Ads by Google Ads by Google

Molia ni alii se to’alua umia o fualaau faasaina ma le faamoemoe e faatau atu


[ata: SN]
ausage@samoanews.com

Pago Pago - AMERIKA SAMOA

 

E to’alua alii ua taofia i le Toese ma molia i le umia faasolitulafono o fualaau faasaina, ina ua osofa’i e Leoleo se fale i lalo o se poloaiga a le Fa’amasinoga ae maua ai fualaau faasaina o le aisa ma le mariuana, o mea e fa’aaoga e i latou e faatau atu ai fualaau faasaina, atoa ai ma se vaega tupe tele lava.

 

O le vaiaso na te’a nei na tutula’i ai i laua e to’alua i luma o le afioga i le ali’i Fa’amasino o le Fa’amasinoga Faaitumalo ia Gwen Tauiliili-Langkilde. 

 

O i laua e to’alua ua molia, e aofia ai Tuaoloina Solofa ma Zacharymelven Darius Iopu. E tai fa moliga ua faila e le malo faasaga ia i laua nei ua molia. 

 

O ia moliga e aofia ai le umia faasolitulafono o vaega o le pauta o le aisa; tasi le moliga o le umia faasolitulafono o vaega o le pauta o le aisa ma le faamoemoe e tulei ma faatau atu i isi tagata; tasi le moliga o le umia faasolitulafono o vaega o le laau faasaina o le mariuana; ma le moliga e tasi o le umia faasolitulafono o vaega o le laau faasaina o le mariuana ma le faamoemoe e tulei ma faatau atu i isi tagata; o ni solitulafono mamafa e mafai ona faasala ai se tasi i le toese mai le 5 e oo atu i le 20 tausaga, pe faasala i le salatupe e le silia i le $20,000, po o le faasala foi i faasalaga uma ia e lua.

 

E ta’i $40,000 lea ua faatulaga e le Fa’amasinoga e totogi ona faatoa mafai lea ona tatala le tagata e to’atasi o i laua ua molia i tua mai le Toese i Tafuna. 

 

O le vaiaso nei lea ua faatulaga e faia ai le ulua’i iloiloga o lenei mataupu i luma o le Fa’amasinoga Faaitumalo.

 

TAGI A LE MALO

 

E tusa ai o le tagi a le malo o lo o taua ai e faapea, o le vaiaso lona 3 o Iulai o le tausaga nei, na feiloa’i ai Leoleo ma le molimau faatuatuaina (CI). O le CI lea na ia tuuina atu i Leoleo Suesue faamatalaga uma e faatatau i gaioiga a le tagata e suafa ia “STEIN”, o le isi lea igoa o Tuaoloina Solofa, o le isi lea alii o loo tu’uaia i lenei mataupu.

 

Na taua e le CI i Leoleo Suesue e faapea, e eseese lava ta’avale e fealua’i ai Solofa pe a oo ina alu e tulei fualaau faasaina. O nisi o taimi na te fa’aaoga ai lana ta’avale o le ituaiga o le 4Runner, ae o isi foi taimi na te fa’aaogaina ai le ta’avale o le Toyota Tacoma lanumoli.

 

O le tele o taimi e tulei mai ai e Solofa fualaau faasaina i lona fale i Fagaima, ma ua mafai lava foi e ia ona aumai lana sapalai o fualaau faasaina mai Amerika, e faaui mai i le Falemeli poo va’a container fo’i e pei ona taua e le CI i Leoleo Suesue. O nisi o taimi e tulei ai e Solofa ta’i $25 ana fualaau faasaina, ae o isi fo’i taimi, e tulei ai e Solofa ta’i $1,000 i le aunese e tasi, pe tulei foi ta’i $2,000 i aunese e 2.

 

Na taua atili e le CI i Leoleo Suesue, e i ai le tagata o lo o fai ma lima taumatau a Solofa i le tuleiina atu o ana fualaau faasaina i isi tagata, o le ali’i lea e igoa ia Zacharymelven Darius Iopu, poo “VJ” fo’i e pei ona valaau ai o ia e le to’atele o tagata. O Iopu, o le isi lea alii e to’alua i ai i laua o loo molia i lenei mataupu.

 

O le mae’a ai ona faasoa e le CI o faamatalaga uma e faatatau i gaioiga faasolitulafono a Solofa, na la’a ai loa Leoleo Suesue i le isi laasaga, o le faatulaga lea o se avanoa e tuli ai le CI e faatau mai fualaau faasaina ia Solofa, ae mataituina uma e Leoleo Suesue nei gaioiga uma.

 

O le vaiaso lona 4 o Iulai na faatulaga ai loa le ulua’i faatau a Leoleo Suesue, lea na fa’aaoga ai le CI na te faatauina mai fualaau mai ia Solofa. 

 

O taimi uma lava e alu ai le CI e faatau mai fualaau faasaina mai ia Solofa, e i ai lava le nofoaga faapitoa e lalafi atu ai Leoleo Suesue ma latou mataituina gaioiga uma a Solofa o loo faia, aemaise lava i le taimi e faia ai fefaatauaiga ma le CI.

 

I le faatauga muamua, e $40 na tuu e Leoleo Suesue i le CI e alu ai e faatau mai fualaau faasaina. Na alu sa’o lava le CI i le fale o Solofa i Fagaima ma faatau mai ai le straw o lo o i ai vaega o le pauta faasaina o le aisa. Ina ua foi mai le CI mai le fale o Solofa ma le faatau, na ia tuu atu i Leoleo Suesue le straw o lo o i ai vaega o le pauta faasaina.

