Pago Pago - AMERIKA SAMOA

O le po o le aso 21 o Iuni, 2024, na fa’afeso’ota’i ai e se tamaitai ia le Ofisa a Leoleo i Tafuna, mo se fesoasoani, ona o se alii e 19 tausaga o lo’o palauvale solo ma tau’ai fagu pia i tafatafa o lona fale ma manu’a ai se tasi o tuaoi.

E tusa ai ma fa’amaumauga a le malo, sa agai atu sui malu o le malo i le nofoaga na tupu ai le faalavelave ma molimauina ai le fa’amanu’alia o se alii, ona o le ua molia, ma na logoina loa le vaega a le EMS mo le togafitia o le na a’afia.

Na fa’amatala e le na a’afia, o le ta o le 10 i lea afiafi sa palauvale ma fa’aumu ai le ua molia, le alii o Stone Filisi, i luma o lona (le ua a’afia) fale.  Na fa’aauau ai lava ina o’o i le ta o le 11:00 o lea lava afiafi, sa faia ai le sauniga a Filisi i luma o fale o isi aiga tuaoi, ae o le taimi lea ua tofafa le nu’u.

Sa faamatala foi e le ua a’afia, lona alu atu ma fesiligia Filisi po o le a lana mea o fai ma talosagaina le ua molia, ina ia alu loa i le fale.  Ae tago Filisi i le togi lona ulu i se fagu pia ma tau i lona muaulu.  Na amata loa ona tatu’i mai e Filisi ia le na a’afia, ma fai ai loa le la fusuaga.

O iina na sau ai loa le tua’a o le alii na a’afia ma valaau mai i le ua molia, e taofi loa, ae le’i valaau leoleo.  Sa ta’ua e le alii na a’afia e faapea, e le o se taimi muamua lea ua fai ai e Filisi lenei tulaga.

Na mafai foi ona talanoa sui malu o le malo ma seisi molimau ma sa faamatalaina e lea molimau e faapea, a’o sauniuni atu mo malologa o le po, sa ia faalogoina le palauvale leotele o se alii, ma fa’aumu solo i luma o lona fale.  Sa faamatala e le molimau, lona tuliina o lona atalii e fai i le tagata lea o lo’o pisa ma fa’aumu i fafo, e taofi loa ma alu i le fale.

Ae o ni nai sekone mulimuli ane, sa agai atu ai le molimau e siaki lona atalii, ae ona va’aia le tafe mai o le toto i foliga o lona atalii.  Ma o lea na ia faatopetope atu ai loa ma vaovao le misa a lona atalii ma le ua molia, ae peitai, sa fa’aauau lava le amioga a Filisi.

E le’i ta’ua i fa’amaumauga a le malo pe na lokaina Filisi, i le po lea, po’o le ta’ua ai foi o le mafuaaga o uiga fa’aalia a le ua molia, agai i le na a’afia ma lona aiga.

O moliaga ua fa’asaga ia Filisi, e aofia;

Faitauga 1:  Faatupu Vevesi i Nofoaga Faitele – o se vaega ‘B’ o solitulafono mama, e mafai ona nofosala ai i le falepuipui, mo le ono (6) masina po o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga e tolu – o se vaega ‘A’ o solitulafono mama, e mafai ona nofosala ai i le falepuipui mo le o’o atu i le tasi (1) tausaga po o se sala tupe e $1,000; po o fa’asalaga uma e lua.

E $1,000 le vaegatupe sa faatulagaina mo le tatalaina o le na molia mai i le falepuipui, e fa’atalitali ai lona faamasinoga.