale’aiga a le Manaia.

Ua molia nei Fa’aivi ma Time i moliaga o le Faomea i lona tulaga e lua ma le Gaoi, o ni moliaga i vaega ‘C’ o solitulafono malolosi.  O nei moliaga, e mafai ona nofosala ai i le falepuipui mo le fitu tausaga, i le moliaga e tasi.  Po o se sala tupe e ta’i $5,000; po o faasalaga uma e lua.

Ua molia foi i la’ua i le solivale o fanua ma maota, e aunoa ma se faanoi, o se vaega ‘B’ i solitulafono mama, e mafai ona nofoala ai i le o’o atu i le ono tausaga, po o se sala tupe e $500; po o faasalaga uma e lua.

E $20,000 le vaegatupe na fa’atulagaina e tatalaina ai i tua ia Fa’aivi, ae $15,000 ia Time, e mafai ai ona faatalitali a la faamasinoga.