 

I le faatauga lona 2, na tuu ai e Leoleo Suesue le $30 i le CI ma aga’i atu ai loa le CI i le fale o Solofa i Fagaima ma faatau mai ai fualaau faasaina. Ina ua toe fo’i mai le CI o le a toe fo’i atu i lona fale, na taofi e VJ poo Iopu o ia ma fesili atu, pe mana’o e faatau sana straw o lo o i ai vaega o le pauta, ae na tali le CI, ua uma ona faatau mai lana straw mai ia Solofa.

 

Na fai Iopu i le CI, a toe alu atu i se isi taimi o sana faatau, aua nei toe alu ia Solofa e faatau mai ai sana straw, ae afe atu i le umukuka o loo latou faatali mai ai ma isi alii ma straw mo ia. Na faaalia atili e Iopu i le CI, o straw o loo ia tuleiina, o fualaau faasaina a Solofa.

 

E 3 isi faatauga na tuli ai e Leoleo Suesue le CI e fai mai i le fale o Solofa i Fagaima. 

 

O faatauga uma ia e 3, na faatau mai e le CI mai ia Iopu ma isi alii o loo nofonofo solo i tua i le umukuka a Solofa.

 

O taimi uma lava e fo’i mai ai le CI pe a mae’a sana faatau, e siaki ai e Leoleo o ia poo i ai nisi fualaau faasaina o loo ia tauaveina. E leai se mea e maua e Leoleo Suesue ia te ia. O taimi uma e fo’i mai ai le CI mai le fale o Solofa, na te tuuina atu ai le straw lanu samasama o lo o i ai vaega o le pauta faasaina o le aisa i Leoleo Suesue.

 

O vaega o le pauta o le aisa na maua mai e Leoleo Suesue mai le CI, o fualaau faasaina na faatau mai ia Solofa, na faia i ai se suega faapitoa ma faamaonia ai, o vaega ia o le pauta faasaina o le aisa.

 

E 2 isi faatauga na faia e le CI ma Solofa ae faaaoga ai e solofa ta’avale pikiapu o loo fealua’i ai. O le isi faatauga na sau ai Solofa i lana ta’avale pikiapu o le 4Runner, ae o le isi faatauga na to’alua mai ai Solofa ma Iopu i totonu o le ta’avale.

 

O le masina o Oketopa na te’a nei, na faataunuu ai le faatauga mulimuli lava a Leoleo Suesue ma le CI, lea fo’i na alu ai le CI ma ia faatau mai se straw lanusamasama mai ia Solofa o loo i ai vaega o le pauta faasaina o le aisa.

 

O le vaiaso na te’a nei na tauaao ai e Leoleo Suesue se poloaiga tusitusia mai le Faamasinoga e faataga ai Leoleo ona latou sailia le Fale ma ta’avale a Solofa, o nofoaga ia o loo masalomia le fa’aaoga e faatau mai ai fualaau faasaina.

 

O le aoauli o le aso 2 o Novema na te’a nei ae taunuu loa Leoleo Suesue i le fale o Solofa mo le faatinoina o le poloaiga a le Fa’amasinoga. O totonu o se tasi o pikiapu a Solofa na maua ai e Leoleo se sefe. E leai se fualaau faasaina na maua i le fale o Solofa poo totonu o isi ana ta’avale.

 

I totonu o se tasi o pikiapu a Solofa, na maua ai e Leoleo se ato pa’epa’e o loo i ai se tinoitupe e $1,998.

 

E to’alua isi alii na maua e Leoleo i le nofoaga na faatino ai le osofaiga i le fale o Solofa na taofia faatasi uma ma Solofa, ma auina atu i le Ofisa o Leoleo i Tafuna mo suesuega. Na toe tatala i tua le isi alii e toe fo’i atu i lona aiga, sei vagana ai le isi alii, o ia lea o Iopu, na taofia pea ma i’u ina molia faatasi ai i laua ma Solofa i lenei mataupu.

 

Na fesili Leoleo Suesue ia Solofa e faatatau i le sefe na maua i tua o lana ta’avale, ae na tali le ua molia, o le sefe na faatonu o ia e lona to’alua e ave e tia’i ona ua le toe aoga, ua le toe mafai fo’i ona toe tatala. Na toe fesili faalua Leoleo Suesue ia Solofa i le Ofisa o Leoleo i Tafuna e faatatau i le sefe pe mafai ona ia tatalaina, ae o a fo’i mea o loo i ai i totonu, peita’i na tumau pea le tali a Solofa, e le mafai ona tatala le sefe, e le o toe aoga fo’i le sefe, pau le mea e mana’omia o le ave e tia’i.

 

Na mafai ona tatala e Leoleo Suesue le sefe, ma maua ai e Leoleo Suesue fualaau faasaina o le aisa ma mariuana, faapea ai vaega e fa’aaoga e i latou mo le faatauina atu o fualaau faasaina i isi tagata, ma le tinoitupe e $11,555.

 

Na faia se suega i fualaau faasaina ma maua i totonu o le sefe ma faamaonia ai, o vaega ia o le pauta faasaina o le aisa, faapea ai ma le laau faasaina o le mariuana.

 

E le i mana’o Solofa e talanoa i Leoleo e tusa ai o fualaau faasaina maua i le sefe, i le mae’a ai lea ona faailoa e Leoleo Suesue ona aia tatau i lalo o le tulafono. Ae o le alii o Iopu, na ia faailoa i Leoleo Suesue e faapea, e faatele ona tuu atu e Solofa sapalai o fualaau faasaina e alu e momoli i le faleoloa i Fagaima.